【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 要交換就交換吧！
QQ750k釋出
結果我哋真係浸到成十點半先起錨著衫，啱啱好十一點前走人唔使俾人趕，正當我諗住可以搭到十一點半架巴士一點幾去到名護之際…
彤：「喂，行咁快做乜，我肚餓喇…」
我：「吓，不如去到先食晏啦，啲車好疏㗎。」
彤：「去到大約幾點呀？」
我：「點三左右啦…如無意外。」
彤：「唔制呀，我重好頸渴添，搭下一班車啦。」
我：「搭下一班車唔知追唔追到佢哋㗎喎…」
彤：「你係咪咁對你女朋友呀？！」
我：「吓！？女朋友？乜嘢呀…」
彤：「而家你條女唔喺度，我條仔又唔喺度，得我喺你隔籬，咁我唔係女朋友係乜？」
女人，係講乜就乜，然後拖住我隻手一齊行。
就喺我哋差唔多行到去旭橋巴士站嘅時候，經過
一間美式牛扒屋，曉彤就扯咗我入去，當然對於女人我係無反抗能力嘅，除非詩敏佢催我快啲啦，好好彩而家呢兩個女人唔會再搵我做磨心。
因為二戰後呢度成為咗美國嘅殖民地，美式牛扒屋喺呢度係好盛行嘅，既然呢幾日都無食過，試一次都好嘅，話就話美式，張餐牌除咗有Lunch呢隻英文字之外，其他全部都係日文字，真係有夠那個…
頭幾樣千幾円擺到明唔係扒嚟嘅，我諗係牛肉飯或者牛脷定食嗰啲啦，最尾有樣嘢隔籬寫埋gram數，250g，350g咁，成二三千円實係牛扒嚟喇。
最後我點咗個標準steak畀曉彤，我就係加大250g，好彩個侍應都識聽英文，medium就啱啱好喇；lunch牛扒set有湯，蒜蓉包，沙律菜，塊扒隔籬重有薯仔粟米紅蘿蔔，真係豐盛到一個點；食完之後唔知係咪因為我哋係遊客吖，定係曉彤太過靚女呢，重送咗兩球雲呢嗱雪糕畀我哋。
總之曉彤佢好開心啦，以前拍拖都無見過佢笑得咁靚。
食完晏晝，我哋都順利買到車飛，上咗十二點半旭橋開出嘅巴士。
曉彤今日著住一件湖水綠白橫間嘅入膊背心，膊頭鎖骨以至胳肋底都以一種優雅嘅姿態呈現喺路人嘅面前，橫間嘅pattern更突顯到佢心口波浪型嘅紋理，加埋條貼身水藍色摟屌裙，實在係…好靚女，曉彤嘅裝扮素來都係咁青春可人誘惑。
個半鐘有多嘅巴士旅程，我哋上到車曉彤好快就撓住我隻手挨喺我膊頭瞓咗，而我就挨返落去佢個頭上面。
醒返嘅時候，我哋都已經身處名護，不過呢度唔係我哋目的地，重要搭車去酒店，由於今日book咗嘅係四星級Orion Resort，所以喺名護市中心係有專車接送嘅…點解我識揀呢啲地方？多謝屋企…
大約花多廿幾分鐘到，已經到咗酒店lobby，時間係兩點九左右…
今次我決定直接搵一鳴算。
我：『到咗酒店喇，你哋check in咗未？』
鳴：『Check咗喇，你哋咁慢。』
正常吖，唔通等我哋咩，以詩敏性格，朝早去完菠蘿園咁曬，一定即刻check in沖個靚涼先啦。
我：『咁你哋喺邊呀？』
鳴：『出咗去玩喇…呀，女神催我買飛，唔講住喇…』嘩，急得你哋，真係完全唔等人㗎喎。
就係咁，我都即刻check in攞房；嘩，大床海景房，正呀，令人心曠神怡，是但啦，又唔係未嚟過…我拖住曉彤出返酒店，行過隔籬嘅美麗海水族館，買完飛就即刻入去。
我：『到咗水族館喇，喺邊區呀？』
搵返佢兩個，就可以交換返條女喇…
