“叮噹”
 
「乘風哥哥你行得未呀? 咁慢㗎!」李乘風一打開門便聽見欣欣搓腰在抱怨。
 
「行得喇行得喇,欣欣今日著得好靚喎~」李乘風拿了背囊穿好鞋便和欣欣離開了自己屋企,而欣欣今天明顯經過悉心裝扮。
 
「因為今日可以同你去玩梗係要著得靚啲啦~」欣欣直接拖著李乘風繼續行。
 
由細到大,每次和李乘風出街欣欣都習慣拖著他行,就像哥哥拖著妹妹一樣。雖然隨著年紀漸大,李乘風也曾覺得或許需要避忌一下,不過看見欣欣一臉輕奮把自己拖得很緊,也就由她繼續拖以免顯得生分掃她興了,始終他真的把她當成是自己的親妹妹般疼錫。
 


「呀,唔記得咗同你講,今日臨時有位同學想join我地一齊去廸士尼呀。」在𨋢內李乘風突然醒起說道。
 
「邊個? 女仔嚟㗎?」本來十分興奮的欣欣聽到後笑容突然僵了一僵,但很快又回復原狀。
 
李乘風:「係呀,佢叫周紫盈,之前乘風哥哥整親佢喺學校幫咗我好多㗎。琴晚同佢食飯嗰陣講起今日同你去廸士尼佢話佢都好想去問可唔可以一齊,我諗人多熱鬧啲好玩啲就答應咗佢喇,欣欣介唔介意?」
 
「佢係咪就係乘風哥哥之前話鍾意嗰個女仔?」欣欣沒直接答李乘風的問題。
 
「唔係佢呀…」李乘風尷尬答道。
 


「哦~ 咁就唔介意…」最後五個字欣欣的聲量只有她自己能聽得見。
 
 
到到欣澳站一出閘,就看見紥了條馬尾,身穿格仔短裙加一件米奇老鼠風褸的周紫盈正一臉期待地等著。
 
「Hello~唔好意思等咗好耐?」李乘風上前和她打招呼。
 
「唔係呀,我都係啱啱到咋嘛~  哩位咁可愛嘅就係欣欣?」周紫盈笑容滿面答道。
 
李乘風:「係呀,我半個妹妹,欣欣叫紫盈姐姐啦。」


 
「紫盈姐姐你好~」欣欣禮貌地叫了一聲。
 
「欣欣你好~多謝你今日肯”侵”埋紫盈姐姐玩呀~」知道欣欣是李乘風的”妹妹”,周紫盈自然落力討好。
 
「我其實都係啱啱先知咋,不過唔緊要,玩梗係人越多越好玩~」啤了一啤李乘風,欣欣很快又回復笑容說道。
 
「係我唔啱喇,一陣欣欣想玩咩乘風哥哥都陪你玩啦,好無?」李乘風又愛憐地摸了一摸欣欣的頭說道。
 
「咁唔好再講咁多快啲行啦! 紫恩姐姐跟住我地喇~」欣欣立即拖著李乘風拉著他行,然後對身後的周紫盈說道。
 
(睇嚟佢地感情真係好似兩兄妹咁好喎…)
 
看見二人手拖手地行,周紫盈想了想便也緊隨其後。
 


 
整個主題公園人山人海但無損三人的興致,鐵甲奇俠、Star Wars、反斗奇兵、童話園林、迷離莊園、小小世界、廸士尼劇場和巡遊等全都讓他們樂而忘返。不過由於很多地方都要排長龍,所以也造就了很多時間讓他們談天說地,當中最多問題當然便是欣欣,簡直就是一個問題兒童,不過十條問題差不多有九條都是離不開李乘風。
 
