【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 神不守舍的女神

十二月，可以話係我哋最後重可以玩嘅日子。
十一月打完學界羽毛球之後先生都叫我哋中五中七嘅唔好再去練波；我心諗，你估真係好想練波咩，都係嚟玩同做下運動啫，唔通練多幾日會上到D1咩，唔好玩啦。
跟住到音樂日，今年再無熟人去唱single，唔知係因為顧住讀書吖，定係曉彤唔再做電燈膽吖，定係Wing已經懶得分手；不過呢，我哋五班中五決定一齊唱『告別校園時』比個高下，其實啲先生都幾反對㗎，反而Miss Lam就無乜所謂，重同我哋一齊練一齊唱一齊癲。
跟住就到聖誕聯歡，詩敏佢已經同我夾定唔好送嘢畀佢，一切保持低調，因為兩個女人日日纜住我條頸巾都真係有啲礙眼，費事又俾人抄花生，難得全世界都已經慣咗我係一隻兵。
聯歡就都OK好玩嘅，不過有啲成績差嘅同學知道自己準備要走，難免唔係人人都咁開心；肥豪佢訂食物今年再加碼嗌大家樂到會，貴就貴咗啲，但係物有所值嘅，好多人今年係最後一個聖誕聯歡，所以錢銀嘅嘢就無咁多計較，當買個回憶囉，呢餐亦都成為咗我同詩敏嘅第二餐大家樂。
另外重有一樣嘢，就係調位，而呢次係呢兩年嘅最後一次調位。
詩敏右手邊拍住窗口同女仔坐，一鳴喺佢左斜後，曉彤喺左手前邊門口位，我喺佢後面隔咗一個男仔，坐我隔籬嘅係Tamama，真係令我非常安心，Wing姐喺正我後面，傻強同肥豪就一齊坐喺中間。
重有半個鐘先走得人，Miss Lam就當然人間蒸發，我哋咪又喺度互相熟絡囉…重熟乜鬼吖，都成兩年，梗係喺度謦欬玩啦！
我：「Tamama，其實你中三嗰年最後有無表白？」難得坐隔籬，終於忍唔住問佢呢個影響我一生嘅謎題。
T：「無呀…最後都係唔敢…點諗都無希望。」


我：「哈…原來我咁大犧牲幫你，最後得個桔。」
T：「乜喎，你而家唔係好開心咩…好彩無學你，我先唔想做人哋成世兵。」
詠：「吓，原來佢嘅當兵之路係關你事㗎？」
於是乎，我同Tamama就將上年發生嘅事重溫一次畀Wing同佢隔籬個女仔聽，個女仔中三唔同班唔太知原由，兩個都聽得津津有味。
詠：「Tamama，咁樣唔得㗎，下次再有鍾意嘅女仔要大膽表白喇。」
T：「但係我又唔係受歡迎，無端端…好怪。」
詠：「點怪都怪唔過你隔籬嗰個啦，如果你想受歡迎就要大膽啲，外向啲，但唔使好似佢咁癲。」
好明顯係無人會理我死活。
T：「但係我好驚俾人拒絕。」
詠：「表白最重要唔係得到個女仔，而係行出第一步去令個女仔開心，知唔知？」


T：「我去表白…女仔真係會開心？」
詠：「梗係啦，你而家高咗大隻咗又靚仔咗，已經唔係二等兵喇，呢隻嘢就真係二等兵，你去同女仔表白梗開心。」
雖然Wing姐佢講得有啲誇張，但係都無講大話，中三嗰陣Tamama得米六唔夠，佢而家已經差唔多拍住我，即係差唔多米七；係呀！我終於高過詩敏喇，個女神一直都鬼死咁高，之前都只可以同佢一樣高，而家佢167，我171，哼…不過都係無乜用，女神嘅高度從來都唔係用身高嚟衡量。
T：「如果佢唔開心呢？」
詠：「如果佢唔開心佢就唔係好女仔，以後都唔使理佢。」嘩，原來有咁嘅logic，我都無諗過。
T：「開心嘅話就係好女仔？」
詠：「係呀，你同我表白我都開心㗎。」
T：「點得…妳有男朋友…」
詠：「其實都無乜關係，呀，啱喇，佢無男朋友。」
T：「但係…我都未係鍾意佢…」


