［愛情純愛］既然忘記唔到佢，不如試下中意我⋯？: 154. 不想迴避

我望住孫慧伶嘅手機螢幕，我不斷同自己講地圖都可以出錯，唔代表佢真係同張景彥一齊

「佢真係同張景彥做番朋友，係我同張景彥分手前，張景彥講比我知。」孫慧伶又道，「冇人可以同Ex做番朋友，一係完全放低，一係心入面仲有個Ex，咁你覺得蔣倩盈係邊種⋯？」

心入面有張景彥⋯我好似已經預判咗佢係中意張景彥一樣⋯

無可否認嘅，係連我自己都覺得，佢心入面係有張景彥嘅存在⋯

「你可以唔信我，但你明明自己都知道事實，點解唔信？」孫慧伶又道



我冷冷地望咗孫慧伶一眼，然後直接離開呢個休憩區

我只想問清楚蔣倩盈，佢心入面係唔係真係仲有張景彥，我今日只係想同佢講清楚我係中意佢，唔想佢為最近嘅事耿耿於懷，想明確咁講比佢知，我中意嘅係佢

我拎起手機打電話過去比蔣倩盈，佢到底去到邊？

X⋯X⋯X

我拎起正在響嘅手機，見到來電顯示上寫住「岑諾新」，我猶疑咗一下，應唔應該聽電話⋯？



我猶疑咗一陣之後，岑諾新掛斷咗電話，我不禁鬆一口氣，但過咗兩秒後，手機又響起嚟

今次我接咗電話，我㩒咗接聽之後將手機放到耳邊

「喂？蔣倩盈你喺邊呀？唔係話公園等咩？」手機裏頭傳嚟岑諾新嘅聲音

「哦⋯sorry，啱啱有啲頭痛，唔小心瞓著咗⋯」我無力地講道

對面靜咗落嚟，我冇辦法講出「其實我啱啱有嚟」之類嘅說話⋯太傷自己心⋯



「咁⋯你好好休息啦⋯」岑諾新講道

「嗯⋯拜拜⋯」我講咗一聲之後將電話掛斷

如果唔係我啱啱親眼見到我都唔知，原來係你嘅心入面真係真係有孫慧伶嘅位置⋯你一直以嚟都偽裝得太好⋯

我用力地深呼吸，諗緊嚟緊我應該點做好⋯啱啱嘅一幕烙喺我嘅腦海中，心裏好難受⋯

「好彩今日係星期五⋯」我灘喺床上細聲地講道，「嚟緊兩日都唔會見到⋯」

我人唔攰，但心好攰⋯

⋯

到咗夜深人靜嘅時候，我同詠妍兩個人傾電話，我對詠妍訴苦，講出我今日見到嘅所有事



「我宜家要點做⋯我要點樣同佢一齊⋯我唔知⋯」我一口氣講咗三句，都冇比自己換氣嘅時間，「佢咁樣都好明顯啦係唔係⋯？」

「嗯⋯」詠妍或者因為唔知可以再講啲咩嚟安慰我，只好輕嗯一聲回答

「我可以點呀？」我問詠妍，想詠妍比一個解決方法我，比一個答案我

「我點知你可以點⋯？」詠妍嘅遲疑，顯然地係佢唔想講比我知佢嘅想法，「你自己想點樣？繼續？定⋯分開？」

「我同佢，係唔係應該分開⋯？」喺我咁樣諗嘅同時，詠妍就講出「分開」兩個字

「我唔知嘅話，我可以當咩事都冇發生，但我今日親眼見到⋯」我深深地嘆一口氣，內心全是糾結，「我、我⋯唉⋯我冇辦法當自己咩都冇睇到⋯！」

「你冷靜啲先啦⋯」詠妍擔心地講道，「宜家重點在於你可唔可以接受，你之前可以接受佢心入面有孫慧伶，咁梗係啦～你嗰陣都未中意佢！但宜家唔係嘛，你可以接受佢同你一齊，但心入面係孫慧伶？你可以？」



「唔可以⋯！我唔可以⋯！」我托着額搖搖頭講道，「我做唔到隻眼開隻眼閉！」

「如果你係想同佢分開，咁咪同佢分開囉～」詠妍講道，「或者分開對你同佢都係好事呀～」

好事嗎？都係嘅⋯我同佢分開，佢可以揀番孫慧伶，我亦唔需要當自己咩都唔知⋯

「倩盈，如果喺你心入面，想同佢分開，還佢自由嘅想法佔得多啲，咁就分開啦⋯」詠妍講道，「你唔可以一直都咁大方，上次你對張景彥大方，最後係咩下場？你係唔係要再試一次？」

我聽住詠妍嘅說話，我都不禁諗到底我自己心入面係點諗

呢一刻嘅我嘅大腦中，最多嘅想法係，同佢分開嘅話，對我同佢都比較好

或者我會傷心，但一個人傷心總好過兩個人一齊難受，佢心入面係有孫慧伶，我感覺到⋯

我應該要喺感情未到好深嘅時候放手，至少我唔會真係遍體鱗傷⋯



我唔想再好次之前同張景彥一齊咁樣，要一直好似駝鳥一樣迴避問題，當自己睇唔到唔知道⋯

「倩盈，對自己好啲，你考慮清楚。」詠妍提醒道

「嗯⋯我知道啦⋯」我講道，「我都想對自己好啲⋯」

⋯

喺星期六日兩日，我都冇點搵過岑諾新，只係默默地考慮着之後嘅事

我唔知我要點樣繼續同佢一齊，真係⋯

星期一嘅來臨對我嚟講係一個令我緊張嘅日子，因為我已經做咗我嘅決定⋯



我同岑諾新一齊放學番屋企，落咗車之後佢輕輕地拖住我嘅手，眼見佢嘅主動，我好似都冇咗以前嘅心動，剩下嘅都只係心痛⋯




IG Link: https://www.instagram.com/nd_cotttoncandy/?hl=zh-t