［愛情純愛］既然忘記唔到佢，不如試下中意我⋯？: 135. 好像輸了⋯

「冇嬲囉⋯！」我沒好氣地反一下白眼，「我似咁小氣嘅人咩？人地交個功課都要嬲⋯」

「點知你會唔會真係嬲？」岑諾新企起身，佢應該打算去開locker

我都頓時企起身，將我張櫈拉番去自己嘅座位，然後跟喺佢身後行到去locker嗰邊

我跪喺locker前，打開locker嘅門，望一望貼喺門上嘅時間表，先拎咗頭兩堂要用嘅嘢，陣間小息再拎

我蹲喺地上悄然抬頭望向企喺離我唔遠嘅岑諾新，岑諾新將一本又一本嘅書拎出嚟抱喺懷中



岑諾新高高大大的，身上有陣清爽嘅香味，樣又生得好睇，就算係側面都好好睇⋯喺旁邊睇，可以見到佢明顯嘅喉核，我不禁吞咗一啖口水，一定唔可以比佢知我諗咩⋯！

岑諾新閂上locker嘅門，我頓時將視線收回，心裏有啲小緊張，但都要若無其事咁伸手去拎書

佢從我身後行過行番埋位，喺佢行過咗我之後，我先敢偷偷地回頭望向佢

喺望向佢身影嘅一瞬間，我嘅心跳瞬間漏一拍

「一個咁型嘅男仔，係我男朋友⋯！」我喺心裏激動地講道，「嘻嘻⋯」



一諗到呢度就忍唔住偷笑，嘴角都自動上揚

⋯

阿sir提起白色粉筆，喺黑板上寫下兩道一樣嘅數學題

「又要叫人出去答呀⋯」我喺心中默默抱怨，然後懇求道：「唔好叫我唔該⋯」

「蔣倩盈，陣間出嚟做左邊呢題。」阿sir朝我叫咗一聲



「嘖⋯」我耷低頭喺心裏嘖咗聲，「明知我數學麻麻仲叫我⋯」

「比五分鐘你地計。」阿sir行到課室嘅時鐘前望住時鐘講道

我小心翼翼地計清楚每一個步驟，確保唔會出咩大錯，陣間出去黑板寫答寫嘅時候，寫錯就搞笑啦⋯

「Okay，你地兩個出嚟喺黑板寫答案。」阿sir對我同另一個女仔講道

我無奈地拎起堂課簿起身，側一側身行出座位

正當我將左腳從櫈腳同枱腳間嘅小縫抽出嚟嘅時候，被枱腳絆咗一下

「哐—」枱移動嘅聲音喺寧靜嘅課室中顯得格外響亮

岑諾新見得絆到微微向前傾嘅一刻，佢迅間伸手出嚟打算扶我，但還好我企得穩，我嘅左手用力地㩒住枱邊



岑諾新默默地收番手，我連忙行出去黑板前，拎起粉筆寫低答案，將所有步驟一個不漏地寫低

我放低粉筆喺黑板前，然後轉身行番埋位

喺行番埋位嘅路上，我同岑諾新對望咗一眼，岑諾新比我先將視線移開

「唔知佢諗緊咩呢～」我喺心中偷偷地笑咗一笑，不禁悄悄地猜想佢嘅心思

我坐低喺自己位，托住下巴聽阿sir講書

我嘅目光總會不禁神不知鬼不覺地落喺岑諾新嘅身上，眼見佢專心聽書嘅認真模樣，我本檢平穩嘅心跳都會忽然間漏一拍，用力地收縮一下

「叮噹叮噹，叮噹叮噹⋯」



轉堂嘅鐘聲響起，阿sir連忙講埋最後一題，然後就落堂，接住落嚟嘅一堂係中文堂

岑諾新喺敬完禮之後，跟喺阿sir身後行出課室

我偶然抬頭望向窗外，見到孫慧伶行喺岑諾新嘅身後

孫慧伶忽然間彎下腰，再似企好嘅時候追上岑諾新嘅步伐，輕輕地拍一拍岑諾新嘅膊頭，我只見到佢有伸手遞嘢比岑諾新嘅動作

孫慧伶自然地同岑諾新搭話，講咗兩句

坐喺位嘅我默默耷低頭，疊好數學書同數學堂課收入櫃桶，然後拎出中文書同筆記放到枱上

有時我不禁會諗，孫慧伶好大嘅本事，無論係岑諾新又好，張景彥都好，都對佢一副死心塌地嘅模樣⋯

孫慧伶嘅性格好，外向又活潑，外表同笑容都好睇，有時拎自己同佢做比較，覺得自己好似明明咩都冇輸，但又好似輸咗比佢一樣



「孫慧伶佢就係唔一樣呀⋯」我喺心中講道，心底裏有啲不忿、有啲不安

「倩盈，你同唔同我地食lunch呀？」希童行到我嘅旁邊問道

「好呀⋯」我回神過來抬頭望向希童，我微微點頭

「Yeah～咁我地今日食你上次話想試嗰間餐廳呀～」希童高興地拉住我隻手講道，「你上次想食嗰間日本嘢～」

「好呀⋯」我見到希童咁開心，我都笑一笑回應佢




IG Link: https://www.instagram.com/nd_cotttoncandy/?hl=zh-t