時光飛逝,轉眼就嚟到四月頭嘅一個星期四。
“0.111”!
我信統計學,我信expected value,我信probability density funtion主宰宇宙並欽崇bell shape curve於萬有之上…
我:「點算好呀?」
敏:「恭喜你喎!你諗你喇。」
好一句你諗你,真係夠晒不負責任,都未見過啲咁嘅女朋友。又係嘅,我哋已經日對夜對,多一日拍拖日都唔會有啲乜額外嘅感覺,所以佢好冷靜,可能只係等緊我帶佢去唔知邊度玩。
“詩敏,難得第二日拍拖,不如我哋上床先咯。”
我好想同佢咁講㗎,然後應該會換嚟「啪!」嘅一聲再俾佢遺散直接分手就連兵都無得做,咁我就可以疊埋心水永遠放棄佢搵初音妹妹做愛,進行活⬛️動作⬛️⬛️⬛️⬛️,然之後啲⬛️就可以經過第二個入口進入佢嘅身體入面,真係諗起都…
黐Q線!我到底喺度諗緊乜。
我:「不如就聽日咯。」




敏:「吓,聽日係星期五,要返學㗎喎。」
我:「我喺度諗,如果我哋真係拍拖嘅話,都唔係日日放假出去玩㗎,其實大部份時間都係平日嚟,所以我想體驗下呢種生活。」
講完都覺得自己戇⬛️,因為呢種平日生活真係唔知會同平時有乜分別,但係我就係想知,那怕係只有1%,我都想知道我女朋友有乜可以額外嘅嘢畀到我,如果無嘅話…咁抽唔抽得中真係無乜分別。
敏:「好,我會配合你,但你唔準俾其他人知道我聽日係你女朋友㗎,唔好諗住有一日就玩到好似一鳴同Wing咁,如果唔係我都唔介意下個禮拜一同你鬧分手大肆派花生。」
係,一鳴兩隻嘢已經復合咗。
我:「點會喎,地下情我鍾意呀。」
當全世界都已經覺得我同佢係地下情,終於可以試返一日,呢種感覺都幾搞笑。
敏:「乖喇,咁我哋而家專心上堂先。」
我開心到好似呢一刻已經開緊奬咁,女朋友呢家嘢…其實咪一直坐咗喺我隔籬囉,嘻嘻。
鳴:「死人志華,你做乜食車仔麪食到嘴角含春咁,你係咪要搞到我無胃口先安樂?」




我:「乜喎…我感嘆緊有車仔麪食太幸福咋嘛。」
詠:「你唔好理人啦,可能女神佢啱啱派完兵糧呢,你恨唔嚟㗎喇。」
詩敏佢半反白眼望咗我一下。
敏:「唔係掛…佢咁嘅樣,點派得落呀?」
彤:「夠喇!你兩對…我下年music day真係要唱兩次電燈膽先可以發洩到我嘅不滿呀!」
詠:「好呀,我都想妳唱兩次呀!」
彤:「吓,點解呢?」
詠:「妳要唱兩次咪即係我哋重未散囉,咁唔係應該值得開心一下咩?」
呢對拖友真係睇到人眼冤,佢兩個分分合合咁已經化到可以隨便將分手呢兩粒字掛喺嘴邊。
敏:「嗱,唔關我事㗎,不如下年我同妳一齊唱吖,好唔好呀?」




彤:「如果同妳就唔唱電燈膽啦,我哋可以唱露斯瑪莉。」
詠:「哈哈,咁好震憾喎,又派花生?」
鳴:「其實我唔明妳哋講緊乜,志華明唔明呀?」
我:「吓?我無諗過要去明喎…」
彤:「算把啦!你兩個永遠都唔好明。」
我心諗呢啲嘢我識條毛咩,你咁想知咪問你自己條女囉…
到咗放學送詩敏返屋企。
敏:「喂,你聽日有無諗住想點㗎?」
我:「真係無喎,只係好似想平時咁過,同自己女朋友一齊。」
敏:「我真係服咗你,你想點就點啦…」
我:「妳係咪唔想咁?如果唔鍾意我改過第二日啦,或者妳有無乜地方想去想玩?」
敏:「唔係,我會尊重你,咁…聽日六點九嚟接我返學啦。」
我:「六點九!咪差唔多早咗成粒鐘咁多?」
敏:「係咪想反抗女朋友呀?唔想對多一粒鐘?」
我:「點會喎!我聽日一定準時六點九喺度等。」




