［愛情純愛］既然忘記唔到佢，不如試下中意我⋯？: 75. 沒什麼大不了

「So this question should be⋯」

Miss一直講書，今日嘅英文孖堂係做Listening，我最討厭做Paper 3⋯特別係part B

宜家只係聽佢解題對答案，望住一行一行、密密麻麻嘅英文字，我淨係覺得好攰⋯我嘅英文能力中等偏高，但我特別唔中意睇英文字，一見到密密麻麻嘅字就眼瞓

「好悶呀⋯幾時先落堂，快啲放小息好唔好⋯？」我目光呆滯地望住課室嘅鐘，心裏只希望可以快啲落堂

到底係邊個編頭兩堂係孖堂英文㗎⋯想攰死人咩？朝早連個腦都未清醒就要聽一大堆英文，聽到頭都大埋



我收回視線嘅時候，目光自然而然地就落到岑諾新嘅身上

岑諾新托住腮，微微側着頭望住黑板，打喊露嘅時候不忘用手掩一掩口，手拎住原子筆把玩着

「睇嚟佢都好眼瞓～」我望住佢時喺心裏不禁笑了笑，嘴角微微上揚着，「邊個叫佢琴晚同我dm到3點幾先瞓～」

坐喺岑諾新後面嘅楊朗然拍咗岑諾新兩下，岑諾新向後靠喺椅背上，稍微回頭望佢一眼

「唔知楊朗然同佢講緊啲咩呢⋯」我喺心中好奇地自言自語道



楊朗然同岑諾新講咗兩句之後，岑諾新點一點頭，喺佢回頭望向楊朗然嘅途中，佢嘅視線忽然落到我身上

佢，同我對望着，視線對上了

岑諾新望住我嘅時候，臉上掛上淡淡嘅笑容；見到佢嘅笑容嘅我，亦對佢微微一笑

楊朗然拍咗岑諾新一下，岑諾新先回頭望過去

「又會咁啱對望嘅⋯」我喺心中講道，心裏有啲甜甜嘅感覺，「定係其實，佢有時都會偷偷地望我⋯？」



「叮噹叮噹⋯叮噹叮噹～」

代表住第一個小息來臨嘅鐘聲響起，但Miss佢似打算講晒呢題先再落堂

「Last question we will explain tomorrow.」

太好啦，終於⋯！但佢都係遲咗成10分鐘先落堂，食咗我地半個小息⋯

我喺Miss出咗去之後行去開locker，開完locker之後朝住課室門口行去，打算去個廁所

「詠妍，陪我去toilet。」我行到去詠妍嘅座位隔離拍一拍佢

我行到去課室門口，喺我再踏多一步就可以出到去課室外面嘅時候，一個人影閃出嚟

「業！係唔係一齊⋯！」「⋯！」



我頓時喺課室門前剎停咗，如果唔係就會撞落去

我同張景彥對望咗一眼，然後同步地尷尬笑咗一笑

我向我嘅右邊行咗一步，打算喺右邊行出去；張景彥向佢嘅左邊行咗一步，打算讓路比我出去

「佢又擋咗喺我前面⋯」我喺心中無奈地講道，詠妍捉一捉我隻手

我下意識就拉住詠妍行去左邊，點知張景彥又向佢嘅右邊行咗一步，佢又擋住咗我

張景彥行番去左邊，遞一遞手示意我喺佢嘅右手邊出去

我同佢尷尬咁笑咗一笑，我拉住詠妍喺佢嘅右手邊行出去



「去廁所，好急⋯！」我拉住詠妍急步行起嚟

我去完廁所喺廁格出嚟，企喺洗手盆前洗手

詠妍定睛地望住我，我從鏡中見到佢望住我，所以我又望一望佢

「做咩？」我望住鏡中嘅佢問道

「冇。」詠妍搖搖頭，但卻係一副欲言又止嘅模樣

我企喺洗手盆前甩一甩手上嘅水，然後行向廁所門口，我有啲好奇詠妍到底有咩想同我講

先啱啱踏出廁所，眼尾就瞄到張景彥喺後梯上嚟

張景彥行得好快，手上拎住枝水，超過咗我同詠妍行咗喺我地前面



「做咩呀？」我問詠妍，因為佢用手肘輕輕地撞咗我一下

「張景彥。」詠妍細聲地對我講道，望一望快步行、行咗喺我地前面嘅張景彥

「哦⋯」我有啲無奈咁哦咗一聲，「然後呢⋯喺學校一定會見到㗎啦⋯」

詠妍疑惑地望住我，仲輕輕挑眉，似係質疑緊我嘅反應

我唔想講啲咩，反正望佢嘅反應，都知佢想問啲咩⋯只怪我實係太了解余詠妍，朋友唔係白做

⋯

「今日你又唔同我地一齊番去呀？」希童望住我扁着嘴問道



「下次啦好冇～」我有啲抱歉咁望住佢，「我聽日同你地一齊番屋企啦～」

「好啦⋯」希童點點頭，「唉～宜家啲人有男朋友就唔要朋友啦～」

「難得佢地關係咁好，比佢任性下啦～」詠妍對希童講嘅同時望咗我一眼，「我地走啦！」




IG Link: https://www.instagram.com/nd_cotttoncandy/?hl=zh-tw