我:『一鳴話不如平安夜一齊出去行下,當係考試前最後聚一聚,妳覺得好唔好?』
敏:『可以呀,淨係佢兩個?重有邊個呀?』
我:『其他人我要再問,咁我預妳㗎喇。』
又會順利到咁,我真係諗都無諗過;跟住我就要煩係咪再搵其他人,如果剩係得我哋兩pair,好似都有啲尷尬,話晒我同詩敏兩個又唔係拍拖,如果一鳴佢哋拖到實一實,咁我哋又點算好…都係搵啦,但搵邊個好呢?
由最近最方便嘅入手,Tamama,一約就約到。
咁既然有Tamama,約埋主席啦,雖然搵佢做電燈膽可能會俾佢鬧…
豪:「可以呀,重要搵其他人?」
我:「無所謂啦,六個都差唔多,又唔係班會活動。」小人怕尷尬,多人怕變失咗意義。
豪:「講起班會活動,係時候要謦下考完會考放榜前玩乜,不如到時謦埋啦。」
我:「使唔使咁早準備呀?而家個個溫書都無人理你啦,上次班會燒嘢食咪又係得我哋圍內十幾丁友,重要女都無多個。」




十一月重係熱辣辣,晏晝去燒嘢食,叫啲女去曬黑喂蚊當然睬你都傻,尤其曉彤嗰堆新friend。
豪:「放榜前唔同嘅,點都要整啲回憶出嚟。」
吖,真係唔經唔覺做乜變到咁浪漫…
豪:「咁啦,我叫多pair過嚟啦,好似差唔多。」
我:「吓,我哋班重有?定隔籬班呀?」
豪:「放心啦!到時畀個suprise你哋!我去約。」
真係搞乜鬼…都好嘅,最後重有一個難題。
我:『曉彤,我同一鳴肥豪Tamama佢哋諗住平安夜去尖東行下鬆一鬆,唔知妳有無興趣?』
我專登唔提詩敏,因為真係唔知佢哋搞成點,又唔想用詩敏個名嚟大佢,但我咁樣問佢實feel到係會有詩敏同Wing。
彤:『好吸引喎,不過我嗰晚有節目喇,會同其他女仔去唱K,下次先啦。』




謝天謝地,被佢婉拒真係太好…我就盡咗責任問佢證明我哋無isolate佢,而到時又唔會面阻阻,我都幾驚佢兩個咁近距離一齊纜住條頸巾。
然後到咗平安夜,我哋約咗喺佐敦嘅Pizza Hut等,平平地嘛,而且尖咀一早爆晒;我同一鳴兩個一齊出門,會合詩敏同阿Wing就搭車去佐敦;呢種感覺幾好,兩個女仔坐埋就有欬謦,我哋都少咗好多壓力;去到目的地兩個毒撚就已經攞定位等我哋,Sorry…唔係毒撚,係乖乖仔。
豪:「呀,嗰兩隻嘢唔係甩底呀?噢!就講就到。」
詠:「章魚!?」
敏:「海馬?!」
除咗肥豪之外所有人都O哂嘴,佢哋…一對?!
呢兩位都係俾肥豪改花名嘅受害者,好在唔算難聽啫;女嘅叫張善如,取其首尾就變章魚;男嘅叫馬凱毅,頭兩字倒裝就變海馬。章魚係短頭髮白淨細粒平胸眼鏡妹,樣其實都OK,可惜唔會係初音妹妹;海馬就係高瘦長面正常男仔一個,外表style都木木地,真係有啲似海馬,順帶一提佢係之前坐詩敏隔籬嘅灰機男仔。
而你同我講呢兩隻海洋生物而家喺埋一齊?
馬,魚:「大家多多指教…」
佢兩個拖住手同我哋打招呼,面都紅晒。




豪:「咪玩啦!而家第一日開學咩?呢度全部都係自己人,快啲坐低啦。」
肥豪今次真係神來之筆,無端端有對新人喺度畀我哋玩,重要係熟熟地嘅,咁我哋呢兩pair嘅氣氛即刻寬容晒,因為唔使討論自己。
詠:「幾時開始㗎?」
馬:「啱啱,今個月。」
鳴:「咁上咗床未呀?」
魚:「喂呀…」
馬:「哈…我哋唔係你呀,邊有咁快。」
詠:「作死你呀!講乜呀?係咪想即刻分手呀?」
鳴:「對唔住…知錯,妳唔係早幾日話分手㗎喇咩?」服咗佢哋,都唔知攞景定贈慶。
詠:「我理得你呀,分手都要繼續做我隻兵,同我食咗兜薯蓉佢,次次都無人食。」
敏:「你哋點開始㗎?完全唔知嘅?」
馬:「無呀…我同章魚咁啱喺自修室撞到。」
豪:「計我話肯定係我幫你哋改咗對咁登對嘅名先會一齊,重要俾我踢爆你哋玩地下情,多謝我啦!」當然唔會有人理呢個主席。
詠:「一齊喺自修室溫書就一齊咗?」
馬:「雖然同章魚之前唔熟,但其實…我一直都覺得佢好人又靚女,女神又叫我做男仔要大膽啲…」