「未係鍾意…即係遲啲會鍾意？」
有Wing喺度，總覺得一切都會謦得好smooth，就連佢隔籬個女仔都開心玩埋一份，一個咁好相處嘅女仔，都唔明點解成日會同一鳴鬧架；呢個問題，就好比詩敏對我有意思，點解重一直要維持現狀，真係百思不得其解。
T：「我…我都唔知。」
呢個時候Tamama塊面已經俾Wing玩到紅晒。
詠：「咁唔好表白住，你學下讚佢先。」
T：「妳好靚女…」
「多謝…」
詠：「好嘅嘗試，但下下讚人靚女太行，最好就係觀察下佢有乜特徵先…」
真係服咗佢哋，Wing姐唔教人溝女真係嘥晒，等我學下先…女神妳靚到月亮都收咗皮呀…即係閉月羞花沉船落硬…好，唔玩，幾時放學呀…
我：「今日…去唔去溫陣書先？」
敏：「我唔係幾舒服，想返屋企抖下。」
我：「咁我送妳返屋企先。」
其實今日都覺得詩敏有啲唔妥，悶悶不樂無乜精神，我心諗我都無做錯嘢吖，而且佢上個禮拜已經叫我唔好送禮物畀佢；我諗可能係溫書壓力大啦，加埋又轉季，身體未必適應到；不過我今日其實都重有嘢要做，佢返去先都係好事嚟。
我首先返返學校。
我：「喂，你就話等Wing放補習無所事事啫，搵我返嚟做乜呀？」


鳴：「乜喎，搵你溫下書都得呀？」
我：「當然得啦，但你咁搵我實有啲嘢嘅。」
鳴：「你平安夜嗰日得唔得閒呀？」
我：「發乜神經呀？你唔係想約我去大家樂食聖誕大餐呀？」
鳴：「你咁講即係得閒啦？無約詩敏咩？」
我：「人哋女神嚟㗎，話約就約咩…我諗最多嗰幾日都係會同佢溫下書，佢夜晚應該唔會畀我。」
鳴：「其實我係想約Wing…」
我：「屌，咁你搵我做乜，撩架嗌呀？」
鳴：「唔係呀…我同Wing佢唔知點咁，兩個人嗰日出嚟…又唔知佢想唔想…」
我：「妖，你咪同佢去開房囉，平安夜咪啱晒。」
鳴：「我就係唔想咁吖嘛，我想多啲人氣氛好啲，如果你得閒，詩敏又肯同你出嚟嘅話…」
我：「我哋兩對咁樣好啲咩，我覺得都係怪喎。」
鳴：「如果再嗌到多啲人都好嘅。」
我：「咁大陣仗，使唔使去酒店食buffet添呀？」
唔係講笑，中一嗰陣我哋兩個無聊得滯已經玩過呢樣嘢，重俾經理笑住口質問我哋有無帶錢嚟。


鳴：「咁又唔使，呢啲日子太貴。」
我：「我無聽錯呀？你都會嫌貴？你請埋Wing都好閒啫，我就話說服詩敏好頭痛。」
鳴：「唔係呀…雷曼呀，次按呀，你屋企無嘢咩？」
我：「少少啦，佢哋話好彩走得快，唔見咗一球到…睇佢哋個樣就無乜嘢，你哋…好傷？」
鳴：「傷啲啦…好在未使賣樓住，叫我慳啲使，但我點慳都無乜影響啫，三四位數同六七位數嘅分別。」
認真講，我哋呢啲出身嘅小朋友，對錢嘅概念係深刻啲嘅，一百萬係幾多？好多好多，但唔夠買似樣嘅樓，夠我食足三十年一日三餐大家樂，大概係咁，總之我責任都係畀心機讀書。
我：「唔緊要啦，慳啲咪食Pizza Hut囉，對我嚟講重方便，我晏啲再問下詩敏得唔得。」
同佢溫咗一陣書之後我就趁機閃人，因為我重有嘢搞。