接著的三個月,李乘風十分忙碌,除了上堂和實習外,他把全部時間都用在了預備他的復仇大計上。
 
然後在三個月後,他終於再次去到了這個曾經帶給他無數歡樂和傷感的房子門口。
 
“叮噹”
 
「乘風?」打開門後Miss Lui不敢相信自己的眼睛,嚇得目定口呆。
 
「Miss Lui,好耐無見...」李乘風帶點苦笑說道。
 


他們對上一次相見,已是五年多年畢業禮的時間。李乘風的樣子沒多大改變,只是多了種成熟和穩重感。相反,五年歲月卻在Miss Lui的臉上留下了不少痕跡。除了鬢角開始出現花白的髮鬢,眼角和額頭亦出現了數道不深不淺的皺紋,這不正常的催老程度告訴了李乘風這五年Miss Lui肯定過得並不好。內疚,心痛讓李乘風壓止不住淚水,並跪倒了在地上。
 
「家寶,對唔住...」
 
「傻咗呀你,做咩呀?快啲起身啦!」Miss Lui立即上前想把李乘風扶起來。
 
「你唔原諒我我唔會起身㗎!」只是李乘風不肯。
 
「我根本從來都無嬲過你... 你快啲起身入嚟先啦! 比其他人見到你跪咗喺我門口以為我虐待你呀!」
 


聽到這李乘風才終於站起來並跟Miss Lui入回屋內。
 
「Daisy講晒比你聽?」倒了杯水給李乘風,Miss Lui問道。
 
「嗯... 點解你要咁傻呀! 等我怪錯咗你咁多年! 一諗起你當年受嘅苦… 我個心就好痛…」李乘風說著又開始流下眼淚。
 
「你試諗下如果我當年講咗比你聽,你會點?」Miss Lui把手搭上李乘風的手背以示安慰,然後一臉柔和地問道。
 
「我會即刻去殺咗個人渣!」李乘風激動地答道。
 


「咁你知點解我唔可以話比你知啦?我唔話你知就係唔想你衝動... 比你殺咗佢,你就要坐監,如果殺唔死,刺激到佢張啲片放上網,你估我同你嘅下場會點? 無論點,你嘅人生都會玩完,而我唔會比哩件事發生...」Miss Lui冷靜地分析著。
 
「對唔住,我知我好無用... 但都無理由要你一個人承受晒...」李乘風知自己衝動,但還是難以釋懷。
 
「始終我係做錯咗...我一開始就唔應該同個學生攪埋一齊...如果我唔係真係咁做咗,又點會比人捉住把柄威脅到? 不過對住你,又有邊個可以把持得住…」Miss Lui把自己的手由對方的手上放到對方的臉上,並嘗試為對方抹去臉上的眼淚。
 
「所以錯都係我地一齊錯,我地應該一齊負責㗎!  咁點解你之後又唔同我講返呀...」李乘風捉著Miss Lui因激動而略微抖震的手並在自己的臉上輕撫著,他很懷念對方手上傳來的這種觸感。
 
「嗰陣見你同周紫盈咁幸福,我講比你聽咪只會令你傷心,內疚同為難? 到時你點算好? 因為內疚而同返我一齊去傷害周紫盈? 定係要我承受多次失去你嘅痛苦? 我地又何必將一個人嘅痛苦變為三個人嘅痛苦?」Miss Lui像雲淡風輕般說著。
 
「家寶...」對於Miss Lui的無私李乘風很感動。
 
「過咗去就由佢啦... 每個人都要為自己做嘅事負責㗎,今日可以見返你,Missie已經好開心... 不如你同我講下哩五年你發生過嘅事? Missie好想知道...」比起再不斷糾纏以前那段痛苦的回憶,Miss Lui更想知道李乘風這幾年的近況。
 
「好...」


 
於是李乘風便把自己這幾年發生的事都告訢了Miss Lui,包括周紫盈,Jolina,Connie,自己做了Player,和欣欣等故事,當然詛咒那部份還是隱暪了。
 
「估唔到你之後發生咗咁多事...不過唔係我傷害咗你,都唔會有之後嘅事,係我害咗你... 好彩欣欣將你救返返嚟咋...」Miss Lui聽後,同樣為李乘風的遭遇和轉變感到痛心和內疚。
 
