《如果時光倒流，我依然會選擇愛你多一次》

「恭喜王子又通過咗考驗喇！咁之後就會嚟到我哋嘅終極考驗，王子你有冇問題？」 

「冇。」唉～呢啲考驗濕濕碎啦～根本就難我唔到。 

「太好喇～而家就等我而家詳細咁同你講解一下終極考驗嘅任務啦！任務就係你要去人間....」

「咩阿？！人間？！」唔係掛.... 

「無錯！要成為一個好嘅地獄統治者，就要拋開自己嘅感情，你嘅考驗就係要去人間，同一個女仔拍拖，跟住分手，學識點樣控制自己嘅情感，令到你成為一個唔會俾感情影響嘅死神。到你成為咗一個成功嘅統治者，你就可以係煉獄果度娶你嘅王后。而你嘅身份係一個中學生，你有一個禮拜嘅時間準備，有冇問題？」 



「冇。」 

「好！咁我哋一個禮拜後再見！」 唉～真係麻煩，要去人間度進行考驗...仲要做學生... 

成個地獄好大，成為咗統治者就可以統治成個地獄，唯獨是煉獄我哋係唔可以干預，地獄負責管制靈魂丶裁判，而煉獄就係負責懲罰嗰啲生前有罪，或者犯咗地獄天條嘅靈魂。 

「點呀？搞得掂嗎？」一把陰沉嘅聲音係我後面傳過嚟。 

係父王？ 



我向後一望，果然！係父王「搞得掂～係麻煩少少啫。」 

「你得嘅～你個妹今日已經去咗人間，佢早啲實習還境，係你有需要嘅時候會幫你架喇！」 

下？！又唔係阿妺考驗，但係佢就要再早過我去實習？唉～真係辛苦佢.....
阿妺佢由細細個開始已經好堅強...雖然係有少少硬頸...但係我哋成日一齊玩，關係唔錯架... 

「明白。」 

「好！咁你好好準備一下。」父王講完就轉身走咗。



唉！一個星期後就要落去人間，真係麻煩...唔係喇...周圍行多最後一次先！係喎～其實成個地獄我有邊到未去過呢？... 

山脈...？ 

係！山脈禁地！一於去睇下先... 

片刻後... 

呢到就係山脈禁地？無咩特別啫～ 

我行入少少再睇下，竟然俾我發現咗一個山洞？！又會咁隱密嘅？我再行入啲見到有個黑影坐咗喺度... 

邊個嚟架？ 



「你係邊個？」我望住背住我嘅黑影，唔知點解，感覺有啲唔妥... 

黑影掉轉頭，我好清楚咁望到佢係一個滄桑嘅阿伯，點解佢會一個人係到嘅？ 

「你...係...王子？」 

「無錯！我係！咁你係邊個？」 

「我係邊個唔重要，王子你有冇興趣跟我學重返術？俾你改變一啲好重要嘅歷史...」 

重返術？改變...歷史？ 

「唔需要，我無需要用到呢啲嘢。」講完我就轉身走，個阿伯真係莫名奇妙... 

「呵！你總有一日會返嚟搵我架...王！子！殿！下！」阿伯細細聲咁講...



 一星期後... 

「準備好未？」父王問我。 

「嗯！準備好！」 

「你去到會有一間屋，一個新身份，好好完成呢個終極任務啦！」 

「知道！」 

「好！咁就出發啦！加油！」 

「噠！」我瞇埋眼，達咗一下手指，應該好快就到人間。 



「碰！」果然...一秒都唔使...瞬間轉移真係好使好用。 

我擘大眼... 

係...牆？ 

櫃...？ 

枱...？ 

呢到就係我間屋？ 

唉～無所謂啦！ 

咁...我叫咩名呀... 



走圍睇下先... 

「碰！」好痛！咩嚟架？書枱？咦？點解咁痛嘅？唔通落到嚟我會感受到痛楚？係地獄嘅時候除非好重嘅傷先會有痛楚，係人間連踢到張枱就咁痛...睇嚟我要慢慢習慣下... 

係張枱隔離嘅係書包？ 

我打開入面見到本簿寫住洛...進峰？ 

洛進峰...係我個名？ 

都還可以呀！ 

咦？枱面有張字條？ 

「哥！今日係你插班呢我哋學校果日，書枱隔離有個書包，我都唔執好晒你需要嘅嘢㗎喇，入面有啲簿，我寫咗你個名，衣櫃入邊掛咗你套校服，呢度有張地圖，教你點樣去我哋學校，同埋我俾咗㗎單車你，你踩單車嘅話好快就會到㗎喇，自己執生啦。啊！仲有！記住唔好遲到，8:15之前要返到學校。」 

真係咩都幫我準備好晒喎...唔怪之得父王要阿妹早一個禮拜落嚟啦～

8:15分... 

我望一望個鐘，死喇！依家8:00！不過我有瞬間轉移，唔驚！ 

咋咋淋換衫先！ 

換完衫，孭好書包，準備出發！ 

「噠！」我擘大眼...咦？點解我仲喺房嘅？「噠！」「噠！」唔通瞬間轉移喺人間用唔到？！ 

大鑊喇咁鋪...