只有做愛的時候我才聽得見聲音: （56）

「叮噹！」

晴晴嚟到獨立屋門前，㩒一下門鐘。

等左一陣，就有人開門。

然而，佢見到開門嘅人，眉頭一皺。
 
開門嘅唔係何管家亦唔係Alex，而係Priscilla。



「Hello，你嚟揾Alex？」Priscilla問。

「我…嚟探豆豆…」

「哦，咁你快入嚟啦。」Priscilla邀請晴晴入內。

晴晴慢慢行入屋內。

Alex聽到晴晴把聲，就主動去打招呼：「咦，你嚟左啦？」



「Hello。」晴晴打一聲招呼，並打量一眼面前嘅Alex，「你耳仔真係…好返啦？

對方點點頭，答話：「係呀，好返曬啦。」

「哈哈，咁真係太好啦。」晴晴替對方感到高興。

入嚟清水灣之前，晴晴喺腦入面諗好曬見到面要講啲乜嘢，原本諗住好似普通朋友咁同Alex寒暄一番，只係當面對面望住對方時，腦海卻變得一片空白，寒暄嘅說話唔記得曬，講完上面兩句說話就唔知講咩好。

「喵~~」呢個時候，豆豆施施然行到二人中間。



晴晴抱起豆豆，輕輕撫摸貓仔嘅頭：「豆豆，你無見我一排，係咪好掛住我呢？」

「喵~~」豆豆嗲一聲。

「咁耐無見，我特登買左啲好嘢俾你食，你估下咩嚟？」

晴晴放低豆豆，喺手袋拎出一盒嘢食，「登登登！無錯啦，就係你好鐘意食嘅漢堡扒啦，哈哈！」

佢一打開外賣盒，豆豆就即刻行埋去食。

殊不知，Priscilla行過嚟，抱起豆豆話：「哎呀，唔得架！漢堡扒呢啲咁高鹽份嘅嘢，你點可以俾豆豆食架？你想食到佢生腎病咩？」

晴晴呆一呆，無出聲。

Priscilla拎起外賣盒，望一望份漢堡扒，聞左一聞，又同晴晴講：「塊扒上面仲有『滲』左啲蒜蓉，乜你唔知貓係唔食得蒜頭架咩？」



「我之前周不時都會餵呢啲俾豆豆食，我唔知原來貓唔食得呢啲嘢，對唔住…」晴晴塊面紅曬，感到有啲慚愧。

「貓唔可以亂食嘢架，食錯嘢隨時會死，所以餵之前一定要check清楚架，你咁求其點得架。」Priscilla繼續講。

「Sorry，下次我會check清楚架啦。」

Alex見晴晴臉上露出難堪嘅表情，嘗試打圓場話：「算啦，我諗晴晴都係一時無為意啫…我以前都餵過Pizza俾豆豆，豆豆食完都無嘢呀。」

Alex講嘢無以前咁斷開一截截，流暢左唔少。

Priscilla都意識到啱先語氣好似重左少少，佢同晴晴say聲sorry，然後就去餵返豆豆食貓糧。

剩低Alex同晴晴企喺走廊，你眼望我眼，無嘢好講。



Alex望住晴晴，留意到對方嘅表情同眼神好似充滿倦意。

晴晴就環顧一下周圍，見唔到何管家：於是就問：「咦？唔見何管家嘅？」

「佢去左買餸。」

「哦~」晴晴「哦」完又靜左。

跟住佢拎電話出嚟望一望時間話：「我都探完豆豆啦，差唔多夠鐘返café開工，走先啦。」

「咁快？你唔留低食埋個飯先？我知你今日過嚟，特登叫左何管家今晚買多啲餸。」Alex話。

晴晴笑一笑話：「哈，唔啦，我要返工，下次先啦。」

「咁好啦，我送你出去。」



「唔洗啦，我知門口喺邊，byebye。」

「byebye，得閒再嚟啦。」

「嗯，好呀。」

二人點頭揮手道別。

晴晴離開清水灣，返到醫院。

姑娘發現左佢偷走出去，鬧左佢一餐，但係佢全都聽唔入耳，腦海淨係諗緊今日同Alex見面時嘅事。

對方睇嚟唔單止重拾聽覺，而且身邊仲多左個人相伴。



呢刻嘅佢一定好幸福同好開心。