無得諗,終於要正式上堂。
彤:「Stand up!」
「Good morning Miss Lam。」
林:「呀…又要教書…喂!你哋係咪上年教咗quadratic㗎喇?」
豪:「教過下咁啦,Miss。」
林:「係囉,教過無理由再教㗎嘛,啱唔啱,人類唔應該浪費時間係呢啲事情上面。」
「Miss,但係第一課係AS同埋GS喎?」
林:「係呢本書唔好囉,AS同GS好麻煩,要備課,quadratic就唔同,學一次用一世。」
Miss無理我哋自己憑空喺黑板寫咗八條數出嚟。
林:「嗱,收埋你哋嘅書,求祈攞張白紙出嚟,同我計咗呢八條數佢,呢度有晒a加b square,a減b square,a square減b square同交叉相乘,呢個唔係功課,唔係quiz,唔準睇隔籬呀下,做埋啲藞苴嘢我罰你抄數學書㗎。」




乜…咁大檸樂呀,玩啲咁嘅嘢?我永遠係臨急抱佛腳㗎喎,點解要咁攪我?
最後我出盡全力做咗五條,同隔籬位交換對完我啱四條,詩敏啱咗七條,但…代表咗乜?
林:「好喇,呢八條數就係決定咗你哋嚟緊嘅功課做啲乜,如果全對或者錯一條嘅,恭喜你哋,我都唔想要你哋做功課,但我為咗交功課畀校長,就麻煩你哋做3.1到3.3,8嘅倍數嘅題目,如果係錯兩至三題,就做4嘅倍數,錯四題或以上,係最開心嘅,唔該做所有單數題目,咁就想抄都難。」
無嘢呀?三part嘅單數題?成三四十條喎!
林:「另外,我相信我哋班同學係好守望相助嘅,我想問下有邊啲同學攞滿分?」
有七個人舉手…其中包括一鳴同阿Wing…而Miss Lam佢行咗一圈睇完佢哋啲答案之後…
林:「好,今次就揀一鳴同阿詠兩位同學幫下大家啦,錯四題或者以上嘅今日就放學留喺課室度做數,最好做晒佢啦,功課都係聽日交,唔好搞到一鳴佢哋無學放呀下…咁我當教完3.1到3.3,抖返陣先,你哋可以做下功課,或者睇下3.4啲quadratic graph。」
唔單止我呆咗,連我後面兩位都係,但…我哋無人敢出聲。
結果,都唔使等到放學,我哋敗者區喺小息已經瘋狂睇返書做數,有邊個估到第一堂就咁好玩。
鳴:「頂,你上年識做嘅,做乜而家會錯!」




我:「考完就還返晒㗎啦,點知要突然做數!」
鳴:「你最好同我醒醒定定放學前做晒佢,唔好搞到我無機打得唔得?」
我:「你黐線咩,成四十題數,一題三分鐘都要兩個鐘啦!我係咪唔使上其他堂呀!」
敏:「唉,真係無眼睇。」
其實我一向對自己成績都係過到關就算,記憶力唔差加啲啲小聰明,考試前先嚟溫通常問題不大,但…我望住詩敏佢好似有啲失望咁,我竟然第一次嬲自己少少數都計唔掂。
詠:「算啦,一鳴,我上年都聽過師姐話Miss Lam上堂乜嘢五花八門嘅花臣都玩過㗎喇,不過佢教書係OK嘅…志華係你好朋友嚟㗎嘛,咪幫下佢囉,你又可以當溫書,重有我喺度。」
鳴:「咁…好啦,唯有係咁。」
本來躁躁哋嘅一鳴俾Wing講兩句就即刻溶化咗,真係吖…但Wing講嘢真係溫柔婉約,言談有度,就好似有一層藝術嘅包裝咁,大家聽完都會好舒服,唔通師姐真係唔同啲嘅?
鳴:「死人頭,食飯喇!」
我:「做埋呢一條,好快!」




鳴:「放學先慢慢做啦…」
個死人頭好似一諗到可以同Wing姐一齊留堂,之前嘅愁容就飛咗去月球,心花怒放咁。
敏:「點呀!唔同女神食飯喇?」
彤:「噗…哈哈哈!」
我:「行喇。」
真係唔講都唔記得,今日係除咗啲乜大食會,聖誕聯歡之外第一次同詩敏佢食飯,就係咁我哋一行五人離開咗學校。
鳴:「係呢,咁我哋要去邊食呀?」
我:「大家樂好唔好?」
無錯,嗰度根本係我同一鳴嘅飯堂,有時玩到夜咗屋企無煮飯或者對冷飯無乜興趣就會去鋸塊扒咁。
敏:「唔啦,有啲貴…」
我:「最多都係差十蚊八蚊啫。」
敏:「咁你自己去啦。」
我:「做乜喎,我請妳食囉。」
敏:「唔使你咁好心呀!」
彤:「我哋行啦,唔好理佢哋。」




