只有做愛的時候我才聽得見聲音: （43）

三人開左幾支紅酒，飲到醉醺醺。

何管家年紀大，又唔係好飲得，飲左兩杯紅酒就暈陀陀，頂唔順就返左房訓教。

飯廳得返晴晴同Alex二人，仲有豆豆。

晴晴煮左咁多餸，佢地三個差唔多清曬，檯面有啲食剩魚頭魚尾，為食嘅豆豆跳上檯面揾嚟食。

「嗝~」一時飽得滯嘅晴晴，打左下思肊，喺酒精影響下，佢兩邊臉頰紅卜卜。



Alex望住對方打思肊個樣，覺得有啲滑稽，笑左一笑，而自己塊面都同對方一樣咁紅。

檯面上剩返半樽紅酒，二人喺度玩估手語嘅遊戲，即係Alex做一個手語，晴晴就做估係咩意思，估啱就對方飲一啖酒，估錯就自己飲。

手語晴晴就唔識做啦，不過喺度住左一個月，日常見到何管家同Alex互用手語溝通，睇得多依家勉強都睇得明少部分簡單基本嘅手語。

Alex做一個手語俾晴晴估，動作係單手摸一下下巴，然後雙手攤平擺開。

「呢個我知，你地朝朝早都做。」晴晴思考幾秒，打字回答，「係表示打招呼講早晨。」



Alex點點頭，示意對方回答正確。

由於對方估啱左，所以自己要飲一啖酒，接住佢就做另一個手語手勢。

佢彎住手指同拇指，向下fing兩下。

「錢！」晴晴即刻就估中左。

果然講到「錢」，晴晴就特別醒神。



Alex再飲一啖酒，繼續出題。

今次佢做嘅手語動作比較多，因為係一句句子。

「嗯…呢個…」晴晴搲搲頭，認真思索。

諗左一陣，佢打字答：「天氣好好咁解？」

Alex搖搖頭，表示唔啱，俾機會對方估多次。

「表示啲飯好食？」晴晴再答，Alex都仍然話佢錯，俾佢繼續估。

「乜咁難架…比啲提示啦。」晴晴扁嘴話。

「六個字。」



晴晴諗嚟諗去都諗唔到答案，於是叫Alex開估。

Alex輸入正確嘅意思：「多謝你份禮物。」

「哈哈，唔洗多謝，你鐘意份禮物就得啦，不過我地講到明話估單字架嘛，所以呢題唔計，我地繼續……」

二人再玩多幾輪，就飲曬剩低嗰半支紅酒。

佢地兩個都飲得幾醉，Alex勉強仲行到直線，至於晴晴就腳步浮浮，要人扶住先企得穩。

大部分醉左嘅人都覺得自己無醉，晴晴都覺得自己無醉，甩開對方隻手，表示可以自己行。

Alex唯有喺隔離傍住佢，費事佢仆親。



呢個時候，豆豆從飯檯跳落嚟，行去客廳玩。

而晴晴跟住豆豆行去客廳，想逗下隻貓玩，但又唔知自己飲醉左，結果就真係唔小心叉錯腳向前仆，出於本能反應，佢即刻揾側邊啲扶，於是佢掹住隔離Alex隻手。

本身都醉醉地嘅Alex被人咁拉一拉，都失去埋平衡。

二人雙雙仆倒在地，晴晴向前仆，Alex就向後仆，點知咁啱仆嘅位置相同，角度相同，著地一瞬間，晴晴嘅嘴唇就錫到Alex個嘴。

原本帶著醉意嘅二人，當堂成個人醒一醒，碌大對眼互相對望。

呢次係佢地第二次嘴對嘴咁錫。

晴晴本來通紅嘅臉頰，一下子變得更加紅，佢即刻仰後返個人，並抹一抹嘴唇，同時間佢個心跳得好快，猶如小鹿亂撞。

Alex亦心跳加速，而且下面仲硬左。



雙方嘅視線不約而同轉移去第度，唔敢直視對方，場面同氣氛都有啲尷尬。

「喵~」剛好有豆豆經過，緩和一下氣氛。

晴晴隨手抱起豆豆，行開左去，腦海停留喺啱先二人親吻嘅畫面，個心猛咁砰砰砰跳。

而呢刻，Alex下面完全硬曬，同一時候，聽覺好似又恢復左丁點，啱先佢好朦朧咁聽到豆豆嘅貓叫聲。

大約數分鐘之後。

等堅硬嘅下體慢慢變軟返，Alex用電話發短訊，同喺客廳另一邊餵緊貓既晴晴講早抖，然後就返上樓上。

晴晴只顧餵豆豆，目光唔敢望向Alex，佢拎起電話，回覆話：「晚安。」



直到臨訓前，晴晴腦海仲諗緊同Alex錫嘴嘅場面，唔單止係啱先嗰次，仲有對上喺油麻地避走鬼嗰次。

佢一路諗，個心一路怦怦跳。

至於Alex臨訓前喺度諗自己依家一扯旗，聽覺就有恢復，咁係咪代表佢雙耳嘅情況正在好轉？