「邊關你事! 係我害咗你至真...而且我同欣欣都已經分咗手...」李乘風把欣欣出軌的事亦告訴了Miss Lui。
 
「點可能呀? 欣欣完全唔似啲咁嘅女仔...以前我都已經睇得出佢對你嘅迷戀係好深好深,不過你唔認咋嘛... 我唔太信佢會做啲傷害你嘅嘢...」Miss Lui不相信。
 
「其實我都唔太相信...但偏偏就發生咗...」同樣地李乘風其實仍很難相信。
 
「會唔會係別有內情你唔知?」Miss Lui不死心再問。
 
「我唔知...不過其實自從嗰晚後我哩三個月無見過佢同搵過佢了...」想起欣欣,李乘風的心情更加沉重。
 


「唉...有機會問清楚啦! 你係著緊點會不聞不問三個月咁耐㗎...」Miss Lui不滿道。
 
「因為哩段時間我有啲更著緊嘅嘢要去做...」
 
「咩咁重要?」Miss Lui好奇。
 
「喺見你之前我要為你預備一份禮物,唔係我個心永遠都唔會過到自己…」李乘風痛苦地說。
 
「禮物?」Miss Lui不明所意。
 
「無錯,就係我一定要為你報仇!」想起鄭子誠,李乘風立刻恨得咬牙切齒。
 
「報仇?你到底做咗啲咩?你唔好亂嚟呀...」Miss Lui立刻擔心問道。
 
「詳情唔方便同你講...不過放心啦,佢仲在生亦無受傷,只係哩世都一定唔會過得好啫~」李乘風一臉神秘地說。


 
「你! 唉...最緊要你無事...只要你應承我唔好亂嚟唔好做犯法嘢同危險嘢就得喇…」Miss Lui沒他辦法亦不想追問下去。對於這個人,她不希望他再存活於自己記憶之中。
 
「我點可以就咁放過佢?佢傷害咗我最愛嘅人,白白浪費咗我地咁多年嘅時間呀!如果殺人唔駛坐監我一早一槍打爆佢個頭呀! 一諗起你當年嘅經歷,我仲要咁hurt你,我恨不得一槍打爆埋自己個頭...」想起Miss Lui當年的痛苦,李乘風剛止住的眼淚又再壓抑不住流下來。
 
其實之前周紫盈受傷,李乘風都尚且奮不顧身為她報仇。這次Miss Lui受的傷害更大,李乘風自然更不可能放過對方。
 
「乘風... 過咗去喇...最緊要係你無事」看見李乘風傷心的樣子,Miss Lui忍不住抱著對方安慰道。
 
「家寶,既然己經真相大白,你可唔可以比多次機會我補償你?」李乘風回抱著Miss Lui。這熟悉的氣味讓他懷念萬分。
 
「傻瓜...Missie年紀唔細,就快變老太婆喇,你唔怕比人笑我都怕啦... 忘記Missie,認認真真搵個好女仔同你過人世啦~」Miss Lui憐愛地撫摸著李乘風的頭勸道。
 
「我唔要! 你唔記得我地約法三章嗰陣你講過,等我升咗大學如果仲未變心又唔驚你老影衰我,我到時就可以光明正大拖住你出街? 依家我同你講我唔驚呀,我以後都要拖住你出街比人睇話比所有人聽你就係我女人! 你唔可以講過唔算數㗎!」李乘風當然不會聽從Miss Lui的勸說。
 


「你仲記得...?」Miss Lui既感動又意外。
 
「你講過嘅嘢我點會忘記... 而且就算你唔應承我,我其實都唔會再搵到其他人,因為仲可以令我相信佢唔會拋棄我嘅就只有你,其他人我都唔會再有信心...」李乘風帶著點唏噓說道。
 
「咁欣欣呢?」Miss Lui問。
 
「曾經佢都係其中之一...可惜...」李乘風痛苦地說道。
 
「你搵佢問清楚先啦... 如果問清楚後答案都仲係一樣,我先再考慮下...」幾年的等待, Miss Lui怎可能不心動。不過她不希望李乘風因內疚而一時衝動,更覺得欣欣的問題必需要先得到答案。
 
「好...」確實,李乘風亦認同要把對欣欣的疑問解決後,才可以下定決心。
 
 
只是這一晚,當他去到欣欣屋企的時候,陳太卻告訴了他一個震驚的消息。
 
「欣欣上個月已經離開咗香港,過咗去澳洲讀書呀...」