［愛情純愛］既然忘記唔到佢，不如試下中意我⋯？: 137. 權利

放學嘅時候，岑諾新一早執好書包企喺我隔離等緊我

「行得啦⋯」我孭起書包，抬頭望咗佢一眼

我行喺岑諾新嘅前面，喺行到出走廊之後，岑諾新追上我嘅步伐，行喺我嘅右邊

「你唔開心呀？」岑諾新嘅上身前傾探頭望我

「冇呀。」我望向佢，若無其事咁搖搖頭



「冇？」岑諾新輕皺起眉頭，「你食完飯番嚟之後就冇咁冷淡對我嘅？」

「我冷淡？冇呀～」我頓時擠出笑容，拉開話題，「冇冷淡呀～冷淡得過你平時對我？」

「我對你有好冷淡咩？」岑諾新噗一聲就笑咗出嚟

「冇咩？」我微笑道

我扮咩事都冇發生一樣對佢微笑，就好似晏就嘅事我完全冇放喺心上，完全唔介意一樣



我同岑諾新好似平時一樣行到去巴士站等車，我望住遠方睇下巴士嚟未，同時迴避着岑諾新嘅視線，我怕佢睇穿我嘅小心事⋯

「嚟緊呢，Physics有份細project⋯」岑諾新忽然間開口講道

我回頭望向佢，見到岑諾新直勾勾地望住我，想開口講啲咩，但又冇講出口

「嗯⋯然後？」我微微側一側頭，「唔可以日日一齊放學？定⋯咩呀？」

望住岑諾新對我欲言又止嘅模樣，我心裏有一份不安嘅感覺一閃而過



「四個人一組⋯因為係阿sir抽籤嚟分組⋯」岑諾新有啲緊張咁望住我講道，我直勾勾地講住佢等佢開口，「我嗰組有孫慧伶⋯」

「唔⋯Okay～」我微微點頭，然後默默地將視線移開，果然我心裏嘅不安感係啱

巴士剛好嚟到，停低喺站前，我先一步上車行到上層，行到後排嘅座位坐低喺靠窗嘅位置

「我冇辦法呀⋯今日阿sir講嘅時候都幫我地分好組，唔係我揀同佢一組⋯」岑諾新坐低喺我隔離探頭望住我

「我知啦！」我伸手挽住佢嘅手臂，「我Okay呀！」

「真係？」佢半信半疑地望住我

「真係～」我點點頭，用毫無破綻嘅語氣講道，「又唔係你揀同佢一組嘅，我明白㗎啦～」

「唔⋯」岑諾新面對我嘅輕鬆，仍然有啲猶疑



「你幾時開始同佢地一齊做呢個project？」我問道

「一個半星期後交，應該呢幾日？」岑諾新自己都有啲唔肯定

「哦好呀～你要唔要我等埋你？」我笑問道，「如果你地放學留喺學校做嘅話，我可以等埋你。」

「你想嘅話梗係可以。」岑諾新嘅手放到我下巴，然後掐住我兩邊臉頰

我笑嘻嘻地將下巴靠喺岑諾新嘅膊頭上，微微側着頭望住佢

岑諾新湊近我，唇輕輕地碰喺我嘅額頭上

我望向佢甜甜一笑，我中意呢一刻嘅甜蜜，亦擔心着呢份甜蜜⋯



「到時我知道幾時要留低做嘢再話你知。」岑諾新對我講道，我微微點頭，「應該唔會好多日，都係考試前嘅一個細project。」

「我知啦！」見到佢擔心我誤會而向我解釋清楚嘅模樣，我心裏一暖，「可以等到你嘅日子我都等你啦！」

我坐好起嚟定睛望住佢，岑諾新見我眼都唔眨咁望住佢，佢一臉困惑咁望住我

「做咩？」岑諾新嘅聲線都充滿咗滿滿嘅困惑

「冇呀，就係想好好咁望下你。」我笑住拖住佢隻手講道，「靚仔嘛，就係令人想望多兩眼～」

岑諾新沒好氣地笑了笑，伸手輕輕地捏咗我嘅臉頰一下

「怕咗你⋯」岑諾新掐住我兩邊臉頰，沒好氣地笑道，「口甜舌滑⋯」

「講事實咋嘛～」我將佢嘅手臂緊緊地抱住



我收起心入面嘅不安，亦唔願意喺佢面前提起孫慧伶，我嘅心底裏，始終都係怕⋯

見到佢同孫慧伶走近，我先發現原來自己好怕佢會番去孫慧伶嘅身邊⋯之前我冇咁嘅想法，大概係因為嗰段同佢一齊嘅日子太開心

明明Lunch嗰陣見到佢同孫慧伶企埋一齊時，我有權上前搵岑諾新，詠妍佢地嘅說話都令我想要上前宣示主權

但我嘅雙腿卻好似黏喺原地一樣，一動不動⋯

當下我諗緊啲咩⋯？呀⋯我諗緊「如果行到過去，見到岑諾新對孫慧伶嘅溫柔，點算⋯？」

嗯，點算⋯？所以，我冇鼓起勇氣踏出一步⋯搞到宜家好似一個大傻瓜一樣，獨自面對呢種感覺，連對岑諾新講一句真心話嘅勇氣都冇⋯

我同岑諾新拖住手行番屋企，我就好似平時一樣同佢講關於晏就食lunch嘅事



「我番到啦。」我望咗自己住嘅屋苑一眼，然後望向岑諾新，「唔⋯咁我地星期一見嘛～」

「嗯，好。」岑諾新微微點頭，下一秒就伸手拉我入懷中




IG Link: https://www.instagram.com/nd_cotttoncandy/?hl=zh-t