因為我個仆街老豆 我被下了一個賓周會變短的詛咒: 43. Jolina
這個星期六，本是李乘風和周紫盈拍拖的日子，不過這天晚飯，周紫盈卻同時間找了她的新姊妹Jolina一起晚餐。
這其實也不是李乘風第一次見Jolina，因為Jolina是周紫盈的同房，所以在李乘風之前到周紫盈宿舍探訪她的時候也曾經碰過幾次面。不過要說李乘風對Jolina的印像，其實只是很一般，因為每一次Jolina望他的眼神總是讓他感覺到很不舒服，甚至有一種莫明的敵意。而另一方面，憑簡單的幾句閒談，Jolina給他的另一個感覺就是有點港女feel。
不知男仕有沒有一個感覺，就是女朋友身邊好像總是有一個看自己不順眼和喜歡在女朋友友身邊搬弄自己是非的八婆朋友存在，而直覺告訴李乘風，Jolina對他來說就是這樣的一個存在。
不過Jolina除了是周紫盈的室友，還是她的同學，所以也難怪二人友情急速升溫。基於如此，李乘風也覺得自己有需要和Jolina打好關係以免周紫盈難做或是難過。
「其實Jolina係咪唔太likey我?」赴約途中，李乘風鼓起勇起問周紫盈。
「點會呀，哩個世界邊有女仔抗拒到我男朋友嘅魅力㗎? 不過佢有時講嘢係比較掘啫~同埋係獨生女所以有時係有啲大小姐脾氣...」周紫盈有點言不由衷。
「我總係覺得佢望我嘅眼神唔太友善…」認識了Jolina不久李乘風便一直有這感覺。
「有咩? 咁依家咪比機會你發展你嘅魅力令佢鍾意你囉~」周紫盈仍對男朋友充滿信心。
「哈，真係鍾意咗我我驚你地朋友都無得做喎…」李乘風說笑道。
「係喎! 咁都係由佢憎你啦~」周紫盈亦笑著回應。
到到約定餐廳，看見Jolina已坐下正在玩電話。Jolina的長相並不長眾，但身材卻絕對不俗，傲人的上圍配上小蠻腰，平常若在街上經過見到絕對會是吸引男性眼球的存在。
「咁晏㗎你，平時約你都唔會遲到格，係咪男朋友攪到你遲呀?」一看見他們Jolina第一句說話已經有骨。
「唔係~ 今日係我化妝耐咗少少啫…」周紫盈抱歉道。
「都實係佢攪到你遲開始化粧㗎喇...」Jolina好像不把責任推到李乘風身上便誓不罷休。
一見面就被無情攻擊，李乘風只能笑而不語，看來和她打好關係的可能並不存在，只希望不要再惡化下去吧。
很快，二人便把話題帶到去她們學校的事宜上，把李乘風掠在一旁，當然李乘風還是大方地在旁靜靜聽著她們評論自己的大學同學和教授，簡中又會觸及一下衣服和化妝品等話題。
其實周紫盈弄這個飯局，也真是意識到Jolina好像對李乘風有點偏見，希望透過大家互相接觸而能讓她改變看法，始終李乘風在她眼中是完美的，沒女性會不喜歡。所以過了一會，周紫盈亦把話題帶回和李乘風有關的事上，同時進行她另一個目的。
「BB，你嗰邊有無靚仔醫生係單身㗎?」
「都實有嘅...」李乘風想了想後答道，同時察覺到周紫盈的意圖。
「不如搵日約佢地出嚟介紹比Jolina識?」周紫盈道出了目的，因她知道Jolina是單身，若李乘風能幫手那麼她對他的印象應該能改變。
(咁咪即係搵我啲同學笨?) 李乘風的第一個念頭。
「好...我試下… 不過你地會唔會搵多幾個女同學好似無咁odd?」心中所想的當然不能說出口，李乘風只好暗地裏為同學爭取更多。
「你係咪乘機想識其他女仔咋！」誰知立即又比Jolina有位入。
「咁我先有藉口搵多幾個同學嘛，你唔係諗住我搵成堆男同學比你一個女人揀呀嘛，人地個個准醫生嚟㗎喎，大把選擇。」本性善良的李乘風亦忍不住終於反擊。
