到到第二天,Miss Lui起身到洗手間時依稀見到李乘風還在tatami上睡覺,不過當她裝身完畢從房出來預備出門口的時候,卻看見李乘風已弄好一份精美的餐蛋治放在餐枱上正等待著她。
 
「知你趕住出門口,所以整啲簡單嘢比你做早餐。」看見Miss Lui李乘風笑著說道。
 
「你跛咗隻手就唔好攪咁多嘢啦! 一陣又整親呀…」但Miss Lui就生氣地說。
 
李乘風:「咁住喺度打擾咗missie你,都想做返啲嘢唔好白食白住嘛,唔係我會好唔好意思㗎…」
 
「唔好意思都留返你好返晒先補償啦,一陣又整親就麻煩… 依家乖乖地休息早日康復等Missie照顧你係最好,應承我唔好再做哩啲嘢直至你好返,得唔得?」Miss Lui轉用柔和的軟功。
 


「哦…」李乘風只好答應。
 
「乖喇,Missie走喇,今晚見~」說完Miss Lui一手拿走了三文治後便出門去
 
看見Miss Lui最後有拿到自己的三文治,李乘風心裏還是甜甜的。
 
 
如是者過了數天的一晚,當Miss Lui和李乘風在家吃晚飯的時候,大門突然被打開然後一個一身空姐裝束的女性出現在她們眼前。
 
「家寶,我返嚟喇~」一入屋這位女性便大叫。


 
「返嚟喇Daisy? 你真係永遠玩surprise㗎喎…」Miss Lui回應。
 
「就係想比surprise你嘛~ 放心啦,等你有男朋友嗰陣我就唔會咁㗎喇,費事破壞你嘅好事嘛,嘻嘻~ 咦,哩位同學係咪就係傳說中嘅李乘風?」注意到李乘風的存在Daisy問道。
 
「係呀,之前同你提過,佢會喺度暫住兩星期。李乘風,哩個就係我大學同學Daisy,同我一齊住喺度㗎,我之前同佢交待過點解你會出現喺度㗎喇。」Miss Lui為他們二人介紹。
 
「你好呀Daisy姐。」李乘風禮貌打招呼。
 
誰知是換來是頭頂承受一下重擊。


 
「你阿媽無教你叫後生女嗰陣唔好加個姐字落去?」Daisy敲了李乘風頭頂一下說道。
 
「對唔住,不過我阿媽唔喺度喇…」想起媽媽李乘風略帶傷感說道。
 
「噢,係喎唔記得咗添... Sorry呀 咁算啦,不過以後叫我Daisy得喇~」聽完Daisy下了氣略帶抱歉說道。
 
「好喇,你快啲換衫出嚟一齊食啦,我地咁啱都食唔晒啲嘢… 李乘風你唔駛理佢㗎,佢份人係咁傻傻地...」Miss Lui插嘴緩和下氣氛。
 
Daisy伸了一伸脷應了聲好便拿著行李回自己房間換衫。
 
作為空姐,Daisy樣貌討好,身形屬嬌小玲瓏形,很快,一身睡衣裝束的Daisy重現眼前並坐到餐枱處和他們一起吃晚飯。
 
「家寶,講個好消息你聽呀~ 今次飛我識咗個男仔要先你一步出pool喇~」不久Daisy一臉興奮說道。
 


「講詳情嚟聽下~咩人嚟㗎?」Miss Lui好奇地問。
 
「佢叫David,係今轉飛去澳洲嗰陣識㗎,好靚仔又健談,喺機上識咗交換咗電話我地當晚就喺澳洲約咗出嚟食飯,然後好快就一齊咗咯~ 等佢返嚟香港後我介紹你識呀~」Daisy散發出熱戀中的氣息說。
 