敏:「你唔好唔知醒呀!夠膽你就試下,我真係女朋友咁嬲你,即日同你分手我都做得出㗎!」
女朋友,係一種無嗰陣會好想要,到佢日日喺你隔籬就會怕咗佢嘅生物;點解詩敏好似重興奮過我咁嘅,睇嚟佢真係好想同我拍拖做我女朋友。
嗯,一定係咁,我唔係呃緊我自己。
到咗第二朝,我唔夠六點半就出門口,六點八前已經到咗佢樓下;第二次同佢拍拖已經無咁緊張,而且今日係正常返學,係睇下我哋會有乜同平時唔同嘅嘢發生啫。
敏:「早晨,男朋友!」
隔咗幾個月再聽到佢咁打招呼,真係感動。
我:「女朋友…早晨。」
敏:「呆咗咁做乜呀,行啦。」
佢唔止講,而且…
我:「詩敏,妳…拖住我?」
敏:「第二日拍拖喇,拖下手好正常啫。」
原來第二日就可以,我差唔多開心到識飛,由表白到而家過咗九個月終於拖到佢隻手;我唔識形容,呢種感覺好實在,至於隻手白唔白滑,幼唔幼嫩嗰啲已經唔再重要,因為呢隻就係女朋友嘅手,而且係十指緊扣拖到實一實,我哋重著住校服添,好彩由於時間早條街都無乜人,又或者未瞓醒趕返工嗰啲都唔會理我哋;呢一刻,好似成條街都係畀我哋行晒咁,為咗慶祝我兩個再次成為情侶。
如果第二日可以拖手,咁第三日應該可以惜惜,第四日就攬攬摸摸,第五日就可以除衫,到第六…死火,我又諗咗去隻hgame度添,但我覺得咁諗都唔過份吖,但再諗一諗,如果好彩嘅平均每四個月中一次,到第六次都應該中六…
哈哈,唔重要啦,為咗女神我等得,最緊要係讀好書一齊先返原校中六,如果唔係就講乜都無用;係呢,唔知詩敏而家心入面有幾多粒好感心心呢?我諗起碼都有兩粒半喇掛…
早到咁起身我都估佢唔會直接返學校,果然佢帶咗我入去街市,去到一個檔位前面佢鬆返開我隻手,係一間有熟食賣嘅粉麪鋪。




娘:「阿敏,嚟買早餐呀。」
敏:「係呀,老闆娘早晨。」
娘:「咦?有男同學陪嘅,唔通係男朋友嚟?」
敏:「嘻嘻,唔知呢…喂,係咪男朋友嚟呀?」
我:「如果係…就最好嘞。」
我唔敢認,又唔敢否認,所以呢…
娘:「哈,大個女喇,今日食乜嘢呀?」
敏:「喂,你決定食乜啦。」
我:「八條腸粉,六粒燒賣,兩粒粉果,兩粒牛肉…係咁多。」
其實我好少食呢啲,但而家望住我覺得好好味。
敏:「你嗌咁多!食唔食得晒㗎?」
娘:「佢同妳一齊食,幾多都食得晒啦,等我送多包炒米粉畀你哋啦。」
買完嘢離開鋪頭,詩敏佢又拖返住我隻手,而我另一隻手就搦住一大袋嘢食,一直行到返學校大門佢先鬆開隻手,呢個時候學校先係啱啱開門無幾耐,入到去雨天操場基本上得我同佢兩個。
坐低之後見無人我又捉返住佢隻手,而且放喺眼前面一路望一路摸。
敏:「喂呀…唔好咁變態啦,俾人睇到點算…」




