只有做愛的時候我才聽得見聲音: （13）

出左糧第一餐飯梗係食好啲，於是佢就請左佢個同事兼朋友佳瑩，到一間高級餐廳度食飯。
 
餐廳位於港島蘇豪區附近，主打高級西餐，人均最低消費起碼兩千蚊。

「呢間高級嘢嚟喎，啲嘢食會唔會好貴架？」佳瑩望一望餐廳周圍豪華嘅裝修。

「就係高級嘢我先特登請你食餐好嘅，如果唔係你咁抵得諗，成日肯同我調更，咁我都唔會就到時間去清水灣嗰邊，所以唔好同我客氣，呢餐就當係我答謝你嘅。」

晴晴揭開餐牌，見到上面嘅價錢，雖然有曬心理準備，但都打左個突，心諗乜原來真係咁鬼貴。



不過都既然一場來到，為左多謝佳瑩加上啱啱出糧，一餐半餐食貴少少都ok嘅。

「話時話，今日咁得閒請食飯嘅，你唔洗入清水灣咩？」佳瑩問。

「唔洗呀，呢幾日我嚟m，有得放月經假。」

「但你諗住仲做幾耐呀？」

「一年囉，我簽左一年合約，至少要做一年，所以接住落嚟嗰十一個月，都可能經常要揾你捱下義氣，幫我頂一頂更啦。」



「一年咁長？你好等錢洗咩？」。

晴晴搖搖頭話：「錢呢啲嘢無人嫌多嘅，尤其係趁後生趁有能力，更加要抓緊機會揾多啲錢。」

「我就唔係咁諗，計我話，女人應該趁後生揾個好男人，有無錢都唔緊要，最緊要對方對自己好。」

「傻啦你，世界上邊有好男人架，我就話，與其揾男人咁倒不如揾多兩個錢傍身好過，唔理咩好男人壞男人、有錢男無錢男，統統都係靠唔住架。」

「唔係架，都係睇你遇到咩男人姐，譬如我bb就對我好好啦。」



「你上一個條仔夠話係好仔啦，最後咪又係背住你偷食。」

「呢個唔同架，佢真係好好架！拿，你睇下，我啱先text佢話掛住佢，佢就即刻打過嚟揾我啦。」佳瑩接通男朋友嘅電話，「喂，bb呀……」

晴晴睇見眼冤，佢咬一啖蒜蓉包，雙眼睄到遠處有兩個熟悉嘅身影

——Alex同何管家。

佢向住佢地揮手示意，不過對方好似無留意到佢。

「你好，我地book左8點半vip房。」何管家行到櫃檯同餐廳經理講。

「兩位唔好意思，你地今日book嘅嗰間房天花板漏水，成間房都唔用得。」

「咁你地仲有其他房呢？」



「Sorry，其他房都有客，我地暫時無多一間vip房，如果唔介意嘅，你地可以坐我地出面啲位。」

何管家用同Alex手語解釋佢地所預訂嘅房天花板漏水，問佢願唔願意坐出面啲位食嘢。

Alex覺得無乜所謂，跟住經理就帶二人就座，咁啱就帶到去晴晴同佳瑩隔離嗰張檯。

「Alex、何管家，真係『橋』呀，竟然喺呢度都撞到你地！咦唔係喎，呢度係高級餐廳，你地應該成日嚟先係，喺呢度撞到你地一啲都唔出奇先啱。」晴晴同二人打招呼。

Alex聽唔到晴晴講乜，只係表示禮貌咁點一點頭然後就座。

兩張檯位置相隔好近，晴晴提議：「不如拍埋兩張檯一齊坐，人多圍埋一齊食熱鬧啲。」

「我諗少爺唔係咁鐘意，都係分開坐比較好…」



何管家未講完，晴晴就已經將兩張檯拍埋左。

Alex用電話打字問坐埋隔離嘅晴晴：「你做咩坐過嚟？」

「一齊食熱鬧啲呀嘛。」

Alex本來諗住同何管家一齊靜靜地食餐飯，不過睇嚟依家唔得啦。

「我身邊呢個係我朋友，叫佳瑩。」晴晴用口講，並用電話打字介紹身邊嘅朋友，「佳瑩，佢係Alex，呢個係何管家。」

「Hi，你地好。」佳瑩對二人打招呼。

Alex同何管家禮貌咁點頭回應。

「Alex，你係晴晴嘅中學同學？」佳瑩問。



聽唔到嘢嘅Alex揭緊餐牌，無回答。

晴晴用餐牌遮住半邊嘴，探前少少個人，同坐喺對面佳瑩好細咁講：「佢係清水灣嗰個Alex呀。」

「係佢呀？」佳瑩同樣用餐牌遮住自己，壓低音量講。

「係呀，佢淨係上床先聽到嘢，平時聽唔到嘢架。」

「唔怪得唔應人啦…」

「咳咳—」何管家乾咳兩聲打斷二人對話，問，「你地兩個嗌左嘢食啦？」

「係呀，嗌左啦。」晴晴拎返開個餐牌回答。



過左一陣，Alex諗好食咩後就叫何管家落單。