［愛情純愛］既然忘記唔到佢，不如試下中意我⋯？: 114. 只是想見

「冇呀～只係做緊功課，都唔算忙緊」我隨即回覆道，「做咩呀？」

岑諾新：喺屋企？

「係呀～你親自送我番嚟㗎啵～」我有啲疑惑，啱啱佢送我番嚟，我都只係番咗嚟大半個鐘，「做咩呀到底？啱啱先分開一陣，就掛住我啦？」

岑諾新：嗯

「咁坦白⋯？」我不禁有啲訝異地講道



岑諾新：你要唔要落嚟？

落嚟⋯？佢喺樓下⋯？佢過咗嚟搵我？

「你喺樓下？」

岑諾新：嗯

我頓時放低手頭上嘅工作，換咗套衫就落匆忙地出門口落樓下



升降機到咗地下，門一打開，我小步跑起嚟，推開大堂跑玻璃門小跑出去

一踏出大堂，就已經見到岑諾新企咗喺簷蓬下，微微抬頭望向天空發呆

「岑先生，你企喺度做咩呀？」我輕手輕腳地行到佢身旁，雙手放喺身後，柔聲地問道

岑諾新聽到我嘅聲音便望向我，然後一手就將我拉向佢嘅懷中，我有啲愕然，放喺身後嘅雙手都自然地垂着

「佢唔開心⋯？」我喺心中猜想道，「做咩突然間又會番嚟搵我⋯？」



我察覺到佢好似帶着心事嚟，但我問唔出口到底發生咩事，但我相信佢如果想講嘅話會主動同我講

不過唔問嘅話，會唔會好似我咩都冇留意到、唔關心佢一樣⋯？

「你做咩突然間想見我嘅⋯？」我小心翼翼地開口問道

岑諾新聽到我問佢，然後緩緩鬆手，佢望一望我，卻冇講嘢，然後移開視線

「岑諾新⋯？」我輕喚佢一聲，佢本來移開咗嘅視線又再一次回到我身上

佢係有心事，但只係猶疑緊同唔同我講？

「你做咩呀？有心事？」我關心地問道，「有心事嘅話同我講，唔好收喺心入面屈住。」

「冇⋯」岑諾新輕輕一笑對我講道，「就只係想見你。」



「你特登番咗屋企再出嚟，就係為咗見一見我？」我無奈地笑問道

「嗯，就係想見你⋯」岑諾新朝我行近一步將我攬住，「冇咩特別原因⋯」

「真係？」我有啲疑惑，亦唔多信佢只係因為呢個原因嚟見我，「真係真係？唔係唔開心之類？」

「冇呀⋯」岑諾新回答嘅同時將雙臂間嘅範圍收窄，將我攬得更緊，「就係突然間⋯好想見你⋯」

佢耷低頭喺我耳邊講道，一直都係平穩着嘅聲線，今日聽起嚟卻多咗一份迷惘⋯

我對佢嘅了解或者真係好少，但我知道平日嘅佢唔係咁樣⋯平日嘅佢冷靜，對所有事都淡淡然咁，聲線總係顯示出佢嘅平靜

但今日，直覺同聽覺卻話我知，佢係有心事



就算佢一直否認，但我嘅直覺都堅定咁話我知，岑諾新佢一定有啲嘢⋯

「見到你就好啦⋯」岑諾新柔聲地對我講道，感覺好似鬆咗一口氣一樣，「真係⋯」

我嘅心跳因為佢一句說話而加快咗好多⋯我對佢嚟講，重要吧⋯

「唔開心嘅話可以同我講呀⋯」我輕輕地回擁佢，「我會喺度聽你講⋯」

岑諾新默默地點頭，唔知佢遇到啲咩事呢⋯

我靠喺佢嘅頸窩上蹭了蹭，佢微微縮起膊頭

「其實真係冇咩大事，只係我想嚟見你。」岑諾新鬆開我，語氣又變番好似平時一樣

「唔⋯既然你話冇事，我就真係信你㗎啦⋯」我都係有啲擔心



佢係唔想我擔心，所以先唔講？

「不如⋯去上次間雪糕店食雪糕好唔好呀？」我提議道

「你唔洗番去做功課？」岑諾新問我，「啱啱你話你做緊功課。」

「唔急呀～係後日交嘅功課嚟，可以同你去食咗雪糕先，然後先再番屋企～」我對佢微笑道，「咁去唔去呀？」

「咁⋯你可以嘅話，我當然樂意。」岑諾新拉起我隻手就轉身行

望住佢嘅背影，我希望自己可以係一個值得佢依靠嘅人，希望可以為佢分擔

我仲未真係好了解佢呢個人，但我希望我以後會更加了解佢⋯



「岑諾新⋯！」我叫咗佢一聲，加快腳步行到佢嘅身旁，岑諾新佢望一望我，「有咩事，記得唔好一個人死撐落去呀⋯」

「知道。」岑諾新乖乖地回答我

我同岑諾新去到雪糕店，好像上次一樣企喺一旁食雪糕

「佢好似有開心番啲⋯」我留意到岑諾新臉上嘅表情好似寬容咗啲

岑諾新抬眼望向我，好似察覺到我望住佢一樣，我地對上視線後嘅第一反應，係相視而笑




IG Link: https://www.instagram.com/nd_cotttoncandy/?hl=zh-tw