我:「好難得我先可以掂到女朋友隻手,畀我好好感受下啦。」我重逐隻逐隻手指咁摸。
敏:「知喇,成日流流長,今日我隻手都係你㗎喇,唔使咁心急喎,咁樣我點食嘢喎。」
嗚…真係唔明點解我要等咁耐,明明佢都願意…
我:「呀…擘大口。」我拮咗粒燒賣喂畀佢。
敏:「呀…喑。」彷彿我重係喺床上面發緊夢。
過咗五分鐘到開始越嚟越多學生返嚟,我哋都識趣咁鬆開隻手保持返少少距離咁坐;當然,以我哋嘅知名程度大家經過都會唔小心咁望一兩下,最搞笑係我哋附近啲位完全無人坐。
我:「對唔住呀,應該今日又會累到妳俾人講閒話。」
敏:「無所謂,咁樣大家先知我男朋友惜我嘛。」
今日嘅女神就算喺學校都真係全心全意飾演我女朋友,睇到佢呢種表現,我重有乜可能放棄做佢隻兵,為女死為女亡都抵啦,嗚…
食完個咁豐盛嘅早餐,簡直就係由肉體飽到上心靈,我同佢就早啲上課室先,一齊溫下書備課咁,其實同平時都差唔多,只不過我個心真係好甜,第一次同女朋友一齊返學喎,唔知佢甜唔甜呢。
到咗上堂,本身都諗住無嘢㗎,而家嘅我都未至於會因為今日有女朋友而魂遊太虛,咪專心上堂囉;點知詩敏佢用隻右手手指尾㧻咗我兩下,初初我都唔明佢想點㗎,呆咗咁望住佢,但佢無怪我,個樣笑到甜絲絲又有啲鬼馬,跟住喺度捽我隻手指尾,呀!我就叮一聲明咗佢想點。
原來有個女朋友坐自己隔籬係可以一直勾住佢手指尾咁上堂,到佢要寫字嗰陣就抖一抖,寫完又再勾返住;呢種玩地下情喺班上面偷偷拍拖嘅感覺真係好刺激,好驚俾人發現唔知點算好;唔知一鳴佢哋初初拍拖會唔會咁嘅呢,不過睇怕就係我諗多咗喇,識咗兩個禮拜就同人搞上床,又點會識珍惜呢啲細緻嘅情感交流喎,話雖係Wing姐做主動啫…唔知會唔會等到有一日詩敏佢主動騎喺我身上面呢?
到咗lunch time…
敏:「曉彤呀…我要同志華去幫學校買羽毛球呀,今日唔同你哋食飯住喇。」
嗯?乜有啲咁嘅事,點解我唔知嘅?平時都係先生或者中六啲師兄姐買㗎。




然之後佢就捉咗我出學校,當然無拖手啦,因為附近周圍都係我哋學校啲學生,同佢兩個人食晏都好嘅,正當我諗緊商場有乜好食嘅時候…
我:「咦?商場係行呢邊喎…」
敏:「傻瓜,買你個頭呀,我想同你拍拖咋嘛。」
嘩!原來我女朋友咁為我著想,一分鐘都唔想我蝕咁,真係好幸福呀,唔知佢想去邊呢。
我:「咁我哋而家去邊呀?」
敏:「你屋企無人㗎可?」
乜話?咁突然!我首先諗到嘅嘢唔係其他,正正就係一鳴上年向我吹噓嘅嘢,同女朋友放lunch帶佢返自己屋企唔知做乜;呀,點算呀,我未準備好呀,詩敏…我…唔識做愛㗎,又無買condom,又唔知老竇嗰啲會收埋咗喺邊,好緊張呀…但我又好想要,詩敏妳唔係處女嚟㗎咩?點解會咁㗎?唔通係淫Wing教壞咗妳?放心,我會原諒妳,不過淨係喺我一個人面前咁淫好喇…
已有 0 人追稿