「啱啱孫慧伶行過⋯我嘅髮圈⋯」我一邊細聲地喃喃自語一邊猜測佢send張咁嘅圖比我嘅意思,「係要我,唔好諗咁多⋯?」

明明直接同我講就得啦⋯又要兜一個大圈嚟同我講~

但係,我好難唔諗咁多⋯孫慧伶對佢嚟講難忘到咩地步我點會唔知?我好清楚⋯就算我地講好咗,我地之間有承諾都好,我都唔可以確保佢心入面真係冇孫慧伶,我嘅擔心係無法控制

我太清楚佢有幾中意孫慧伶啦⋯所以我冇辦法⋯!

岑諾新番到嚟坐低喺位,佢望一望我,然後拉番好衫袖



「估到未?」岑諾新問道

「嗯?估唔到⋯」我扮估唔到佢想講啲咩,「所以你嘅意思係?」

「唔知。」岑諾新朝我輕輕一笑,「你估。」

「你開估話我知嘛~」我為咗聽佢親口講,連撒嬌都出動埋,「講啦講啦~」

「遲啲再話你知。」岑諾新卻笑一笑對我講道,故意唔話我知佢嘅意思係咩





「嗯,佢係咁答我,搞到我好想知道我嘅想法啱唔啱⋯!」我戴住耳機對喺電話另一邊嘅詠妍講道

今日晏就咁樣講完之後,岑諾新就冇再提過嗰張相嘅意思;我唯有喺夜晚打比詠妍傾電話講下啦~

「佢會唔會係想話你知都戴住你嘅髮圈之類?」詠妍道

「吓?即係點?」我不解地問



「我估㗎咋~佢如果真係仲係咁在意孫慧伶嘅話,其實嗰日嗰個story都冇必要出。」詠妍解釋道,「佢po個咁嘅story,可能係po埋比孫慧伶睇呢~孫慧伶仲有冇follow佢?」

「唔知喎⋯」我邊講邊打開IG,去睇下岑諾新嘅IG followers有邊個

先打咗孫慧伶嘅IG名頭兩個字就已經有,咁即係話孫慧伶仲有follow岑諾新嘅IG,嗰日嘅story⋯岑諾新po喺public,孫慧伶會睇到

「有喎。」我平淡地講道,「佢又真係仲有follow岑諾新。」

「岑諾新都po得喺public啦,佢都預咗孫慧伶會睇到㗎。」詠妍講道

「我點知佢點諗⋯」我講道,我都唔敢肯定嘅事邊敢講實,「我又唔可以確保佢對孫慧伶已經冇feel嘅⋯」

「我都唔可以確定~但個髮圈係佢主動問你拎,咁其實佢都冇話唔肯放低呀~」詠妍講道,「就算佢個心係仲有孫慧伶,你都唔係第一日先知㗎啦~」

「係啫⋯」我無奈地點頭,咁詠妍又真係講得啱嘅,我又唔係第一日知



「你幾時咁在意佢點諗㗎~」隔住個電話我都知詠妍喺度偷笑,「沉船啦咁快就真係~」

「冇囉⋯又唔係真係沉佢船嘅⋯」我諗緊要點樣解釋我宜家對岑諾新嘅感覺比詠妍聽,「唔⋯只係會有啲在意囉,又未完全中意嘅~」

我對佢,其實係⋯好感吧⋯

我唔知要點樣去證明我已經中意咗佢,因為我心底裏都唔清楚我係真係喺同佢相處嘅過程入面對佢產生好感,定我只係因為呢種新鮮感而產生好感

唔係所有感覺都可以用言語嚟形容同表達,特別係喺愛情上嘅感覺⋯

「你在意唔係即係中意佢咩?」詠妍問咗一個令我更加摸不著頭腦嘅問題,「你都在意佢嘅想法啦,咁唔係即係已經中意咗佢啦咩?」

「我講唔出邊度唔一樣,但總之,就係唔一樣啦~」我都唔識答詠妍嘅問題,「好感嘅話我係承認,但中意呢個問題,我未可以肯定。」



「你都太小心啦掛,你怕佢仲中意孫慧伶?」詠妍問道

「其一啦~」我當然,會怕呢樣嘢,「我唔想去到最後又係我自作多情,所以睇定啲先。」

「就算佢心入面係仲有孫慧伶都好,佢都一定會有向住你嘅時候㗎嘛~」詠妍好似想安慰我一樣,「唔洗咁擔心啦~而且你地宜家都係試下啫~」

「我都唔知呀⋯不過慢慢嚟啦⋯」我托住腮講道,「好啦我要做功課啦,聽日見啦~」

收咗線之後我冇去做功課,我講咗個大話只係單純地想自己唔好再諗呢件事,所以先話要做功課,而且聽日要交嘅功課,我今日喺學校已經做好,所以做功課只係一個借口

有太多事我唔清楚啦,我冇十足嘅信心,所以唔可以一口講定,只可以慢慢嚟啦~



「詠~妍~陪我去個toilet呀~」我行到詠妍旁邊嘅座位,「今日好地地又話喺學校食飯,仲以為你會想出去食㗎嘛~」



「希童話冇錢呀~所以喺學校食飯,你唔知咩?」詠妍企起身,「今朝早希童講。」

「冇喎~可能我咁啱冇聽到啦~」我講道,「陣間再同佢地一齊落去買飯啦~」

我同詠妍前腳踏出課室,希童同樂恩後腳就跟上,喺我同詠妍身後;一踏出課室行咗兩步,就見到孫慧伶同佢個friend一齊迎面行番嚟,佢手上拎住個保溫杯,佢地三個人急步行過嚟

佢地行番好快,又一邊傾計,我留意到嘅時候,佢地已經行得好近,我連忙推着詠妍行過啲費是撞到




IG Link: https://www.instagram.com/nd_cotttoncandy/?hl=zh-tw