145k釋出

弊!死火!琴日玩得太興奮唔記得較鬧鐘…
日本呢啲民宿如果包早餐係一定要準時去食,如果你唔見咗人佢哋會諗好多嘢…例如係咪你嫌佢煮啲嘢唔好食,又或者驚你唔舒服咁;如果唔係都唔會有嗰個中國主人請日本客人不停食嘢嘅笑話。
彤:「起身未呀?皇帝女神!」
於是我仆落床開門應咗曉彤先,點知一打開門…
我:「早晨…」
我望到曉彤化咗個淡彩妝,畫咗少少眉,加咗少少眼影,介乎於蜜桃紅同櫻紅嘅嘴唇閃閃亮麗,塊面泛起紅暈,耳仔上面掛住對貝殼耳環;打扮完嘅曉彤係真係幾靚嘅,繼續著住佢套三點式加沙灘拖,而一鳴就喺佢後面。
敏:「嗚呵…早…」
呢個時候詩敏坐喺張床上面求祈攞起件T恤就著,無戴Bra嘅,唔知一鳴佢睇唔睇到啲乜嘞,見到詩敏飛釘就可以肯定嘅。


彤:「嘩!你兩個做乜攰成咁嘅?琴晚大戰完三百個回合嚟呀,唔使咁呀?」
我:「邊有喎…得喇,我哋會落去食早餐喇…」
彤:「快啲啦,我哋要出去玩呀!」
我:「要出去邊度玩呀?一點鐘要去潛水鋪喇…」
彤:「難得嚟到呢度世外桃源咁靚,我要同詩敏一齊影相呀!」難怪佢會扮到咁靚。
敏:「呀!咁呀…有無粉底液可以借嚟用下…」
我:「得喇…好快,等我哋十分鐘。」
都係嘅,女仔同我哋諗啲嘢係唔同,我哋剩係諗住要玩到幾癲,食啲乜好嘢,影相都係諗住影佢哋活動緊嘅相;但係,女仔嚟到想影返輯model相留倩影紀念都係可以理解。
詩敏本身太靚女,素顏都已經見得人,但曉彤扮到咁精緻都唔可以企喺佢隔籬太大對比,打淺返少少個tone,加啲啲raspberry rouge同gloss落個嘴唇度;至於其他…我真係識條鐵咩,總之好正!
我呢個負責揸機嘅當然頭都懶得洗,洗面擦牙踢埋對拖就搞掂,好在詩敏佢短髮,十分鐘就連個頭都搞掂埋可以出門口;喺呢個沖繩嘅離島,著住泳衣出門口周圍行同食飯已經係常識,如果而家要我著返衫反而會唔適應。


早餐係粟米湯,燒鮭…即係三文魚,茶碗蒸,一兜山藥藕片牛蒡混合物,重有牛奶;點講呢,係健康嘅,亦都好複雜,但再對多幾日你就會超級掛住香港嘅沙嗲牛肉麪,糯米雞,羅宋湯通粉,凍奶茶…係㗎喇,香港人係咁鍾意食味精同快靚正,晨早流流眼都未開重要挑魚骨呢下就…但教練姐姐副body真係好正,證明天然健康嘅食物係有佢哋嘅價值。
彤:「女神真係女神,十分鐘就可以咁靚女。」
敏:「唔準再咁話我,反面㗎。」
鳴:「好似平時咁影下相咪得囉,使乜搞咁多…」
彤:「唔得呀!梗係要喺最佳狀態嘅時候影多幾幅煞食嘅profile pic,如果唔係第時失戀點溝仔。」
曉彤係咪俾詩敏教壞咗?識得囉自己嘅感情關係嚟開玩笑,雖然一鳴應該唔會太上心。
敏:「咁又係呀,睇嚟我都要執下自己個facebook先,明年今日我都差唔多喺大學玩緊O camp,做唔做到camp花就係睇堆相,大學入面咁多仔,我都好懷念仔仔喺我身邊趑趄咁轉嘅日子,等我日日撓下免費飯食都好。」
我:「咁等我影得妳樣衰啲先…」
敏:「想死呀你,一陣喺水底放晒你啲氧氣走。」
鳴:「嗯…但要影得樣衰都實在係非常有難度。」


