125k釋出

敏:「嗯…」
彤:「對唔住!」
女人真係話喊就喊,我都未思考到佢走過嚟係想點,就已經烏低咗個頭抱住自己膝頭喺度喊,坐對面嘅詩敏都即刻哄埋去前面扶住佢,呢個時候一鳴都未坐低,企喺走廊度挨住張凳輕掃曉彤嘅背脊。
我都唔知點算…呢兩個女人嘅瓜葛,我實在無力插手,雖然我自己就係禍心。
詩敏用手掐開一鳴,過咗嚟我前面個位坐喺曉彤身邊,攬住喊緊嘅曉彤,曉彤就將個頭收埋喺詩敏心口入面;無奈嘅一鳴唯有坐去隔籬排嘅對坐位,而我都唔好意思坐喺度睇住佢兩姐妹傷春悲秋,所以…我都褪埋過去坐。
此情此景…實在係…不能承受的尷尬。
我:「考完oral呀?」
鳴:「嗯,你又係?」


我:「係呀。」

我:「中文…合格到嘛?」
鳴:「嗯,有溫書。」
我:「諗住揀乜科?」
鳴:「Physics囉…」
我:「我都應該係。」
即係話,睇怕我哋下年係會同班…
至於隔籬兩個女人就攬埋一嚿,我見到詩敏塊面都掛住一滴淚珠,慢慢流落曉彤嘅頭頂上面,染濕佢嘅髮絲。
鳴:「你望下出面。」佢指一指窗外。


我:「呀…好少布喎。」
鳴:「天氣熱吖嘛。」
我:「無Bra帶咁嘅?」
鳴:「用乳貼掛…」
我:「佢下面跌咗三份一忽肉出嚟。」
鳴:「係囉,勁想一下打落去。」
我:「唔好好似打我咁大力就得,會爛。」
鳴:「…,你都重未爛。」
我:「喂!喂!噢…」
鳴:「屌…個司機開咁快做乜!」


我:「你出去打柒佢囉。」
無咗風景,我哋又唔知講乜好。
過咗兩分鐘,本來翳熱嘅黃昏景色突然變成暗雲密佈,個天落起嘩啦嘩啦嘅大雨,水滴打落車窗拉出一絲又一絲嘅痕跡。
鳴:「唔知頭先條女會點呢?」
可想而知,無乜布嘅落湯雞。
我:「掛住人呀?落車跑返轉頭可能趕得切。」
鳴:「不如你示範下,我先無你咁鹹濕。」
我:「唔知係邊個教我玩hgame嘅呢?」
鳴:「係喎,有無玩龍如4?好好玩喎。」
我:「屌…你重有時間玩嘅?」
鳴:「咁都係溫兩三科啫。」
我:「我唔係你呀…我等緊GT5出。」
其實都唔可以話係等隻game,我係等緊隻game入面嘅新版Fairlady 370Z畀我揸下,坐就坐過兩次,點都想過下手癮。
過咗陣巴士終於埋到總站大商場底,其實…我同詩敏都唔係諗住嚟呢度嘅;去到總站點都要落車,但係曉彤就重係偎埋個頭落詩敏件衫度。
敏:「傻豬…起身啦…到站喇。」


只不過曉彤郁都唔郁,呢個女仔呢…實在係令人束手無策。
點知詩敏用兩隻手抱起咗曉彤塊喊包面,佢喊樣見過好多次就無乜好描述喇,然後詩敏一嘢嘴咗埋去…唔係蜻蜓點水嗰隻,而係啜到實一實,側邊就好難望到佢有無塞埋條脷落去喇。
我同一鳴都俾佢嘅舉動嚇咗一跳,呆咗企喺度,兒童不宜都係唔好望咁多,過咗十秒到詩敏終於拉到曉彤起身。
我同一鳴行先,個地底站焗到呢…而詩敏就拖住曉彤落車,一路幫佢抹眼淚。
鳴:「彤彤…妳無事吖嘛?」
嘔…噁…我以前都未至於會咁樣叫佢,搞到好似嗌BB女咁…如果係敏敏呢?嗯…有啲恐怖…好似嗰啲專色誘男人再落毒殺害嘅女間諜咁款。
彤:「走…走呀!」
鳴:「做乜呀…我做錯乜…」
彤:「唔要見到男人呀!」
就係咁,我哋四個上咗商場,為咗等曉彤唔要見到男人,我同一鳴只可以喺佢兩個身後幾米跟住行,我諗成條街都覺得呢度有兩個變態喺度跟蹤靚女…
女人真係好恐怖,平時行街已經夠浪費時間,而家佢兩個拖住手一圈又一圈咁行晒成個商場,再逐層逐層樓上,漫無目的又唔入去鋪頭,只係經過某啲時裝店或者手袋店會喺櫥窗前面跓足。
好彩詩敏係一個唔多行街嘅女仔。
話咁快,就已經七點幾。
鳴:「女人真係好麻煩。」
我:「而家先知?Wing無教曉你咩?」


