[兩性] [大結局] 叫咗個PTBF，居然撞正係Ex: 第六章、蘋果 (6.1 那兒來的自信？)

人始終需要一個感情嘅出口。為咗消除剛才混亂嘅思緒，我打開咗個PTBF tg channel。據聞如果成日約同一個人嘅話，會好易沉船，所以我決定約下新男仔。
 
「我著軍綠色褸啊應該好易認嘅。」
 
好自信咁喎。我係旺角地鐵站E出口， 一眼望去已經有幾個著軍綠色褸嘅男仔。
 
說白了，每個人也曾經以為自己很獨特，但是只不過是世界的一粒塵而己。轉個頭之後隨時連樣貌都已經唔記得。
 
「我用緊白色大袋」
 


軍綠色褸嘅男仔。其中一個係揹著白色大袋，而個位係…
 
Desmond! 唯獨係ex，係一個化咗灰都會認得嘅存在。
 
我地視線對上咗一秒之後，我就掉頭走了。由於地鐵站太多人，加上佢有俾我更多身高上嘅優勢，所以佢好快追上並且捉住咗我。
 
「唔好走，求下你。」
 
當初同佢一齊，好有可能都係發自母性嗰種可憐人嘅心情。我問「咩事，你想點。」
 


「呢度太多人，我地去一個地方好嗎？」
 
我當然唔會帶佢去Cafe啦，佢呢個人，食咩都得啦。我地去咗以前一齊食過嘅茶餐廳。
 
「畢業之後我一直都搵唔到工。雖然係Asso畢業，但出路一定比中學畢業多!屋企人都係咁講咖，而家都唔知點算。」
 
「你咪可以好似咁樣做下part time boy friend 先囉。搵唔到錢咩。」 
 
「唔得呀。疫情底下真係冇咩客⋯⋯你可以借少少俾我嗎？」
 


香港地點會咁易餓死人？我摸著我嘅粉紅色Chanel flap bag。我知道，我唔可以心軟。
 
「你搵個富婆包你啦，唔好煩我。」
 
「其實我以前都試過，不過只會俾人包一兩個月就完⋯⋯你幫下我啦，借少少就得啦，一係咁啦，你想幾時約我都得。」
 
「鈴鈴⋯」係一個whatsapp call
 
Lindy?個icon 的確係佢…
 
「Sorry呀，我女友打嚟，我出去聽一聽先。」
 
我趁機埋單之後，衝出門口，截咗一架的士。「你想幾時約我都得」真係那兒來的自信。