「好啦好啦，我地再從長計議~」周紫盈察覺到火藥味只好充當和事佬，而這活動最終亦沒有發生，當然還有一個原因是隨著她之後了解Jolina越深，越發覺這些活動根本是沒需要。
「紫盈，我都有啲靚仔中學同學㗎，有機會介紹你識~」Jolina心有不甘捉著周紫盈的手說了句。
當著自己說介紹男仔給自己女朋友認識? 李乘風聽到後有點生氣，但同時間又露出了一個不屑的笑容，像是在恥笑Jolina想靠這些行為離間他和周紫盈的關係只是在浪費時間。
「傻㗎咩，我做咩要識靚仔?最靚仔嗰個已經喺我身邊啦~」周紫盈尷尬地望了一望李乘風見他露出了一個不屑的笑容，心裏其實有點不高興他好像完全不著緊，但害怕他生氣又立即撓著他的手說道。
不過這一個表情的轉換卻沒逃過Jolina的法眼，她眼睛向上轉了一轉，然後臉上露出了一個微不可察的笑容。
「李乘風!」和Jolina分別後，李乘風和周紫盈正打算回家時，一把聲音卻突然從後響起。
「Vanessa?」向後一望卻發現原來是Vanessa 和Connie。
「咁啱嘅?同女朋友拍拖呀?」Vanessa眼角掃了一掃周紫盈然後說。
「係呀，我女朋友周紫盈，哩兩位係我同學Vanessa同埋Connie。」於是李乘風便為她們互相介紹。
「你地好呀~」周紫盈露出一個甜美的笑容和她們say了聲hi。
「李乘風成日提起你㗎，久仰久仰! 果然真係好靚呀~」Vanessa一副十分熱情的樣子。
「係? 佢提起我啲咩呀?」周紫盈望了望李乘風然後好奇地問。
「咪成日吹噓自己女朋友有幾靚對佢有幾好囉~ 講下講下就無女仔再敢埋佢身喇~」Vanessa說完偷偷地向李乘風眨了一眨眼，表示”你睇下我幾識做~”，讓李乘風哭笑不得。
「真係識講嘢喎~」周紫盈甜甜地望著李乘風，露出一個”算你啦”的表情。
「咁有緣不如一齊去食個糖水啦~」Vanessa又提議道。
「Sorry就快十點我要返屋企喇… 你地去啦~」不過Connie立即拒絕，原來她真的是十點前要回家的少女。
「咁我地下次先再約食飯啦…」見得自己一個Vanessa亦決定打退堂鼓。
「好呀。」李乘風回了一句便各自分道揚鑣。
「你都有兩個靚女同學喎~」剩回他們二人時周紫盈立刻說道。
「同你完全唔同level啦~」李乘風立即回應。
周紫盈:「你真係越嚟越口花花~ 而且都唔係呀，佢地一個豔麗一個清純，幾特別呀。」
「Connie就真係乖乖女一名嚟嘅，你睇佢要準時返屋企就知啦，同佢講野嗰陣都唔敢太粗俗，好似會污染咗佢隻耳朵咁。至於Vanessa，我估佢應該好多兵下，有次見佢電話whatsapp個list全部都係仔嚟…」李乘風笑著說。
「咁你小心啲喇，唔好比人收咗做兵呀。」周紫盈笑著表示擔憂。
「你先小心啲呀，你個friend話要介紹靚仔比你識呀。」李乘風亦不輸蝕。
「驚呀?」周紫盈問。
「未驚過喎，我對你有信心~」李乘風一臉自信地答。
「咁我對你都有~ 唔好比你個室友教壞就得喇~」周紫盈同樣有自信。
周紫盈也曾上過李乘風的宿舍參觀，所以亦曾見過Kenny，不過對他的印象也不算太好，因為感覺他是夜夜笙歌，夜生活多姿多彩那一種。
「佢點會教壞到我呀，係我都係比你教壞㗎啫~」李乘風突然攬著周紫盈笑淫淫地說。
「咸濕仔!」周紫盈給了李乘風一個媚眼，但卻把李乘風撓得更實。
其實Kenny見完周紫盈後當晚，曾和李乘風說過一句說話，不過那時李乘風並沒有放在心上，直到之後有一天，李乘風才發現Kenny原來早擁有一雙能洞悉人心的眼睛。