我同詩敏快手快腳食埋個早餐就四個人一齊落去沙灘影相,都係嗰啲啦,踢水又影幾十幅,跳高空中定格又影幾十幅,半挨半趴喺石頭擠下奶嘅又有,坐喺水入面影藍天倒影嘅又有;我哋兩條仔就喺度做苦力圍住佢哋轉係咁㩒快門,好在十點幾未算好曬,側光都方便我哋影相;呢對姐妹真係好正,搭調得嚟又可以互補,要可愛有扮可愛,要型格有真型格,一個短髮,一個過肩,鍾意吸手港女波可以滿足到你,想要輕微oversize又有提供,長腿女神亦得,鄰家妹妹亦得;我諗好多人會以為係專業model過嚟影相,啲日本仔仔就更加經過不能不放慢腳步細心欣賞下。
鳴:「得未呀…平時曬少少就嗌救命,而家…」
彤:「咁點同喎,攞啲相嚟睇下先啦!」
好在我哋兩個少爺仔屋企由細到大都有數碼相機玩,日光日白幫女人影下相都唔會難到我哋嘅,最重要係佢兩個本身咁靚女,又點會交唔到功課呢?呢啲波濤洶湧嘅相攞嚟做profile pic真係不得了,我懷疑會有唔少精蟲會因此無故犧牲。
玩到咁上下太陽又嚟到頭頂,我哋都要避一避,於是又去搵間餐廳坐下,今次行多幾步去到一間叫喰吞屋食堂嘅東西,有英文圖片餐牌添,賣嘅嘢同琴日嗰間差唔多;由於我哋唔太餓嘅關係,只係叫咗一個咖喱吉豬set同沖繩soba share;認真離譜!重好味過琴日嗰間,如果佢開喺我樓下一定唔使再幫襯大家樂!
吽到一點鐘我哋就去潛水鋪,女教練已經著好潛水衣喺度等我哋,帶咗我哋去揀啱size嘅潛水背心,潛水褲,鞋…諗住著衫呢啲咁簡單嘅嘢唔使人教啦,點知曉彤問咗一個好有意義嘅問題。
就係潛水衣入面使唔使著泳衣。
「As you like。」換嚟一個好有意義嘅答案,嗯。
換完衫之後出返嚟教練就開始同我哋講解唔同嘅潛水裝備,首先係件控浮衣,佢捉住曉彤出嚟幫佢著同埋示範點控浮控潛,睇嚟佢都好清楚曉彤係最需要被照顧嘅一個;重有個氧氣桶,啲喉同埋呼吸器…唔講喇,其實我哋第一次玩唔會潛得深,話到明係五米內,即係我徒手潛都差唔多去到嘅深度…當然啦,唔使游返上水面抖氣好爽。
講完啲嘢點運作之後我哋就一齊搬嘢落沙灘,由於我哋要潛兩粒鐘,最少每人都要消耗兩枝空氣,所以我哋要搬十個tank落沙灘,架車仔唔係幾載得晒,當然就由我同一鳴用手搦,原來空氣真係一種好重嘅嘢嚟。
去到沙灘重要逐枝tank搬落嚟行落水掉上架橡皮艇上面,其實要玩真係好很攰…最後所有架生上船之後我哋都上埋船開engine出發。
教練一路開船一路再三咁brief我哋,唔可以踩落啲coral度,唔可以掂任何living creatures;太好喇,睇嚟有人今日無得同奧斯卡玩。
我哋潛水嘅地點係安室島同渡嘉敷島中間位於海中心嘅淺水區,有一大嚿礁石露出水面嗰啲區域,亦都唔係船隻航線會經過嘅地方,當然係教練揀嘅,佢話去邊就去邊㗎啦。
教練幫我哋掛個scuba tank上身,再三check過啲connection有無問題,然後叫我跳落去先;呢度望落得兩三米,我游水咁叻諗住好簡單啦,點知我一落去就有種好奇怪嘅感覺,明明平時跌落水會即刻有浮力彈返我上嚟,而家就緩緩咁沉…
我就學隻魷魚咁喺水底用腳不停彈下彈下,攰到死…係喎,我可以泵啲空氣入控浮衣度…然後我又浮返上面…但我嚟潛水浮上嚟做乜?於是我又放返啲空氣出嚟,個人開始沉返,沉下沉下先醒起我呢個低B仔咬住個呼吸器都唔記得抖氣…已經慣咗平時喺水底唔會抖氣成分鐘,吸返一啖氣再徐徐噴出,終於可以令到個身體係靠隻手浮同沉。


過咗陣詩敏同一鳴都落埋嚟,最後教練抱住曉彤落水;詩敏適應咗一陣之後就游過嚟拖返住我,兩個人慢慢下沉,直至我哋見到啲沙就搵個空位企咗落去,我望一望上面,個太陽都重係好曬,經驗話我知呢度其實三米都唔夠。
詩敏望住我指一指隻耳仔,應該係唔適應氣壓耳仔又痛,我就用兩隻手呵呵佢塊面;而家好似玩緊初音遊戲嘅相反咁,望到同摸到對方,但係就講唔到嘢,哈哈!
另外詩敏件潛水衣上面好似有小小突點,貼身嘅潛水衣更突顯出佢曼嘅妙身材,好肯定as she like入面係無著泳衣嘅,不過鑑於教練就喺我哋附近所以我都唔會非禮佢。
好快我同詩敏就已經熟習到點樣控制浮力,可以打平個身手拖手一齊喺水底游,而曉彤佢就有啲驚,兩隻腳釘死喺地下度唔敢彈起個人,教練就喺水底攞住塊磁力畫板同佢溝通,教佢breath in同用手push water,拖住佢彈下彈下咁,一鳴就喺佢身邊陪佢。
已有 0 人追稿