「紫盈姐姐你幾時識乘風哥哥㗎?」
 
「乘風哥哥平時喺學校係點㗎? 乖唔乖? 」
 
「乘風哥哥喺學校係咪好受歡迎?」
 
 
而隨著大家越來越熟絡,她問的問題亦開始越來越尖銳。
 
「點解你會玩田徑嘅? 係咪因為乘風哥哥?」
 
「你覺得乘風哥哥點?」


 
「紫盈姐姐其實你係咪鍾意乘風哥哥?」
 
而襯有一次二人在女廁前排隊李乘風並不在附近,欣欣突然問出了這一個問題。
 
「下?」這讓周紫盈有點反應不過來。
 
「我中一㗎喇,唔係真係你地諗到咁細個,如果你唔係對乘風哥哥有意思,又點會為佢入田徑隊,又專登同我地嚟廸士尼呢?」欣欣突然一臉認真說道。
 
望著眼前這女孩,周紫盈突然很難把她和之前那個一臉童真的欣欣想像成同一個人。
 
「放心喎,我唔係要阻止你或者破壞你地關係,相反如果你過到我嗰關我仲可能會幫助你添~」欣欣狡滑地說。
 
「你到底…」周紫盈充滿疑惑。
 


「乘風哥哥嘅遭遇已經好慘,我淨係希望佢以後可以幸福快樂,唔會再受任何傷害… 而我,永遠都係佢心目中嘅好妹妹~ 你明唔明?」欣欣轉了面望著遠處風景說道。
 
周紫盈:「嗯… 我都睇得出你地感情好好真係好似親生兄妹咁…」
 
「所以想追乘風哥哥就努力巴結我啦~」說完欣欣便順勢走入了廁格。
 
當周紫盈從廁所出來後,看見欣欣已早她一步出來並變會那個天真的小朋友正纏在李乘風談天。
 
「唔好意思,行得喇!」周紫盈走到他們那邊說道。
 
「好! 咁我地排隊去玩極速礦車喇!」欣欣歡呼然後拉著李乘風和周紫盈便走。
 
排了接近20分鐘,終於到到他們,不過一個比較尷尬的問題便出現了,因為過山車每排只能坐兩個人,所以必需要有一個人單丁和其他人坐。
 
「欣欣細個乘風你陪佢坐啦,我坐後面得㗎喇~」周紫盈主動提出。因為二人已成為好朋友,不知從何時開始,他們都變了以”乘風”和”紫盈”稱呼大家。


 
本身李乘風也打算就這樣安排,但這時他又看見排周紫盈後面的是一個大叔正色瞇瞇地盯著她短裙下的長腿,心裏一陣厭惡他便主動走到周紫盈後面把她和阿叔分開然後說
 
「你地兩個一齊坐啦,我喺你地後面睇住你地~」
 
周紫盈害怕欣欣不高興還想拒絕但挑通眼眉的欣欣已看穿李乘風這樣做的原因,於是成全他的好心便捉著周紫盈的手說
 
「咁紫盈姐姐陪我坐啦~」
 
「咁好啦~」見欣欣沒反對周紫盈自然亦沒再拒絕。
 
(欣欣真係好乖好善解人意,抵我咁錫你~)
 
欣欣看穿李乘風的同時李乘風亦看穿欣欣是故意配合自己,對這妹妹自然亦越是愛惜。
 
玩完過山車又玩了其他機動遊戲和其他剩餘未去的地方,轉眼間已經入夜到了煙花表演的時間。看著漂亮的煙花在城堡上綻放,欣欣很自然撓著了李乘風的手臂一臉陶醉地欣賞,而在這浪漫的環境下,周紫盈亦很想學欣欣那樣挽著李乘風的手和他多親近一點但不能,所以只能盡量貼近對方一同觀賞,當然這痛苦的忍耐亦逃不過欣欣的法眼。
 
煙花表演完畢後,在離開公園途中他們又去到精品店看看有沒有甚麼紀念品能留為紀念,李乘風決定買一隻海豚公仔給欣欣當禮物。
 
「紫盈姐姐陪咗我地成日,乘風哥哥不如你都買隻公仔比紫盈姐姐當留為紀念多謝佢呀~」欣欣望著公仔一臉喜愛的同時望了望遠處正在自己閒逛的周紫盈便說道。
 
「又好,順便當多謝佢之前成日照顧我啦~」於是又買了另一隻不同顏色的海豚公仔。
 
「送比你呀~多謝你陪咗我地成日同埋多謝你之前對我嘅照顧~」出了門口李乘風把公仔送給周紫盈。
 
「多謝! 我都買咗兩個鎖匙扣比你同欣欣呀,多謝你地肯同我玩咗一整日,我今日好開心呀~」意中人送禮物比自己固然驚喜萬分,但原來周紫盈亦很有心買了兩個鎖匙扣給李乘風和欣欣。
 
「多謝紫盈/紫盈姐姐~」二人一同道謝。
 
「我地一齊喺度影幅相留為紀念呀~」然後欣欣又說。
 
拍照時她故意企在二人中間,然後臨影前她突然一手挽著李乘風一手挽著周紫盈然後用力一拉把二人拉向自己,拍出來的照片就像一對戀人拖著妹妹一家三口的感覺。
 
(暫時你都算合格… 哩張相同埋個公仔就當係多謝你陪咗我一日嘅禮物啦~ 不過乘風哥哥話已經有鍾意嘅人而嗰個人唔係你,所以之後得唔得就要靠你自己喇…)
 
在地鐵站和周紫盈分別時,欣欣一邊和她說再見一邊心裏默默在想。
 
 
「欣欣今日玩得開唔開心?」回家途中李乘風問欣欣。
 
「開心~ 乘風哥哥呢?」欣欣滿臉笑容答道。
 
「欣欣開心乘風哥哥就自然開心~」李乘風摸了一摸欣欣的頭溫柔說道。
 
(乘風哥哥多謝你… 我知比起做你女朋友,你更需要我哩個妹妹去做你僅餘嘅家人陪住你,我會努力做好哩個角色一直陪住你…)
 
若果自己做了乘風哥哥的女朋友,那乘風哥哥便只能有一個女朋友錫自己,但若果自己繼續做他妹妹,那乘風哥哥便可以有一個女朋友加一個妹妹疼錫他,這便是欣欣單純的心思。