做乜喎,無端端都可以黑面嘅…
我:「我又做錯咗乜呀?」
鳴:「唔知呢…」
詠:「傻瓜。」
就係咁詩敏同曉彤兩個帶咗我哋去大排檔,咁都無嘢嘅,食大排檔我都好OK嘅,點知一坐低…
敏:「你唔準食得貴過我呀下!」
我:「咁…妳諗住食乜呀?」
佢指一指個牌,三餸車仔麪連豆漿,22蚊。
咁…即係玩我啫…
鳴:「我唔使跟住呢條規矩㗎可?」
敏:「點會關你事呢,我罰佢咋嘛。」
詠:「你大件事喇,激嬲女神。」
彤:「唔好理佢啦,我哋去嗌嘢食先!」
22蚊…但我真係唔太想食車仔麪…重可以有乜選擇,點解我咁命苦。
鳴:「唔該叉油雞飯轉雞髀,凍奶茶吖。」




頂…呢條友重要喺我隔籬食隱藏餐牌,過份得佢吖,明明30蚊就可以大飽口腹…我睇勻周圍啲餐牌,除咗快餐ABC,差唔多無嘢係22蚊可以食到,重要…差一蚊無得轉凍飲…
結果只能投靠螢光咖喱牛肉飯,熱奶茶…而啲女生呢,三個都係車仔米粉,生菜,蘿白,冬菇膽拖牛腩,魚蛋,雲吞,睇嚟仙女都係靠食草同吸仙氣大嘅,咦…有啲唔對路喎。
我:「又話三個餸嘅?點解有四個?」
敏:「睇清楚啦!著校服送生菜呀!」
鬼知咩…我從來都唔食車仔麪,我剩係知晏晝著校服可樂免費轉紅豆冰…
我:「師傅,請問可唔可以畀杯冰粒嚟呀?」
傅:「乜嘢話?玩呀,想要凍做乜唔嗌凍?」
我諗天下間都無乜人會為咗呢一蚊迫自己飲熱飲,你知啦,大熱天時大排檔喎…
我:「唔係呀,係我身邊位女同學要食藥,杯滾水熱得滯呢,麻煩你吖。」
傅:「咁呀,見係靚女,益你啦。」
敏:「頂你吖!出賣我,你係咪食錯藥?」
我:「吓…我又做錯?」真係舉手投降。
敏:「算,唔得閒理你。」
詠:「志華你真係好搞笑…」
呢個時候我feel到褲袋震咗兩下。




『同三個靚女食飯?你都斗膽喇,罰你~無我指示今日唔準放學~』
我下意識環視四周,係的確有我哋學校嘅同學,但好多都唔同form,而且望落都好正常;咪住,詩敏佢喺我隔籬,最正常,兩隻手喺枱面夾緊米粉食;曉彤就一路食嘢一路玩電話,佢唔會猖狂到咁呀;而Wing就一隻手枱面一隻手枱底,一鳴遮住晒我都睇唔到佢枱底隻手…但無論點都係意義不大,條友可以觀察完我行開先send message。
鳴:「你搞乜呀,神不守舍,神神化化咁…」
我:「無呀,無特別…」
敏:「同女神食飯驚俾人講閒話掛。」
詠:「有乜好驚?全校都知啦而家。」
敏:「係囉,我都未擔心,都唔知佢搞乜。」
彤:「咁無膽就唔好追女神啦,好心你。」
敏:「我勸過佢㗎喇,唔明佢點解咁睇唔開。」
彤:「哈哈,詩敏妳咁樣叫唔叫當眾請佢食檸檬?唔好咁狠心啦。」
我:「乜喎,追女神…可以代表一種生活態度,一個夢想,就算得唔到…都可以欣賞一下。」
係呀,我係死雞撐飯蓋,真係講完都覺得自己⬛️;其實只要佢簡單嘅一句拒絕,話唔想我煩住佢我就會自動消失,但偏偏佢就係咁模稜兩可,而且我覺得佢分明係要喺其他人面前為難我,我唔知佢係咪真係想我知難而退,但越係咁我就越唔可以退縮,縮就輸一世,俾人笑得更加甘;而且,我覺得佢私底下對我係唔同嘅,雖然唔太瞭解佢,至少都覺得佢唔討厭我,就算佢只係樂於見到有隻玩具喺佢身邊,我都依然樂意擔當呢個職責…
詠:「都係嘅,就算追唔到,都係一種經驗嚟,至少目標係自己鍾意嘅女仔,總好過無無謂謂搵個人亂咁拍拖,正所謂釣勝於魚吖嘛,我支持你。」
Wing姐,妳真係天使嚟,如果唔係我誇下海口話要追詩敏,我諗我已經一早對妳動情。
話咁快,就到咗放學嘅鐘聲。
已有 0 人追稿