［愛情純愛］既然忘記唔到佢，不如試下中意我⋯？: 116. 擔心

翌日朝早

我如常地起身梳洗換衫番學，不過今日我去到巴士站嘅時候，卻見唔到岑諾新

我企喺佢平時企嘅位等佢嚟嘅同時，都順手咁send咗個message比佢，話佢知我到咗巴士站

我偶爾望向佢平日行嚟巴士站嘅路，見到嘅係一個又一個嘅學生，卻見唔到岑諾新

「可能行緊過嚟？」我喺心裏講道，然後又望一望時間



岑諾新好少會遲到㗎喎⋯定佢先番咗學校？

應該又唔會呀～佢要番去先嘅話，琴晚應該都會同我講，佢又唔係啲冇交帶嘅人

我unlock咗手機，打開IG睇下佢睇咗我嘅message未

「唔⋯」我望住我send咗出去一陣嘅message，佢仲未睇

我望一望時間，其實都等咗一陣，都走咗班車啦已經，但佢仲未嚟到



平日同岑諾新一齊番學，佢一定會早過我到巴士站，就算有咩事佢遲咗出門口都會同我講聲

但今日，一個message都冇，什至連我send過去嘅message都冇睇

「打個電話比佢啦⋯」我拎起手機，搵到佢嘅手機號碼打過去

「嘟嘟⋯嘟嘟⋯嘟嘟⋯嘟嘟⋯」手機嘅撥號聲持續地響，即係話佢聽唔到電話啦

「唔通佢未起身？」我心裏講道，然後掛斷電話，再打一次比佢



「嘟嘟⋯嘟嘟⋯嘟嘟⋯嘟嘟⋯嘟嘟⋯你已被接駁到—」

我將電話掛斷，唔通佢唔舒服⋯？

我望一望手機顯示嘅時間，又望一望過嚟巴士站嘅路

「我番學校先啦」我send咗個message比佢

再miss咗呢班車嘅話，我應該會有9成左右會遲到，所以我唔等佢，但都同佢講一聲

今日自己一個人番學，好唔慣，平日都係同佢一齊，但突然間佢就消失咗一樣，冇睇message亦冇聽電話⋯

我一個人番到學校，推門入課室之際我望向岑諾新嘅座位

「佢真係未番嚟⋯」我喺心裏講道



望住佢空空嘅座位，我心裏都空盪盪的⋯

「今日你自己番嚟嘅？」詠妍行到我嘅身旁一臉好奇地問道，「唔同佢一齊番？」

「哦，係呀⋯」我將書包勾喺枱邊，拉開櫈坐低

「做咩咁嘅反應嘅⋯？」詠妍見到我嘅反應有啲愕然，然後小心翼翼地問道，「你地嗌交呀⋯？」

「吓？冇呀。」我聽到詠妍咁講嘅時候滿頭問號，「點解你會覺得我同佢嗌咗交？」

「咁你嘅反應完全就係講緊你同佢嗌咗交，所以先分開番嘛！」詠妍連忙解釋道

「我同佢冇一齊番係因為佢今日都冇出現喺巴士站啦⋯我都唔知佢喺邊⋯」我心裏有啲擔心，「冇嗌交。」



「哦⋯」詠妍點點頭，「可能佢唔舒服呢～」

「可能啦⋯」我拎出手機睇下佢覆咗我未，但一㩒到入去就見到係未讀，「佢連message都未睇⋯」

「你睇你呀～人地冇同你一齊番個學咋，你好似失去咗世界咁啦⋯」詠妍笑我講道

「又未去到失去世界嘅地步，只係有啲擔心啫⋯」我無奈地反一下白眼講道

唔知岑諾新做咩呢⋯佢唔通真係唔舒服？唔知佢點呢⋯

喺完咗早會之後岑諾新都未番嚟，我望一望佢嘅座位，心裏又出現嗰種空盪盪嘅感覺⋯

「大佬呢？」行到過嚟收功課嘅楊朗然望一望岑諾新嘅座位後問我

「唔知呀，唔舒服掛～」我聳聳肩



「竟然！？」楊朗然一臉訝異，「不過佢可能陣間小息就番嚟。」

「唔知，可能會掛⋯」我望向岑諾新嘅座位講道

上堂嘅時候我托住腮聽書，總係不自覺地望向我身旁嘅座位，岑諾新嗰係度，有啲提唔起勁嘅感覺

「唔知佢點呢⋯」我喺心入面講道，「唔知會唔會真係好似楊朗然講嘅一樣，佢小息就會番嚟？」

我耷低頭悄悄地拎出手機望咗一眼，打算睇雨岑諾新睇咗或者覆咗我嘅message未

「仲未覆⋯」我有啲失落地講道

我偶爾抬頭望向課室嘅時鐘，今日佢冇番學，時間就好似過得好慢咁⋯一堂45分鐘都過得好耐好耐⋯



「叮噹叮噹⋯叮噹叮噹～」

小息嘅鐘聲好快就響起，原來咁樣就上咗兩堂，咁樣就放小息

「你男朋友今日做咩唔番嘅？」坐喺岑諾新前面嘅希童一敬完禮就即刻行到我嘅座位，一臉好奇地問道

「唔知呀，佢唔舒服掛⋯」我拎出手機，螢幕上一條關於佢嘅message都冇，「我都唔知佢去咗邊⋯」




IG Link: https://www.instagram.com/nd_cotttoncandy/?hl=zh-tw