章魚佢嘅笑容甜到呢…
鳴:「但有人大膽咗換嚟無限期兵役,手都無得拖。」想打人,可惜又真係事實。
詠:「食你嘅嘢呀!」
T:「好羨慕呀,咁簡單就可以同女朋友過平安夜。」
馬:「唔好咁講啦,我哋都係啱啱開始,前幾日我重煩緊點約佢,結果肥豪就約咗我哋。」
魚:「傻豬,其實你直接約我點會唔出嚟喎…係呀,我哋兩個嘅嘢可唔可以唔好俾其他人知住呀,會考前我哋都係想專心溫書,唔想心煩。」
豪:「放心啦,佢哋幾個唔會唱人㗎,剩係識派自己花生嘅啫。」
敏:「都係嘅,呢幾個月咁緊張,考完試先嚟慢慢拍拖都唔遲啦。」
女神咁講真係好有道理,我望一望佢,佢又望一望我,唔通…可能我諗多咗,都係同計數機搏鬥吧啦;細節就唔再詳述,總之呢餐飯我哋所有人食得好開心,一對地下情新人當然怕怕醜醜sweet到漏,一鳴佢哋又唔使剩係得嗌架同做愛,我又可以無端端同女神過平安夜,今次呢個聚會可以話係我識一鳴以嚟佢最有價值嘅提議。
食完飯我哋就一齊沿住Park Lane,經過九龍公園行去尖沙咀;其實你問我點解平安夜要成堆人出嚟玩?鳩hea囉,不過就成街都係我哋呢啲咁嘅人。去到戶外一鳴又攞返佢到頸巾出嚟綁到吊頸咁,當然詩敏佢都好識做。
去到1881就梗係打卡啦,不過真係好多人,女神按規矩係唔會同我影相嘅,我咪幫佢哋啲女仔影囉,同埋兩隻海洋生物,關於呢樣嘢我一早慣。
唔使問下一站就係海港城,都係嗰啲啦,又兜咗個圈行下,呢度啲嘢嘅價位同我哋呢啲學生關係不大;其實可以同我有關嘅,不過詩敏唔鍾意我送嘢畀佢…
我哋唯一嘅消費係一人一杯乳酪雪糕,都唔平㗎,神奇嘅係女神竟然俾我請佢。
唔多鍾意行街嘅肥豪提議不如去星光行機鋪打機,慶祝我哋個個夠稱入機鋪,三個女仔當然興趣不大,但我哋實在無乜嘢做所以就入去睇下,今次亦都係我同三個女仔第一次去機鋪。
今日咁嘅日子,入面當然嘈爆迫爆,好多大哥哥大姐姐喺度開party咁款;肥豪就企喺一部叫Drummania嘅鼓機前面睇。




豪:「佢哋識打鼓真係好鬼型!」
講緊啲八神頭嘅金毛大哥哥,係幾型嘅。
T:「不如我又試下玩先。」
豪:「吓?你蒲開機鋪㗎?」
T:「梗係唔係啦!小學學過打鼓咋。」
點知佢真係識玩,重打得唔錯,當然就一啲都唔型啦,呢啲嘢係講氣場唔係講分數。
一鳴就捉咗Wing去打槍game House of the Death,Wing當然手忙腳亂,一鳴就打埋佢嗰邊啲怪,比我想像中勁好多。
我:「搞乜鬼呀,你幾時蒲開機鋪㗎?」
鳴:「無呀,等Wing放補習太多時間,咪玩住等佢。」
我:「人哋去溫書,你走去玩,掂唔掂㗎?」
鳴:「唓,你理得我,顧掂你自己先。」
詠:「由佢啦,我都已經懶得理佢。」
聽到Wing咁講我同詩敏都有啲無言。
玩完一輪我哋就出去文化中心對開圍圈坐,一齊謦下欬,玩下鳩game,肥豪好堅持要商討一下放榜前要搞乜嘢funtion;不過呢啲唔係重點,重點係唔知點解肥豪同一鳴可以攞到一大堆diamond black汽酒返嚟,說好的十八歲以上才能買酒呢?
呢啲日子當然無人走得甩,有酒喺度就猜包剪揼輸咗要飲都會咁開心,三條女好快就Wing Wing哋,尤其係阿Wing;而由於我屋企雪櫃長期會有梅酒喺度,有時啲凍水飲晒我都會偷嚟飲,啲梅我更加勁鍾意食,所以呢…




玩到十一點幾我哋就準備撤退,始終太夜返屋企係會俾人話;我哋沿住海旁行去尖東,然後搭巴士走,唔知一鳴佢係咪真係送Wing返屋企嘞,總之我哋唔同車,得返我同詩敏…
已有 0 人追稿