我被困喺一架去九龍嘅電車上 (粵語): 7章 - 你哋做緊咩？

 
「係呢，點解你哋會坐呢架電車嘅？」為咗驅散內心嘅不安，我選擇咗同一樣面孔嘅鄧麗欣們傾計。
 
「冇咩點解，想坐就上咗嚟。」阿欣答。
 
吓？呢個係理由咩？咁你點解唔行夜山？再唔係行海濱都得啦？
 
「咁你呢，你問咁多，你又點解上嚟呀？」鄧二用背脊同我講。「我諗你咪又係一樣冇目的。」
 
「我唔係架，我只係想番屋企。」




 
「番屋企？」鄧二仍然冇擰轉身望我。
 
「搭車一定有目的地架嘛，咁夜唔係去開工就係番屋企，唔通去踩單車咩？」
 
我講咗個我覺得好合理嘅答案，但係…
 
「…」「…」
 
對面兩個人，莫名地靜咗。




 
「…」「…」
 
完全沉默。
 
做咩？我有講錯嘢咩？如果搭夜班車係為咗玩，咁好玩啲班次就唔會咁疏啦。
 
「半夜番咩屋企呀，一個人行下，靜下，咪仲好，唔覺得而家仲舒服啲咩？」
 
鄧二答完，阿欣點頭。




 
屌屌屌屌屌屌屌────！！呢啲咩答法嚟架！我真係聽唔明呀！定係我有問題呀！我開始分唔清。
 
「一個女仔半夜三更喺條街上面盪，唔驚咩？」我繼續用我嘅常識努力答。
 
「有咩好驚？已經慣咗。」
 
等等…呢句有啲唔對路。
 
「『慣咗』？你哋成日答呢班車架？」
 
「…」「…」
 
「九龍幾時有電車架？你哋第一次搭呢班車係幾時嘅事？呢班車乜有時間表咩？」
 




「…」「…」
 
愈問，我個心…
 
愈寒。
 
「你哋唔打算番屋企架？咁你哋做緊咩？」
 
「…」「…」
 
佢哋點解要上呢班車？
 
「你哋去緊邊呀！」
 
「…」「…」




 
上車嘅其他鄧麗欣物體，係為咩上嚟？
 
落車嘅鄧麗欣物體，又係去緊邊？
 
「答我啦！你哋去緊邊呀！」
 
眼前兩個鄧麗欣物體，笑咗一下，就冇再俾反應。
 
呀呀呀呀────！！！
 
佢哋想點架！唔得，我一定要落車！
 
我又走咗去車窗邊，幾層樓高嘅電車真係第一次，九龍嘅電車又係第一次，乜都係第一次，我唔想要呢啲第一次呀！咁高點跳窗呀！我要落車呀屌！
 




我隻手開始驚到震，冷汗多到焗完桑拿咁，成個身又凍又熱，想沖個涼，又冇得番屋企。
 
屌…點算呀？
 
我雙手插袋，點到裡面嘅電話。
 
「…」
 
係喎！我有電話架喎！呢度係九龍，收到電話架嘛！