［愛情純愛］既然忘記唔到佢，不如試下中意我⋯？: 159. 一場夢般的戀愛

考試嘅最後一日

「夠鐘，停筆。」監考老師嘅一聲「夠鐘」，我心裏頓時鬆一口氣，覺得好輕鬆

兩個星期嘅重擔都放低晒啦⋯！考完試，就係可以輕鬆去玩嘅時候啦～

大家執好自己嘅嘢，我同詠妍佢地一齊走，難得考完試，當然要好好咁去慶祝一下啦～

「嘩～考完啦～」希童一踏出學校就興奮地講道，「好快就放暑假啦～」



「仲有成大半個月先散學禮⋯咁快就諗住暑假？」我不禁笑道

我同詠妍佢地經過巴士站，我見到岑諾新喺巴士站等車，孫慧伶行到巴士站，同岑諾新搭起話嚟

我默默地耷低頭，當自己咩都冇睇到，咩都冇發現到

「我諗嚟做咩⋯我同佢都分咗手⋯」我喺心裏提醒自己講道，「在意嚟做咩⋯？」

我同詠妍佢地一齊去到餐廳食嘢，佢地話要食番餐好嘅



「倩盈你話呢？你話我地嚟緊嗰幾日假期去邊度玩好呀？」樂恩問我

「呃⋯冇所謂呀～去邊都可以呀～」我笑一笑講道

我講完之後，佢地幾個都靜咗落嚟你眼望我眼，然後又望向我

「我真係冇所謂啦～去邊都可以啦～」我笑一笑又講道

「唉～考完試啦！開心啲啦～我地都喺度！」樂恩先開口講道



「咩呀？」我裝作自己咩都唔知，擠出笑容問道，「我冇唔開心呀～」

「扮呀你，繼續扮⋯」坐喺我隔離嘅詠妍輕捏咗我嘅手臂一下，「係中意人嘅，咪同佢講囉～」

我嘅笑容瞬間塌咗落嚟，佢地一早就知，一早就睇穿我嘅小心思⋯

「嗯⋯」我微微點頭，「睇定啲先啦⋯」

「佢又未必真係會同番孫慧伶一齊，其實佢當初都冇講過佢仲係中意孫慧伶。」詠妍忽然間講道

「嗯⋯」我漫不經心地嗯咗一聲回答道

「你仲中意佢，但做咩唔問清楚佢就同佢分手？」樂恩不解地問道，「聽你之前嘅講法，其實佢真係冇承認佢中意孫慧伶。」

「你要唔要試下搵個時間同佢講？又或者問清楚佢？」希童對我提議道



「唔知⋯再諗下先再算⋯」我猶疑地講道

我一個人番到屋企之後諗咗好耐，希童佢地個個都提議我搵岑諾新問清楚，但我同岑諾新都已經分咗手，宜家問完又可以有咩改變⋯？

「當發咗場夢算啦⋯」我頹廢地灘喺床上，「如果我同佢係冇可能，咁點都唔會有可能⋯」

⋯

今日係散學禮，聽日就係暑假嘅來臨，雖然今個暑假應該一定要番嚟補課，下年就係中六啦，話比你知唔洗補課就係假嘅⋯

考完試嗰日希童佢地叫我問嘅嘢，我都係冇問出口⋯我揀咗順其自然⋯

喺朝早番到學校，我同詠妍佢地一齊喺小食部買咗份三文治早餐喺課室食



「我怕陣間我又要悶到瞓著⋯」樂恩靠喺希童嘅膊頭上

「有啲想去廁所⋯去個廁所先⋯」我起身同時拎埋已經飲完嘅飲品盒

「哦好呀～」詠妍望一望我

我經過垃圾桶時順手地將飲品盒掉到垃圾桶中，然後先行出課室

X⋯X⋯X

孫慧伶一大清早番到嚟就叫咗我出去話有嘢要同我講

「你想點呀⋯」我無奈地講道，下意識望一望身後嘅樓梯有冇人上嚟

「你真係唔考慮同番我一齊？」孫慧伶單刀直入地問道，佢完全冇打算掩蓋佢嘅意圖



「唔考慮。」我果斷地回答道，「你問我幾多次都好，我都係唔會考慮。」

「點解？」孫慧伶一臉不忿地問道，「你要我點做，先同番我一齊？」

孫慧伶喺我面前卑微嘅模樣冇令我心軟，當初我中意佢嘅時候，係佢唔中意我，係佢先放棄，憑咩要我一直等佢？

「我都話我唔會同你一齊，你唔洗做咁多嘢。」我直接地講道，「你咩都唔洗做，就算點都好，我都唔會同番你一齊，就係咁。」

孫慧伶唔忿氣，係因為佢以為佢咁樣一直纏住我，話比我知佢仲中意我，我就一定會同番佢一齊

但可惜，我真係冇打算要再同佢一齊⋯就算我同蔣倩盈真係分咗手，就算蔣倩盈中意嘅人係張景彥都好⋯我唔會再同番孫慧伶一齊

我冇心情再聽孫慧伶講落去，我要講嘅嘢已經講晒，亦好明確咁表示咗比佢知我嘅選擇



我無視佢直接行番課室坐低喺位睇手機，等待陣間散學禮嘅來臨

暑假嚟啦⋯今年發生咗好多事一樣⋯

張景彥同孫慧伶一齊啦，我同蔣倩盈以傾訴對象嘅方式有名無實咁一齊⋯

後來我地決定試下真係中意對方，真正咁喺埋一齊，過咗一段甜蜜又快樂嘅時光⋯

但最後，我同佢都係分開咗⋯佢揀咗同孫慧伶分咗手嘅張景彥⋯

今年發生嘅事，想唔記得都難⋯




IG Link: https://www.instagram.com/nd_cotttoncandy/?hl=zh-t