Miss Lui:「嘩,真係好快喎! 不過你對靚仔嘅免疫力不嬲係零嘅~ 會唔會係壞人嚟㗎? 有無相? 睇下有幾靚仔? 」
 
「梗係有~」說完便在手機show了一張相給Miss Lui看。
 
「鄭子誠!?」Miss Lui一看發現竟然是之前和李乘風在餐廳上碰見的小學同學。
 
「你識佢?」Daisy意外地問。
 
Miss Lui:「係呀,我小學同學嚟㗎,上次同李乘風喺出面食飯先撞返佢,不過之前都好耐無見lu…唔怪得啦,佢小學已經好得女同學同女老師歡心~」
 
Daisy:「世界真係細! 你地本身都識咁嚟緊一定要叫佢上嚟聚下啦!」


 
「好~ 不過等李乘風好返返返屋企先啦,比人見到唔係咁方便…」Miss Lui說出了自己的顧慮。
 
「Okok! 係喎,掛住講自己嘢忽略咗你個寶貝學生添! 聽Miss Lui 講你文武全材人又靚仔係學校嘅風頭躉嚟㗎喎 ~」Daisy順勢轉了話題。
 
「Miss Lui你真係咁講?」李乘風帶點臉紅,又有點開心問Miss Lui道。
 
「你聽佢亂up啦!」Miss Lui臉也有點紅然後怒啤了Daisy一下。
 
「你話無咪無囉~ 咁你隻手點呀? 要幾耐先好返?」Daisy望著李乘風身上的支架問道。
 
「本身五星期,不過前排發生咗啲意外又變返六星期~」李乘風一邊望著Miss Lui一邊笑答道。
 
Daisy:「點解嘅?」
 


「你唔好咁八掛快啲食啦!」害怕李乘風亂說話Miss Lui再制止她。
 
「做咩咁惡啫! 唔緊要,明天等佢返咗學後我地慢慢傾偈~」Daisy望向李乘風扮細細聲說道。
 
「邱美恩,你唔好亂講嘢呀下…」Miss Lui聽到後再度咆哮。
 
「放心啦~你咁好邊有嘢比我亂講啫~」
 
晚飯便在打打鬧鬧的環境下結束。
 
 
「你食咗嘢未? 駛唔駛整埋嘢比你食?」第二天,李乘風早已吃完Miss Lui一早為他預備了的午飯正在看電視時,Daisy這時才斯斯然起床然後問他。
 
「我食完好耐喇,Miss Lui知你實訓得晏,一早整定咗你嘅早餐喺雪櫃,叮返熱就食得喇。」李乘風答道。
 


「家寶真係太好喇~ 第日娶到佢嗰個一定好幸福!」Daisy一邊說一邊走到雪櫃。
 
「我都覺~」李乘風下意識接了嘴﹐Daisy聽到後望了望李乘風然後暗笑了一下。
 
「李乘風,過嚟陪我食傾下偈呀~」拿著熱辣辣的”早餐”坐到枱前,Daisy向李乘風說。
 
「哦,好…」李乘風答應了一聲便從tatami走到飯枱坐下。
 
「點呀,喺度住得慣唔慣呀?」Daisy一邊吃一邊問。
 
李乘風:「幾好呀,係平時有啲悶…」
 
Daisy:「你又唔出得街無辦法啦,不過就快星期到六日家寶唔駛返學應該可以陪下你嘅~」
 
「我都希望快啲到星期六日~」李乘風露出期待的眼神。
 
「喂~老老實實,你係咪鍾意我家家寶?」Daisy突然爆出一個問題。
 
「下? 點解咁問? 」李乘風有點吃驚地問。
 
「我問你問題唔好問返我轉頭!」Daisy並沒答他強硬地追問。
 
「嗯…」李乘風受Daisy威嚇有點怕醜,望了望Daisy然後臉紅紅低下頭應了一聲。
 
「我果然無睇錯! 依家啲學生真係早熟~ 仲要鍾意missie添…夠刺激!」Daisy露出了一副食花生等睇戲的樣子。
 
李乘風:「咁Miss Lui真好好嘛…」
 
Daisy聽到後望了望李乘風,然後說道
 
「其實你了解佢有幾多? 你知唔知佢有咩過去?」
 
李乘風:「唔知呀…你可唔可以話我聽?」
 
Daisy:「咁不如你先話我聽你點解鍾意Miss Lui?」
 
「嗯… 其實自從我媽咪走咗後,我就覺得好孤獨,晚晚得返自己喺屋企,Miss Lui知道咗後好好,每星期都會搵晚陪我食飯,有時總會專登上嚟煮比我食等我可以感受下家嘅溫暖,然後因為發生咗一啲事,我開始唔再純用老師嘅角度去睇佢,跟住就發現Miss Lui除咗靚同心地好好外,佢個人仲好真好爽朗同埋好識照顧人感受,同佢相處好開心好舒服,慢慢就發覺自己越嚟越鍾意佢… 我好想可以好好咁疼錫佢比幸福佢照顧佢一生一世呀! 當然我知以我依家嘅能力同年紀,暫時係無可能做到啦…但我信總有一天我會可以!」
 
看見李乘風越說越認真,Daisy不禁想起之前Miss Lui在家和她說起李乘風時候的狀況。

「Daisy我講你聽呀,我班有一個真正集所有優點於一身嘅學生呀,文武全才,高大靚仔,性格總要好到無得頂,真正唯一嘅缺點就係無缺點!」

「Daisy,原來世界真係公平㗎,上次同你講嗰個學生,阿爸一早死咗,依家阿媽啱啱都過埋身,以後都得返佢自己一個,見到都好心痛呀…」
 
「Daisy,我近排留意到班上原來好多女仔都鍾意李乘風㗎,不過都正常嘅,我如果係學生都會鍾意佢,就好似嗰陣嘅阿威咁… 我諗緊幫佢物色返個女朋友等佢唔駛一個人咁孤獨,不過暫時睇好似無乜邊個夠好,好似個個都有啲缺點咁...你都嚟幫下眼睇下邊個同佢襯呀~ 」
 
「Daisy,今日陸運會李乘風衝線嗰陣pk跌咗落地斷咗條鎖骨...個傻仔因為應承咗我一定要贏結果因為咁壓線壓到失晒平衡,你話佢係咪傻呀,完全唔識保護自己!」那時Miss Lui雖然嘴裏一直鬧,但看得出她的嘴邊卻是微微向上揚。
 
也許未必是鍾意,但她應該還沒察覺自己對李乘風已經不像只是把他當成自己的學生吧。
 
(或者你真係幫到家寶都唔定...)
 
「明白...不過事關家寶自己嘅私癮,我唔方便講你聽,只可以講Miss Lui曾經受過好大嘅傷害,要佢忘記去接受一段新嘅感情唔係咁易,對像仲要係你哩個中學生就更加難... 所以如果你頭先講嘅嘢係認真的話,就真係要加倍努力先得喇...」Daisy回想完後說道。
 
「我會努力! 不過你識咗Miss Lui咁耐,會唔會都有提示可以比下我?」為了目標李乘風繼續追問。
 
Daisy:「睇在你幾靚仔又幾乖,醒你幾句啦~ 家寶係一個好重感情又好敏感嘅人,所以一字記之曰 “心”,用你嘅誠意去感動佢啦,然後,我相信有日佢會願意同你講佢嘅過去。」
 
李乘風:「我明白喇,多謝你呀Daisy~」
 
「我都希望有日家寶可以搵到個錫佢嘅人重新出發…」Daisy語重心長說道。