只有做愛的時候我才聽得見聲音: （6）

「叮噹！」大門門鐘響起。

洗緊碗嘅何管家放低手頭上嘅嘢，行去大堂開門。

「你好呀，呢度係咪清水灣道888號？」

門外係一名青春美少女，佢係第三個被獲邀來「試訓」嘅女仔。

「無錯，我係何管家，你係Laura？」



「係呀，不過Laura呢個名係我拍私影接job先用，唔介意嘅話你可以嗌我中文名，我叫林若晴，你可以嗌我若晴，或者晴晴都得。」

「咁晴晴你快入嚟啦，我帶你上房見我地少爺。」何管家邀請晴晴入屋，並且帶佢上樓，前往Alex嘅房間。

「哇，間屋好大好靚，有錢人即係有錢人，住都住得豪華啲，我咁大個女都係第一次見識到咁靚嘅屋。」晴晴讚歎不絕。

跟住佢就問：「係啦何管家，係咪真係同你少爺上完床，就有一萬蚊收架啦？」晴晴問。

「係，無論你最後有無被揀中，我地都會俾返一萬蚊車馬費你。」



「咁係支票定係現金呀？」

「一般會俾支票，但如果你想要現金都OK嘅。」何管家答。

「咁我想要現金，同埋其實呢，啱先我係由港島搭車過嚟，你知啦，由港島嚟呢邊車程咁遠，車錢都幾貴架嘛，你話我有無得拎一萬之餘，仲可以額外claim返啲車錢呢？唔多架，一百蚊渣。」

「話明係車馬費，嗰一萬蚊已經包埋你啲車錢架啦。」

「你都俾得一萬蚊，咁都唔爭在俾多一百啦，係咪咁話？」



「呢層我話唔到事，我要問過少爺先。」

「一百蚊對有錢人嚟講連散紙不如啦，一定無問題嘅。」

晴晴繼續講：「話時話，你少爺真係聽唔到嘢？」

何管家點點頭：「係，無錯。」

「咁你知唔知少爺鐘意咩類型嘅女仔呀？你覺得我符唔符合佢嘅條件呀？你話如果佢睇得中我，我拎張月薪九萬嘅合同，咁到時就真係發達啦。」

「嗯，我地到啦，請入去啊。」何管家做出請嘅姿勢。

晴晴敲一敲門，然後行入房。

何管家就同Alex交帶一聲後，落返樓做自己嘢。



晴晴掃視房間周圍，又不禁讚歎：「哇，間房望出去望到海，好正呀！」

Alex打量一下面前嘅少女，見對方眼大大面尖尖，身穿白色背心和熱褲，打扮得青春艷麗。

貼身嘅背心突出D cup豐滿上圍，下身露出修長白淨美腿，整體上都算係一個標準嘅美女。
 
「你好，我個名叫林若晴，你可以叫我若晴或者晴晴。」晴晴自我介紹。

Alex見到口型，但聽唔到佢講乜。

「係喎，你聽唔到嘢架喎，我又唔識手語，咁點溝通好呢？」晴晴思考左幾秒，諗到將自己講嘅嘢打落電話度，然後俾Alex睇。

「我啱先係話我叫林若晴，你可以嗌我若晴或者晴晴。」



Alex望左一眼，用iPad打字回復：「Hi，我叫Alex。」

晴晴又快速打左幾行字：「我剛才從港島坐車過嚟，咁遠水路所以交通費就有啲貴，差唔多要成一百蚊咁多，請問你可唔可以報銷呢筆錢，連埋嗰一萬蚊一齊俾我呀？」

佢會用把口複述一次屏幕上嘅字，佢算係鐘意講嘢，把口停唔到嗰類人。

Alex點點頭，在iPad上打左「OK」二字。

「哈哈，我都估到啦，100蚊對你嚟講算得咩呀！」晴晴打字講「多謝」，並特登放大個字形表示感激之情。

Alex禮貌地笑一笑，喺iPad上：「咁不如我地開始啦。」

「咁快開始啦？我地唔洗交流下、了解下對方先咩？」晴晴問。

「我睇過agent發過來嘅資料，我大概了解過你嘅年齡，姓名，身高等等。」



「咁你呢？你幾多歲？平時有咩愛好？聽講你喺『咩咩咩』嘅時候先聽到野，係咪真架？同埋你點解會耳仔會聽唔到野嘅？」晴晴一次過打左好多字，問左好多問題。

Alex打左幾隻字，跟手塞部iPad俾晴晴，自己就行左去音響前，放隻黑膠碟落去部唱片機度。

晴晴望一望部iPad，Alex對佢啱先問題嘅解答係：23歲、唔關你事、係、唔關你事。

「唓，講啲唔講啲。」

晴晴放低iPad，行近窗前欣賞外面嘅景色，自言自語：「有錢真係好，屋企又大又靚，間房又有海景，一年三百六十五日都望住個海，得閒吹下海風望下個海，真係爽呀。」

依家係夜晚，個海黑媽媽其實無咩好睇，只係「望出屋企就見到海」呢件樣令晴晴感到神奇同羨慕，忍唔住要望真啲睇下，感受一下做有錢人嘅感覺。