［愛情純愛］既然忘記唔到佢，不如試下中意我⋯？: 107. 她的17歲

對於蔣倩盈突如其來嘅一句，我有啲愕然，但除咗下意識就提手輕輕地拖住佢以外，我唔知道要比咩反應佢先啱⋯

蔣倩盈見我冇出聲，抬頭望向我好似要確認下我有冇聽佢講嘢一樣

「嘻⋯」蔣倩盈對我嘻嘻一笑

我鬆開捉住佢嘅手，喺擠擁嘅人群中悄悄地將佢拉近我，然後輕輕地攬喺我嘅懷中

「一大清早講啲咁嘅嘢，你唔怕醜咩？」我因為感覺到來自佢嘅目光，無奈地問道



「唔⋯事實又唔怕講嘅～」蔣倩盈雖然係咁講，但佢卻迴避我嘅視線，細細聲咁講道

喺呢個咁近嘅距離，佢嘅味道格外明顯⋯唔係香水嘅味道，係另一種淡香⋯

味道好淡，但唔知點解會有種令人安心嘅感覺⋯佢喺我身邊嘅時候，我會好安心⋯

「我都覺得，你喺度比較好⋯」我不自覺地將自己嘅心底話講咗出口

「嗯？」蔣倩盈抬頭望我，微微側着頭，「你啱啱講咩？」



「冇，冇講咩。」我搖搖頭，啱啱我都只係衝口而出，冇勇氣再講一次

巴士到站，我地落車行番學校，喺巴士站嘅不遠處，張景彥企咗喺度

「等緊孫慧伶⋯？」我心裏猜想

呢頭咁樣諗完，轉個頭就見到從我身旁行過跑孫慧伶，佢平靜地行到張景彥嘅面前，講咗兩句之後就行

張景彥見到佢嘅淡然有啲疑惑一樣，然後好似下意識一樣望向我地嘅方向，視線停留咗一秒又瞬速地移開



我望向蔣倩盈，佢好似咩都冇睇到一樣，喺察覺到我望向佢之後抬頭望我，對我微微一笑

「做咩呀？」佢問我

「冇。」我回答道，「你有冇咩想要嘅生日禮物？」

「嗯？咁突然嘅⋯？」蔣倩盈笑一笑道，「冇咩特別想要，只要係你送嘅我都可以啦～」

聽到佢咁講，唔知點解我心裏有一絲甜意

愈同蔣倩盈相處得耐，我愈發現佢嘅獨有魅力⋯性格又好，點都好⋯

愈會有啲壞心眼咁覺得⋯張景彥同佢分咗手，都未嘗唔係一件好事⋯

⋯



4月16日 放學後

因為我放學之後要處理一下功課上嘅事，所以遲咗走，而蔣倩盈依舊等埋我，只係⋯

「哼⋯」坐喺位嘅蔣倩盈嘟起嘴鬧脾氣，已經嬲咗我一日

而原因嘛⋯大概係因為，我只係同佢講咗一句生日快樂就冇下文，所以佢就嬲咗我

蔣倩盈佢輕哼一聲撇開臉唔望我，什至背住我坐，其實禮物我都係有買嘅⋯

我行到自己位，喺書包中拎咗入份禮物出嚟，然後收喺背後，再轉身望住蔣倩盈嘅背影

「你真係要背住我，唔望過嚟？」我企喺佢嘅背後問道



「哼⋯嬲⋯」佢細細聲地好似抱怨一樣講道

「其實我有買禮物比你，你望過嚟啦⋯」我將禮物從背後拎咗出嚟放到前面，等佢轉身過嚟嘅時候可以望到

「真係⋯？」佢猶疑地問道

「嗯，真係買咗。」我堅定地回答佢，「我點會咩都唔買就同你過生日？」

蔣倩盈一下子轉身過嚟，見到我買比佢嘅禮物

「水晶花⋯！」蔣倩盈嘅雙眼頓時放光一樣，視線定喺我手上拎住嘅水晶花上

「我都話，我有買生日禮物比你⋯」我無奈地笑咗一笑，然後將枝花遞比佢，「生日快樂。」

當然呢枝水晶花唔係真水晶，只係用膠片整，喺膠片上貼咗層有鐳射光紋嘅玻璃紙而已



「多謝！」蔣倩盈毫不猶疑地企起身，飛撲過嚟攬住我，「我仲以為，你真係淨係送一句生日快樂比我就算⋯」

「點可能。」我輕輕回擁佢，感覺到佢真係好開心

「枝花好靚～」蔣倩盈望一望枝花，然後又望向我，佢伸手從我手中將枝花拎走，「嘻⋯我好中意啦～」

「唔嬲啦？」我望住佢問道

「原諒你啦～」佢高興地笑道，目光停留喺花上，「枝花真係好靚～」

望住佢甜甜嘅笑容，我嘅心完全冇辦法平靜落嚟，好想⋯直接錫佢⋯

「喂⋯」我忍唔住伸手，將手放喺佢下巴，掐住佢兩邊臉頰



X⋯X⋯X

「嗯？」我抬頭望向岑諾新嘅一刻，我不禁瞪大了眼

岑諾新鬆開我，我嘅大腦空白一片，聽到心跳聲同呼吸聲⋯佢放喺我下巴嘅手，亦緩緩鬆開

「你⋯」我震驚到咩都講唔出，眨兩下眼

我提手，指尖輕輕放到唇上；我抬頭望住佢，岑諾新卻默默地移開視線，臉頰同耳根都紅紅的

「點、點解⋯？」我嘅手捉緊枝花，定睛地望住佢




IG Link: https://www.instagram.com/nd_cotttoncandy/?hl=zh-tw