鳴:「有…Wing佢而家點呀?」
我:「讀書,讀書,再讀書,單身,靚女咗。」
時不時我都會喺圖書館撞到Wing姐,總結出嚟就大致上係咁樣。
鳴:「乜鬼描述嚟?」
我:「我都唔知。」
鳴:「我哋要跟住佢哋行到幾時?」
我:「行到…天倒塌地摇撼之時…」
鳴:「妖,溝通唔到呀。」
最後行到上七樓圈嘅盡頭,係一間中菜廳。
鳴:「妳兩個…就算隻腳未攰…個肚餓未?」
詩敏同曉彤手拖手對望一眼,好似唔知點咁。
我:「咦,估唔到呢度都有佛跳牆食。」
佛跳牆,細細個我就好憎,本身我已經唔鍾意飲湯,入面重要有一大堆不知名物質,但每一次當有一盎送到去我面前嘅時候,父母都會再三叮囑我食乾淨,如果唔係就唔使指擬有咕嚕肉食,結果我就喺威迫利誘下接受咗呢個強權嘅文化。
直到近兩三年,我先領會到佛跳牆究竟係乜嘢一回事。
敏:「咁…我哋落去食嘢,坐低抖下?」


彤:「嗯。」
雖然我到而家都係唔鍾意佛跳牆呢樣嘢,但考完試食感覺都唔差,兩個女人就當然唔會同我癲。
行下行下,佢哋就飄咗入KFC,我哋兩個跟縱狂只有無奈咁跟埋入去,兩個美女坐到入一入嘅一張四人枱,而我其實都開始肚餓,就喺出面睇下有乜好嗌。
鳴:「考完試,竟然係食KFC…我寧願食佛跳牆。」
我:「差個零喎,你上去外賣一個落嚟食囉。」
鳴:「外賣就唔要佛跳牆啦。」
我:「點呀,蒸條東星班落嚟呀?」
鳴:「我想食福建炒飯…炸子雞都唔錯。」
我:「你應該感謝我哋而家唔使食麥樂雞。」
鳴:「但我想要嗰啲醬嚟點KFC雞。」
好耐無同過呢隻嘢謦欬,論合拍程度其實都係佢最好,因為生活環境相似,而且都係一樣咁鳩同鍾意食大家樂,雖然有拖拍又一樣無女人符。
我:「正經啦,都要醫飽個肚先㗎。」
鳴:「佢兩個食唔食㗎?」
我:「唔食咪我哋食埋囉,好肚餓呀。」
鳴:「不如試下要兩個大桶睇下食唔食得晒?」


