只有做愛的時候我才聽得見聲音: （25）

晴晴諗起自己對上一次嚟CD鋪，應該係中學嗰陣，自從上網聽歌咁方便，佢都無買CD好耐。

Alex見一場嚟到，不如揀多幾隻碟買返去聽。

佢一路揀碟，一路㩒住電話，應付隔離晴晴嘅疑問。

「其實你聽唔聽流行曲架？」晴晴面對面send message。

「少聽。」



「咁你有時聽黑膠，有時聽CD，兩者有咩分別？啲聲唔同？」

「自己去Google。」

「上次你都未答我，咩係post rock？」

晴晴問到呢個問題，咁啱Alex見到眼前有本雜誌介紹唔同類型嗰Rock，佢遞呢本書俾對方，並喺電話中輸入：「你想知咪就買本雜誌返去睇下。」

「可以報銷？」



「唔得。」

「唓~」

大約左個半鐘後，二人買完嘢離開唱片店。

出到嚟晴晴話口渴想去七仔買啲嘢飲，Alex就出面門口附近等。

遠處一百米有大批差佬封鎖左對面街，似係查緊大案。



而其中兩個差佬無端端走過嚟查路人身份證，第一個就查到Alex身上。

「喂先生，查身份證呀。」兩個其中一個帶眼鏡嘅差佬語帶輕佻問。

Alex聽唔佢地講嘢，無即時反應。

另一名無戴眼鏡嘅差佬兇佢話：「頂你個肺呀！你聾架？阿sir同你講緊嘢呀，快拎身份證出嚟！」

Alex用手語表示自己耳仔聽唔到，係一名失聰人士。

「我頂！呢條友真係聾架？唔係掛，無帶相機都撞到『聾友』，哈哈！」戴眼鏡個差佬竟然發出嘲笑聲。

「扮架下話？等我試下。」

無戴眼鏡個差佬喺Alex面前大嗌一句：「仆你個街！我叫你拎身份證出嚟呀！你聾架？」



Alex淨係見到條友擘到個口好大，而且態度極不友善。
 
「哈哈哈！你睇下，我都話左啦，佢真係聾架！」戴眼鏡嘅差佬十分唔尊重。

「頂，聾嘅就返歸啦！」

戴眼鏡個差佬仆街到喺度扮聾嘲笑Alex：「咩話？阿sir話咩話？講大聲啲？哈哈！」

晴晴拎住汽水，行出便利店，見住兩條差佬喺度嘲笑Alex。

佢即刻就行過去：「喂，你兩個死差佬喺度做咩？」

「死𡃁妹，你講乜春呀？話邊個死差佬呀？」無戴眼鏡嘅差佬聲大大。



「我睇到曬架，你兩個仆街喺度笑人聽唔到嘢呀嘛，食屎啦去，你地老母無教你咩叫尊重架？」

「仆你個臭街，死𡃁妹咁撚串？」戴眼鏡差佬扎行馬，似想郁手。

Alex見到晴晴同兩個差佬鬧交，卻唔知為咩而鬧交。

「你兩個死差佬笑完人，對唔住都唔講句？無嘢下話？正一垃圾差佬！」晴晴一邊講一邊打眼色俾Alex。

呢個眼神Alex好有印象，呢個就係之前晴晴劃花佢老豆部車，被差佬發現逃跑前一刻嘅眼神。

「對你老母呀，咁撚串，就等我拉你返去…」無戴眼鏡個差佬說話都未講完。

突然間，「Pop」嘅一聲開汽水聲。

晴晴對住兩個差佬，拉開手上罐可樂，啲汽水隨即好似噴泉咁噴曬落兩條友面上。



佢啱先偷偷地喺身後狂搖灌可樂，谷曬啲氣出嚟，一開個罐就啲汽水就狂噴。

「仆街好乸，咩嚟架？」 「死𡃁妹，竟然淋鏹水！」兩個差佬俾啲可樂噴到一面都係。

「跑！」

就趁呢個機會，晴晴拉住Alex向後拔足逃跑，拼命狂奔。

兩個差佬俾啲可樂乸到對眼就嗌曬救命，連追都無追，周圍揾人借水洗眼。

晴晴二人跑過幾條街，就輕鬆撇甩佢地。

「呼—呼—」



二人抖曬大氣，抖左好一陣先抖得順條氣。

Alex想知頭先發生咩事，用電話問晴晴，跟住晴晴就將啱先嗰兩條差佬笑佢聽唔到嘢嘅事講出嚟。

「你睇唔過眼所以就揾汽水噴兩個差佬？」Alex問。

晴晴點點頭，用手抹一抹額頭嘅汗。

「多謝。」Alex打字並用手語表示感謝。

啱先嗰兩個差佬講左乜嘢難聽嘅或者嘲笑嘅說話都好，其實Alex一句都聽唔到，耳不聽為淨，聽唔到嘅說話根本傷害唔到佢，佢亦唔在意。

只係當知道晴晴啱先竟然為差佬冒犯嘅說話而幫自己出頭，佢突然有啲感動。

被人笑係聾人呢啲以前佢都試過，但未試過有人咁樣幫自己出頭，因此內心而感動同感激。

晴晴笑一笑，打字回覆：「哈哈，小意思，不足掛齒。」