「咩偷偷摸摸,冇偷偷摸摸。」岑諾新鬆開攬住我嘅雙手,「羨慕嘅自己搵番個。」

「講咩呀,我先唔羨慕。」楊朗然行到去自己嘅座位,「邊個自己嬲咗一日?蔣倩盈,氹到佢嘅得你咋。」

楊朗然知道佢嬲呀原來,睇嚟岑諾新同咗楊朗然講

「嘖⋯」岑諾新一臉不爽地望住楊朗然

「就算我唔知咩事都睇得出你心情唔好嘅~」楊朗然笑咗一笑講道,「原來等人氹。」



「痴線⋯」岑諾新企起身,喺拎起書包嘅同時對我講道,「番去啦蔣倩盈。」

「嗯!」我行番去自己位孭書包,然後又行到去岑諾新面前

「走啦,拜。」岑諾新對楊朗然講道,我跟喺岑諾新後面行

岑諾新喺踏出課室後,對我嘅態度又變得有啲冷淡

「岑、岑諾新⋯!」我喺行出學校門口嘅時候叫住佢,「你係唔係真係已經冇嬲?」



「嗯。」岑諾新彷彿好似猶疑一樣靜咗一秒,然後先回答我,「冇嬲啦已經。」

我滿臉抱歉咁望住岑諾新,岑諾新望住我,無奈地嘆咗一口氣之後邁步行到嚟我面前,牽起我嘅手就行

「對—」「唔好再講對唔住。」

喺我想開口道歉之際,岑諾新打斷咗我,拉咗我一下將我拉到佢嘅身旁

「唔洗再講對唔住,我明白。」岑諾新主動表示佢明白我體諒我,佢帶住淡淡嘅笑容望向我,「等到你覺得可以承認我嘅時候再講都唔緊要。」



「講到好似我會一直同你一齊咁⋯」我雖然口係咁講,但心裏卻又有啲期待

「你想走嘅話都可以,我之前都話咗,要走嘅話,喺我真係中意你之前。」岑諾新望咗我一眼

做咩要好似好肯定自己會中意我一樣⋯?做咩會咁霸道⋯?點解要同我講啲咁嘅嘢⋯?我冇嫌棄,而且我嘅心都話我知我冇

我抬頭望住岑諾新,岑諾新佢好平靜,我想知道佢係唔係都同我一樣,對我有一定程度嘅好感⋯

「唔知呢~」我笑了笑,將想法收到心底,只答唔知,「係呢~我仲以為你同咗楊朗然講。」

「講咩?」岑諾新望一望我

「講你嬲⋯」我微微耷低頭,細細聲地講道

「冇。」岑諾新搖搖頭



「楊朗然佢知唔知我地⋯咩呀?」我唔想直接講而且諗唔到形容詞形容,「你有冇同佢講?」

「冇。」岑諾新搖搖頭,「就算同咗佢講都唔會有咩分別 。」

「哦⋯」我點點頭

男仔應該唔似女仔,咩事都會同好朋友講,不過其實楊朗然知唔知都好,對我都冇咩影響

「岑諾新,你對我好似冇以前咁冷淡。」我輕輕拉咗佢一下

「唔知點解,你覺得?」岑諾新居然反問番我轉頭都有

「唔⋯因為終於知道唔可以對女仔咁冷淡?」我笑了笑講道,其實我知道答案,但係我唔想講出嚟



「可能係。」岑諾新微微一笑,聳聳肩,「你覺得係嘅話就係。」

「咁唔通我覺得你中意咗我,你又真係中意咗我咩?」我不禁一笑

「唔知呢。」岑諾新今次直接答我唔知,「呢個問題,未有解答。」

岑諾新望住我,佢嘅眼神同表情,我真係睇唔透⋯我唔知佢諗緊啲咩

「咁我唯有期待一下有解答嘅一日啦~」我朝佢微微一笑講道



夜晚02:35

「聽日有PE堂,我唔想上呀⋯」



岑諾新:點解?PE堂幾好

「有啲麻煩⋯」我抬頭望一望時間,原來已經2點20分,「你未眼瞓咩?」

岑諾新之前唔係話佢最遲2點幾就瞓,佢會唔會已經覺得眼瞓,只係唔好意思同我講

岑諾新:還好,你眼瞓?

岑諾新佢平時唔會太夜瞓,佢會唔會已經攰啦?算啦,我都係同佢講我瞓啦

「少少眼瞓⋯」我回覆道,其實我仲未眼瞓

岑諾新:咁你快啲去瞓



「好啦,你都早啲瞓~」

「晚安啦!」

我鎖上手機螢幕,我咁樣都唔算講大話呀~係善意嘅謊言嚟

可能灘下灘下就瞓着㗎啦⋯




IG Link: https://www.instagram.com/nd_cotttoncandy/?hl=zh-tw