只有做愛的時候我才聽得見聲音: （23）

喺客廳吸完塵，晴晴就嚟到書房吸，呢間房喺佢簽約嗰時入嚟過一次。

當時佢無為意，家下先發現原來書檯上面放左兩張合照。

一張係Alex細個同阿爸阿媽嘅合照，另一張係Alex以前同樂隊成員上台演出時嘅合照。

每張相入面Alex都笑逐顏開，識左個幾月，佢都未見對方笑到好似相入面咁開心。

「估唔到Alex拎住結他個樣都幾型仔喎。」



晴晴望清手上幅合照：「咦，呢個…呢個女仔...咪係上次喺酒吧門口嗰個，原來佢係Alex隊band個主音...」

呢個時候，做完gym嘅Alex，經過門口入嚟睇下晴晴喺度做咩。

晴晴睇得入神，無留意有腳步聲，抬頭見到Alex無端端棟左喺隔離，嚇左一跳：「哇，你行路無聲嘅，失驚無神彈出嚟嚇我一跳！」

「你喺度做咩？」Alex用電話問。

晴晴指一指身旁嘅吸塵機，表示自己入嚟吸塵，又拎手上張合照裡面Alex個笑樣同眼前個Alex比照一下：「點睇你都係笑嗰陣靚仔啲。」



Alex見晴晴個嘴郁緊，問：「你話咩話？」

「我話你笑嗰陣靚仔啲。」

晴晴打字覆完呢句，就擺返低副合照，繼續吸塵。

到左中午，Alex話想去高爾夫球會食lunch，食完順便打個golf。

咁晴晴就擔當埋司機車佢去，臨出發前佢渌多個麵俾何管家做午餐。



今日個太陽超級猛烈，天氣非常炎熱。

太陽光射落嚟成身熱辣辣，猛咁出汗。

「好熱…」晴晴件衫濕曬，周圍都無遮無擋，想揾個樹蔭抖下涼都唔得。

Alex一開始打高爾夫球就係貪佢運動量唔大，但又可以曬下太陽，出下汗。

佢揮桿打波，晴晴就負責斟茶、遞水、抹汗。

太陽高照，溫度高企。

「好熱，我驚我頂唔順會中暑，你打算仲打幾耐？」晴晴遞水俾Alex，佢額頭、頸、手臂全部都係汗。

Alex飲一啖水，喺對方手上嘅電話輸入幾隻字：「再打多半粒鐘。」



佢諗住打多陣就走，而打到中途，晴晴忽然掩住個肚，表情痛苦咁行過嚟。

雖然聽唔到對方講乜，但從佢嘅表情同肢體語言，應該係講緊佢想去肚痛想去廁所。

晴晴乸埋口面，面容扭曲，表情誇張到有啲假。

Alex覺得對方可能扮緊嘢，詐緊肚痛想返球會涼冷氣，但佢見對方一個女仔曬左咁耐，大汗疊細汗，自己其實都有少少過意唔去，所以就俾對方返球會先。
 
喺呢啲高溫天氣下，最適合就係整返杯紅豆冰消一消暑。

打完波全身熱辣辣嘅Alex都係咁諗，返到球會就到餐廳嗌返杯冰。

而提早返黎嘅晴晴，已經坐喺度嘆緊冰凍可口嘅紅豆冰。



「你又話肚痛？依家又食生冷野？」Alex坐到晴晴對面，右手展示電話屏幕。

「真係好奇怪，我一返到球會，個肚就唔痛。」晴晴喺自己電話上打字回應。

Alex露出思疑嘅眼神，個心諗緊對方果然詐肚痛。

晴晴跟手喺銀包拎左張單據出嚟。

呢張係買紅豆冰嘅收據，一般餐廳賣嘅紅豆冰價錢大約二三十蚊，但呢間高爾夫球會所買嘅，一杯要成一百五蚊。

晴晴好後悔嗌之前無問價錢，依家「揼曬心口」。

「你俾呢張單我做咩？」Alex疑問。

「何管家話我同你一齊喺出面所用嘅洗費都有得報銷，所以咪俾張單你報銷。」



「要等到月尾先一次過claim，到時睇你邊啲可以報銷，邊啲唔得。」

Alex嗌嘅杯紅豆冰仲未嚟，晴晴就無啦啦將自己嗰杯俾Alex，並笑笑口做出「請」嘅手勢，好似想同對方分享。

Alex猶豫片刻，硬係覺得對方無咁好死同佢share。

兩秒之後，晴晴竟主動用匙羹「筆」啲冰，餵入Alex口中。

「Good」嘅一聲，Alex吞左口中嘅紅豆冰，亦正如佢諗嘅一樣，晴晴點會咁好心請佢食。

對方對佢表示：「依家杯紅豆冰你都有份飲，咁呢張單就無得唔claim啦，啱唔啱？」

Alex無奈一笑，呢個女人為左錢真係無所不用其極。