因為我個仆街老豆 我被下了一個賓周會變短的詛咒: 60. 欣欣的近況

第二天，襯著假期，李乘風睡醒後便回到舊居打算給欣欣一個驚喜。
 
「乘風? 好耐無見你喎，近排點呀? 真係大個仔喇...」開門的是陳太。
 
「陳太你好，係呀，近排喺hall少返咗嚟。突然醒起好耐無見過欣欣今日咪諗住嚟搵下佢囉~」李乘風跟陳太打了聲招呼後說道。
 
「佢喺度呀，不過好似預備出門口，你等等，欣欣，乘風嚟探你呀~」陳太向著屋內叫道。
 
「乘風哥哥! 點解你會嚟嘅?」欣欣聽到後立即從房內衝出出來。若換作以前，她必定會飛撲去抱住李乘風，不過今次她衝到去李乘風面前便壓抑著自己沒有再衝前撲向李乘風。欣欣的確長大了，雖然還是一臉天真可愛的樣子，但她的輪廓卻同時勾劃出一幅動人美麗的天使臉孔，個子約有160cm。沒錯，不知不覺欣欣已經是一個亭亭玉立的中六學生。
 


「無呀，醒起好耐無見過欣欣突然掛住佢咪諗住比個驚喜佢今日嚟陪下佢帶佢出去玩囉~」李乘風對欣欣還是一臉疼愛。
 
「哎吔... 我仲約咗同學一齊溫書，唔緊要，我即刻同佢講唔去先!」
 
「聖誔假咁勤力溫書?」李乘風有點吃驚。
 
「我唔似你咁叻嘛...嚟緊好快DSE，我要將勤補掘呀...」看得出欣欣在學業上確實有點壓力。
 
「咁一係我同你一齊去溫半日書，幫你補下習，之後再睇進度出唔出去其他地方玩?」李乘風決定盡回半個哥哥的責任。
 


「又好喎! 我有好多唔識可以問你!」欣欣興奮地贊成。
 
 
於是二人便一同來到圖書館的自修室，不過李乘風發現原來欣欣是約了一個男同學，男同學還幫她一早預留了位置。男同學樣子和外型不錯，感覺有少少古惑和調皮，但心底裏應該也是個善良的人。
 
「陳欣欣你嚟咗喇? 哩位係...?」他看見欣欣後面露笑容，但看見李乘風後笑容又突然一僵。
 
「佢係我哥哥，今日嚟陪我溫書幫我補習㗎。」欣欣笑著介紹。
 
「你就係傳說出嘅乘風哥哥?」男孩問道。


 
「你好，我叫李乘風，同學仔點稱呼?」李乘風感受到男孩微微的敵意，不過還是笑著打招呼。
 
「我叫劉俊業，係欣欣嘅好朋友，未來嘅男朋友。」看得見男孩對著李乘風是有點自卑，不過他還是努力想向對方宣示主權。
 
「劉俊業你又亂講啲咩呀? 邊個係你未來女朋友呀?講咗好耐我唔會咯!」欣欣聽到後望著李乘風有點尷尬害怕李乘風誤會立刻責罵道。
 
「我會繼續努力直至你肯㗎!」劉俊業一副精誠所至，金石為開，不到黃河心不死的語氣。
 
「好喇，係唔係將來再算啦，哩度圖書館嚟㗎，要安靜。不過哩度又真係唔太適合幫你地補習，一係我地換去Starbucks我順便請大家飲杯咖啡啦~」李乘風看著二人大概知是甚麼事，心裏暗笑著提議。
 
欣欣:「好呀~多謝乘風哥哥」
劉俊業:「我自己有錢唔駛你請。」
 
 


三人來到Starbucks等了一會便有位置，兩位學生便各自拿出課本和試題開始努力起來。欣欣不時捉著李乘風問問題，李乘風亦耐心教導，而望著欣欣一臉崇拜的樣子，劉俊業心裏有點不是味意，但自己亦不能否認，經李乘風講解後，自己很多之前不明白的東西亦豁然開朗，心裏又多了點自卑感。
 
講解完後讓他們各自嘗試做題目，李乘風便拿出手機，發現昨晚五位女同學都各自whatsapp了自己，臉上不其然露出了一絲笑容然後開始和她們閒聊起來。
 
這個笑容吸引了欣欣注意，往他手機一看whatsapp list上竟全是女性，明顯他們正在閒聊，欣欣心裏立刻有點不舒服，又主動問問題希望李乘風沒時間和其他女性whatsapp。
 
 
如是者過了三個小時，欣欣見有點疲累，便索性宣布今日到此為止。
 
「乘風哥哥，難得你今日得閒，我唔溫住喇，我地依家出去玩好唔好?」
 
「好呀，欣欣話事啦，乘風哥哥今日全日都陪你~」李乘風一臉疼愛摸了摸欣欣的頭。
 
「好嘢~咁快啲執嘢行啦！劉俊業，我今日走先喇，你繼續努力啦，遲啲再一齊溫~」
 


二人很快便離開了留下一臉不捨和痛苦的劉俊業獨自在starbucks垂淚。
 
 
 
「欣欣，無嘢想同我講呀?」走了一回李乘風問道。
 
「講咩? 有呀，欣欣好掛住乘風哥哥囉~」說完又主動撓著李乘風的手。
 
「扮嘢~我指啱啱個男仔呀， 幾時識咗男朋友都唔話比我聽呀?」李乘風調笑道。
 
「劉俊業? 都話佢唔係我男朋友咯! 佢自己喺度FF咋嘛!」欣欣立刻解釋。
 
「唔係有好感，點會肯同人成日一齊溫書呀~」李乘風沒放過欣欣。
 
「我費事佢成日煩住晒咋!」欣欣有點臉紅。


 
「佢就係之前成日恰你嗰個男仔?」李乘風好奇。
 
「係呀...佢以前成日蝦我，不過見佢屋企咁慘咪原諒佢繼續同佢玩囉。 點知有日突然同我講鍾意我，之後對我仲完全唔同晒...」欣欣回憶著說道，但李乘風看得出欣欣背後是有點高興。
 
「咁欣欣鍾唔鍾意佢?」
 
「唔鍾意!我當佢係buddy咋!」欣欣很大反應地回答。
 
「少少好感都無?」李乘風再問。
 
「無!」欣欣還是有力地答。
 
「好啦好啦~」知女孩臉皮薄李乘風也沒有再逼問下去，不過他覺得欣欣對男孩應該不是全無意思，只是對方需要點時間繼續努力。
 


「咁乘風哥哥呢? 回復咗單身係咪好多女仔追你?」終於擺脫自己的話題欣欣立即問出自己想問的。
 
「哈哈，乘風哥哥不嬲都多㗎喎~」李乘風當然不會正面回答。
 
「咁係因為你太好太出眾啫~」欣欣帶點崇拜和自豪地說。
 
「其實...乘風哥哥唔係欣欣諗得咁好...」想起自己近年的作為，李乘風對於欣欣的稱讚實在受之有愧。
 
「點會... 喺欣欣心目中你永遠係最好，欣欣希望乘風哥哥以後可以再次搵到自己嘅幸福~」欣欣一臉情深地對著李乘風說。
 
「多謝欣欣~ 你嚟緊都要比心機考好DSE呀，乘風哥哥知道自己成日忽略咗欣欣對唔住呀，嚟緊有咩需要幫手隨時搵我知唔知?」
 
「知道~」
 
這天，李乘風帶欣欣周圍逛街和玩樂，又和她吃了頓豐富晚餐才把心滿意足的她送回家。