［愛情純愛］既然忘記唔到佢，不如試下中意我⋯？: 131. 炫耀

孫慧伶雙腳無力地坐低喺身後木櫈上

「我好似將佢拱手相讓比人⋯」孫慧伶自嘲般笑起嚟，細聲地自言自語道

孫慧伶一人沉思着，開始覺得係唔係一直以嚟自己太自以為是？以為岑諾新對自己嘅感情會一直存在⋯

「我真係失算啦⋯」孫慧伶嘅手托住額角，苦笑起嚟

孫慧伶緩緩地從裙袋中拎出手機，send咗一個message比一個人



X⋯X⋯X

「倩盈你唔好掛住睇手機啦！」希童伸手過嚟，一下就㩒我手機旁邊嘅鎖屏鍵

「咁等緊嘢飲嘛～」我望住黑色嘅手機螢幕，一臉無辜咁望向希童，「都冇嘢做⋯」

「你同我地一齊仲敢掛住人地！」樂恩輕輕地掐我嘅手臂一下

「我冇掛住佢呀！只係睇下手機咋嘛！」我心裏更無辜，佢地做咩要講到好似我一睇手機就係搵岑諾新咁



「都唔知佢有咩本事可以將你迷到咁⋯」希童淡然地望咗我一眼，然後沒好氣地搖搖頭，「除咗個樣好睇啲，個性格cool咗啲之外⋯」

「我都想知佢點樣將你迷住！」樂恩瞪大眼，一臉好奇咁望住我

「佢把聲好好聽⋯」我微微耷低頭，因為覺得咁樣講出嚟有啲唔好意思，講出口嘅同時我都覺得自己塊面熱辣辣，「好中意聽佢把聲⋯」

「救命呀⋯！」希童同樂恩頓時雙手抱臂打咗個冷震，詠妍都搖搖頭

「你兩個平時都係咁肉麻㗎？」詠妍一臉嫌棄地望住我，「真係起雞皮囉⋯！」



「唔會喎咁又，我地平時好少咁樣講嘢。」我雙手捧住自己嘅臉頰搖搖頭

「肉麻死真係⋯我差啲就要當場吐血身亡⋯」最受唔到肉麻事嘅希童攬住樂恩，哭喪著臉講道

我見住佢地嘅反應，我心裏都有啲怕羞，我同岑諾新平時真係唔會咁講嘢，好少會講到咁樣，不過今日晏就肉麻咗一次

「只係炫耀一下，我有一個又靚又可愛嘅女朋友。」

腦海中忽然閃過佢今日同我講嘅一句

聽到嘅瞬間，我嘅心臟頓時用力地收縮咗一下當然唔係因為佢把聲好聽，更加令我心動嘅係佢向其他人炫耀我

被自己中意嘅人向身邊嘅人炫耀自己，感覺好似一種認同一樣，比佢認可

「你又偷笑啲咩呀？」詠妍一下子攬住我嘅膊頭



「我邊有偷笑呀？」我無奈地反一下白眼

「仲話冇！？」詠妍戳咗我嘅臉頰一下，「嘴角含春，春風滿面咁！」

「邊有呀！你睇錯一定係！」我撥開詠妍隻手

「唉～見你宜家咁開心，我都替你高興～」詠妍雙手攬住我，下巴靠喺我嘅膊頭上

我望向詠妍，詠妍抬眼望我，我不禁莞爾，詠妍最關心我，我嘅開心唔開心都會同詠妍講，我同詠妍之間就係咁樣冇秘密

「我同佢一齊好開心啦～」我微笑道，「你唔洗擔心。」

詠妍同我對望，佢知道我嘅想法一樣，隨即微微一笑點點頭



⋯

我地買完嘢飲之後落咗銅鑼灣行一陣，主要都係周圍睇下行下

差唔多行到傍晚嘅時候，我地先喺地鐵站前分別

「你同樂恩搭咩車番去呀？」詠妍先開口問道，「巴士定地鐵？」

「我地搭地鐵番去順路啲近啲。」樂恩指一指巴士站

「好啦，咁我地番學見啦～」我同詠妍向佢地揮揮手，佢地轉身行入地鐵站

我同詠妍兩個人去搭巴士番屋企，咁樣開心嘅一日又完咗，番到屋企之後又會打回寧靜

「坐後啲啦～」我回頭望一望詠妍，我同佢啱啱行到上層，我行喺前面朝比較後嘅座位行去



「Okay～」詠妍回答

我坐喺入面窗邊嘅位置，詠妍坐喺走廊隔離，反正陣間都係詠妍先落車

「宜家番屋企啦～」我喺IG影咗張相send比岑諾新，同佢講一聲

「佢要你同佢報到㗎咩？」詠妍望住我嘅手機螢幕，然後移開視線，望住我笑一笑

「唔係呀～只係我單純地想同佢講一聲。」我望住手機螢幕微微搖頭

我就係想同佢分享，想話比佢知今日發生咗咩事，今日見到啲咩有趣嘅事，同詠妍佢地一齊嘅時見到啲咩搞笑嘢，單純地想話比佢知喺冇同佢一齊嘅時候我嘅見聞

「宜家諗番，覺得之前嘅自己好傻⋯」我對詠妍講道，「為張景彥一個唔值得嘅人傷心咗咁耐⋯但講真，唔係因為張景彥嘅話，我都唔會同岑諾新一齊⋯冇你嘅話，我都唔會嘗試同岑諾新一齊⋯」



「嗯！」詠妍用力地點一下頭，「做人要向前看，你唔可能為佢停留喺原地，更重要嘅係佢都唔值得你咁樣等佢。」




IG Link: https://www.instagram.com/nd_cotttoncandy/?hl=zh-t