我:「大桶咪大桶!怕你呀!」
於是我哋一人捧住一個大桶返去。
詩敏同曉彤黐到實一實,撓手兼拖住,眉來眼去之餘,細聲講又細聲笑,曉彤一時扁嘴又拍落詩敏隻大髀度,而詩敏就回返個鬼臉畀佢。
呢種感覺…就係情侶嗌完架,然後和好返之後嘅氣氛,通常都係會喺做愛之後,有啲唔知點好嘅感覺,嬲又未嬲完,但又覺得好開心同幸福。
不過呢,無論點睇都無我哋插手嘅餘地,我哋都好識做唔去打攪佢兩個,坐喺側邊嗰張四人枱度,重要隔多一個空位費事聽到佢哋嘅竊竊私語。
男人無咁婆媽㗎嘛,係咪?一切在心中就算啦。
我:「乾雞!」
鳴:「乾!」
一人揦住一隻雞下髀,輕輕一碰,開始進行我哋嘅施暴一桶雞活動…
敏:「作死你哋呀,顧住自己喺度食!」
兩個女仔褪咗過嚟我哋張枱,坐咗喺我哋隔籬,詩敏即刻攞咗件雞出嚟食,而曉彤就攞起咗件葡撻;曉彤望一望我,咬咗一啖件撻,好似有好多嘢想講,但一鳴同詩敏兩個喺度我哋又有乜可以講;我只係好想知,妳嬲唔嬲我都好,妳而家過得開唔開心?
一個大桶雞有八件,兩個女仔食完兩件就會停手,剩返六件係我哋所以已經開始捱緊雞,而個雞皇飯就當然係重未郁過嘅,齋食雞實在太寡,所以就一啖薯格一啖雞。
彤:「你兩個…係咪一齊緊?」
嘩!嚇到我差唔多將啲雞皮炸粉碎都噴埋出嚟。
隔籬嘅詩敏就噗哧一笑,望一望曉彤,又對住我擺出一個意味深長微笑:「唔係喎,無一齊緊。」
彤:「點解唔一齊?因為…我?」
敏:「嗯…又唔只係咁嘅。」
彤:「咁係因為點解呀?」
敏:「又唔係未同佢一齊過。」
彤:「吓…妳哋幾時一齊過㗎?唔通…」
曉彤望住我,帶住三分疑惑,三分怨恨,三分傷心,剩返一分飲奶力啜咗一大啖可樂入口。
敏:「放心啦,佢唔會敢背叛妳,我亦都唔會俾佢有機會咁做。」
彤:「即係好耐以前做兵嗰陣已經一齊…咁做乜…重要玩初音遊戲?」
一鳴聽到初音兩隻字當然不明所以,但係就睇得出佢眼角一郁喺度分析緊佢哋講乜。
敏:「咁又唔係喎…嗰陣真係唔算一齊。」
除非我係咁抽中計數機啦。
彤:「你哋究竟係幾時…點解我完全唔知…」
敏:「唔好知,係秘密嚟。」
彤:「咁你兩個唔諗住一齊?」
敏:「嗯…好似而家咁,唔係幾好咩?」
詩敏又望一望我微笑。
我:「係…幾好呀。」
彤:「你兩個真係好奇怪。」
敏:「哈,咁妳同一鳴又點呀?」
彤:「妳理得我哋吖。」
出奇地一鳴同曉彤都面紅,你哋咪又係咁趣緻。
敏:「你哋就好,考完會考日日放假,下個禮拜就到我考試…」
彤:「詩敏妳放暑假有乜做?」
敏:「打波囉。」
彤:「淨係打波?」
敏:「嗯,打完先再算…不過睇怕要開始溫書。」
彤:「一唔一齊去旅行?」
吓!乜嘢話?咁樣…得唔得㗎?
敏:「我哋重要練波喎…而且旅行好貴…」
彤:「叫呢條粉腸請妳去咪得。」
敏:「無啦啦做乜要佢請我去旅行喎。」
彤:「嗯…陪我玩下啦。」
任性嘅曉彤唔只識對住男人扁嘴,對住女人一樣得,就連詩敏都怕咗佢。
敏:「咁你哋諗住去邊度玩呀?」
彤:「未知,重諗緊,唔好再係台灣就得。」
鳴:「我諗係得你先會陪我由沖繩玩到上北海道…」你同我講都無用㗎…自由係有代價。
彤:「去兩個月我咪陪你咁玩囉!」
鳴:「明明兩日就可以上到去…」
彤:「咁你留低張信用卡畀我,我歎住等你返嚟!」
鳴:「咁殘忍嘅事妳都做得出嘅?」
我:「呢個suggestion唔錯,I agree with you!」
考完英文oral,點都有啲後遺症嘅。
敏:「I dare you!Don’t you dare?」
我:「唔dare囉。」
乜真係去㗎…咁認真做乜啫。
彤:「一係沖繩,一係北海道!」
鳴:「我其實想喺廣島新幹線站買個燒蠔便當食啫。」係我就去到仙台先買牛舌便當。
彤:「再嘈我要你去東京陪我shopping㗎!」
鳴:「唔好…千祈唔好…妳話去邊就邊啦。」
無鬼用,聽到女人shopping就驚成咁…雖然我都覺得係噩夢,而且應該唔啱詩敏。
我:「夏天去北海道無雪玩好大嘥喎。」
其實有薰衣草同花睇,但由於我已經去過,唔好再搞…而且曬到死肯定全日要擔遮遮佢兩個。
彤:「好啦,咁就去沖繩啦!唔諗喇,你兩個負責搞掂佢。」
乜都要我哋搞掂…包括眼前嗰兩件雞,兩盒飯…但俾曉彤咁樣搞一搞,我真係要同詩敏去旅行?我有啲擔心…不如我同一鳴一間房帶埋PS3去玩…
幾經辛苦終於食晒兩個大桶,結果今日完全無做到原本要做嘅嘢;都好嘅,咁就可以陪詩敏行多日街。
正當我哋食完嘢諗住如常返歸嘅時候。
彤:「喂,你哋諗住去邊呀?」
我:「無地方去喎,妳諗咗去邊…」
敏:「返屋企瞓覺囉,聽朝重要返學㗎。」
彤:「唔得!唔准走住,我要送你哋去一笪地方。」
敏:「哎呀…好喇好喇…唔好捉實我。」
然後曉彤截咗架的士,推咗詩敏入去坐…咁我為咗避開曉彤,就自己坐咗喺司機位隔籬,跟住一鳴都上埋車,曉彤就講咗一條奇奇怪怪嘅街名出嚟…
本來都唔知曉彤打緊乜鬼主意,但架的士行下行下…我就發覺有啲唔對路,到架的士行到目的地…
已有 0 人追稿