因為我個仆街老豆 我被下了一個賓周會變短的詛咒: 51. 曹子仁

「我好開心我地竟然可以有一個咁正經純粹傾偈嘅交流機會...」在一間樓上Cafe，李乘風對著Jolina說。
 
「真係?」Jolina聽到後眼前一亮。
 
「你明唔明點解嗰晚我會話”其實我地都係一樣?”」李乘風又露出微微哀傷的樣子。
 
「我明...」這說話確實觸動到Jolina內心的某一個位。
 
李乘風:「咁你應該明白點解我會咁講...」
 


「嗯...」
 
「所以我都唔想呃你，有機會我的確係想搵曹子仁報仇，而哩件事一日唔解決，就永遠會係我地嘅心魔。」李乘風再說。
 
「即係我唔幫你，我地永遠都唔會做到朋友?」Jolina若有所思地問。
 
「或者講係做唔到”真正嘅”朋友會比較適合。唔好誤會，我唔係想威脅你，只係講出事實，始終你自己最清楚你地對我做過啲咩。雖然我已經放低咗，但唔代表我無被你地計算嘅憤怒。」要令謊言不像謊言，真假話夾雜從來都是其中一個最簡單但有效的法門。
 
「你咁有信心我會去賭?」想了一會去判斷李乘風的真假，Jolina問道。
 


李乘風:「唔知㗎，不過我知我們都寂寞，同埋人只要一有可能性，就自然會想抓緊希望，那怕我地明明知道哩個可能只係一個奢望。而區區一個曹子仁，對你嚟講又算得係啲咩? 機會成本咁低，點解唔去賭?」
 
「的而且確，你係一個好特別嘅人。好，為咗以表誠意同真心，我就先賣個人情比你。」Jolina想了一想後說。
 
「多謝你。」李乘風露出一個既甜又陽光的笑容，讓Jolina剎那間覺得這人情是值得。
 
「要講曹子仁嘅弱點，首先都要講下佢嘅故事。其實我中學識佢嗰陣，佢係一個二百幾磅嘅肥仔，所以成日都比同學笑亦因而變得好內向。不過佢好好彩，有一個由細玩到大嘅青梅竹馬一直喺佢身邊陪住佢支持佢，有時見佢比人烚仲會保護佢趕走嗰啲笑佢嘅同學，所以兩人感情好好。
 
只但係到到中六發生咗一件事，曹子仁以為自己遇到女神嘅真愛，經歷咗初戀，點知最後發現一切原來只係個女仔玩遊戲輸咗嘅懲罰，而對方最後一句”你唔係以為我真係會鍾意你哩啲肥仔呀”比咗佢最後一擊，之後佢得左一場大病，突然瘦咗好多，然後性情又大變，開始去做Gym同注重自己個外表，結果就搖身一變擁有依家風靡咗萬千少女心嘅曹子仁嘅外表。
 


當然，佢心態都被扭曲，特別係對靚女，從來都只為玩弄唔會認真，當得到咗佢地個身同心後佢就會講出一段狠話再無情地將佢地拋棄，某程度上其實佢都係復仇者...」Jolina說。
 
「或者每個仆家背後其實都真係有佢地嘅故事...」曹子仁的故事確實讓李乘風有點意外。
 
「心軟呀? 咁我唔講落去喇喎~」難得有機會，Jolina不忘想作弄李乘風一番。
 
「你唔鍾意咪唔好講囉...」李乘風當然不會中計，而且一直他只是想印証自己的猜想，而故事到到這裏他已經得到最重要的資訊。
 
不過Jolina當然不會為這無聊玩笑放棄自己刷分的機會。
 
「車，我唔會咁衰嘅~ 只不過曹子仁雖然變咗個仆街，對感情從來唔會認真。但我知唯獨係個青梅竹馬，佢係真心著緊同珍惜。嗰陣被女神玩完之後，青梅竹馬一直喺佢身邊陪住佢，佢地之後仲一齊咗。曹子仁對佢好好，不過佢背後啲仆街嘢，自然係一直暪住個青梅竹馬啦。事實上個女仔好純好易呃而佢自己亦好識玩一直隱藏得好好，無傷害到個女仔，不過佢地嘅關喺出面其實本身亦都無咩人知，唔係一早被人爆咗出嚟啦。 所以如果你想令曹子仁傷心，哩個女仔就係佢弱點。」
 
(唉...真係Connie…)
 
其實李乘風一直也疑惑Connie和曹子仁的真正關係是如何，基於這原因，分手後他亦從沒和其他同學說過自己分手的真正原因而選擇一直暪著Connie。雖然面對Connie朋友間的關心時心裏會有點內疚，但直覺告訴他這真相將來可能會有大用。


 
這刻得到証實Connie就是弱點，李乘風猶豫，因為在他心目中Connie確實是一個很純很乖的女仔，自己是不是真的可以因為報仇而去傷害她?
 
看見李乘風的表情，Jolina心裏暗笑了一下。之前從周紫盈口中，Jolina自然知道了李乘風是認識該女孩。她就是要讓他為難，好為自己被對方玩弄於股掌之中出回一口惡氣。當然，她亦很有興趣知道李乘風最後的選擇，為了報仇，他真的會選擇成為惡麼嗎?
 
「好喇，我講咗咁多嘢你聽，作為報答，我地可唔可以好似朋友咁正正常常傾下其他偈?」
 
做戲做全套，李乘風亦再花了點時間和Jolina談天說地。聽完曹子仁的故事後，突然間他亦有點想知道Jolina在成為今天這個模樣前，又有沒有轉屬於她的故事? 這刻，他確實產生了好奇。
 
 
 
回到hall，李乘風把Jolina的情報告訴了Kenny。
 
「唉，真係陷入兩難呀...」李乘風內心在掙扎。
 


「你記唔記得我教過你邊幾類人係唔玩得?」聽完Kenny有點擔心李乘風便問。
 
「當然記得，痴線嘅，自尊心極強嘅，同埋自己重視唔想失去嘅。」李乘風答。
 
「記得就好... 記住，愛情雖然唔會一世，但友情，親情可以。唔好為咗一時去放棄一世，唔係你好可能會後悔終生...」Kenny臉上又出現了一絲的哀傷。
 
李乘風:「明嘅，我只係好唔忍心為咗報仇去傷害一個咁單純嘅女仔啫，但就咁放棄我又唔甘心...」
 
Kenny:「如果純粹因為咁，你試下咁諗，佢條仔係一個仆街，遲早佢都會受到傷害，你對佢嘅傷害其實只係令佢提前知道真相，早日脫離痛苦。再諗遠啲，話唔定因為咁個仆街為咗追返佢修心養性，你就拯救咗萬千個可能將來會受傷嘅美少女。而如果個仆街真係就咁放棄你個同學，咁証明佢對佢嘅感情都係有限，早日離場絕對係有利無害。」
 
「師傅不愧為師傅，我個心即刻豁然開朗晒!」李乘風一臉佩服。
 
「我其實純粹係就你想聽嘅思路去講，最後結果係點，邊有人會知呀... 記住感情嘅嘢永遠無常理可言，亦預計唔到。」只是Kenny很快又給他打擊。
 
「嗯...」李乘風繼續陷入了天人交戰。


 
不過彷彿是命運的安排，就在李乘風糾結了幾日後發生的一件事，讓他立定了決心。