鳴：『…欸，我哋而家喺菠蘿園…』
我：『搞乜呀！點解唔同咗行程嘅？』
鳴：『詩敏話朝早曬，想晏晝先嚟呢度…』
頂…乜事呀？無理由㗎喎，點會掉轉玩，就算曬都好，咁樣係好唔順路，嘥多成粒鐘車程㗎喎，即係話…睇嚟詩敏係有心玩嘢唔畀我搵到佢哋。
我：『詩敏，點解改行程唔話我知先喎。』
敏：『無所謂啦，又唔係無女陪你，水族館好靚㗎，隔籬重有植物園，同曉彤好好行下啦。』
我：『我會掛住妳㗎…』
敏：『做乜喎，咪話咗交換玩一日囉，我去食菠蘿喇，你玩得開心啲。』
係，飛都買埋，唔通而家出返去趕去菠蘿園咩，而且咁做曉彤實會殺死我都似。
彤：「其實…你係咪激嬲咗女神自己唔知呀？」
我：「應該唔會掛…但女神嘅心機，真係好難估。」
彤：「唔好唔開心啦，同我拍拖都唔係咁差啫。」
我：「嗯，當然唔差。」
時間嚟到三點多啲，好在呢個公園夏天大部份設施都開到夜晚七點，咁都夠時間畀我哋玩；呢度嘅範圍都係非常之大嘅，不過就無咗海洋公園啲機動遊戲；我同曉彤都係順住嚟睇，第一站係水族館睇鯨鯊，嗯，其實我係嚟過嘅，嚟到沖繩梗係要探下呢條大魚啦，整體上呢度個缸係大過闊過海馬公園嗰個啲啲，雖然海馬公園個垂直螺旋缸都幾有特色，各有各好啦…之後就係海龜館海牛館，海豚劇場，再到一個講漁業主題嘅海洋文化博物館，曉彤一路都睇得好開心，但我總係覺得，呢度同詩敏嚟係會最開心，畢竟會幫海膽改名嘅女仔我諗只有佢一個。
最後就係鄉土村同植物園，呢度係戶外範圍，黃昏時間同女仔行呢度就最啱；總之呢度係非常之大嘅，如果慢慢行係由朝玩到晚都可以，千祈唔好為咗趕景點嚟睇完水族館條鯨鯊就算，咁樣你會損失好大嘅。
又真係好好嘢，一路上我哋兩pair各有各玩，都無send message畀對方，行埋植物園出嚟都差唔多七點，斷估詩敏佢哋都返嚟喇掛，定係佢哋會喺名護市中心食埋飯呢？好難講…呢度旅遊區餐廳唔係咁多，一係就返酒店食貴嘢…
我：『詩敏返嚟未？一齊食飯？』
過咗兩分鐘…
敏：『呀！電話無電，遲啲再講。』
我：「曉彤，一鳴有無搵你呀？」
彤：「無反應，可能都係電話無電，我都就無。」
算喇，返到酒店先再等啦，咁樣都唔係辦法，我哋兩個已經行到超攰要搵笪地方坐下，好在喺植物園後門出嚟行咗無耐就見到間叫PAPAIYA嘅家庭餐廳。
旅遊區餐廳最好就係餐牌中英日對照加有圖，我繼續念念不忘詩敏嘅節儉原則，點咗個800円嘅咖哩牛豚飯，曉彤就食鐵板牛扒拼大蝦，3800円。
我：「今朝先食完牛扒，而家又食，唔厭㗎咩。」
彤：「你以前咁對我，有機會梗係要食窮你。」
我：「曉彤…妳重嬲我？」
彤：「如果你係為咗其他女仔咁對我，一定咬死你，不過係為咗詩敏…算啦。」
我：「妳嗰度咁多肉，分啲嚟啦。」
彤：「無呀，係詩敏要你臥薪嘗膽，我當然會好好配合，我等睇你下年繼續捱車仔麪。」
食完晚飯個天已經黑晒，我哋就拖住手行返酒店，其實當曉彤喺我身邊嘅時候，都好習慣成自然咁同佢處於拍拖嘅一種狀態，但就只係拍拖囉，嗰種愛嘅感覺係高下立見嘅；當然我係好惜佢，會關心佢亦都想佢得到幸福，但愛呢樣嘢，唔係想同肯然後話有就會有，靠意志喺現實連埋嘅嗰種叫關係，至於含金量有幾多，你個心自然就會話你知；就好似第二次同佢拍拖咁，一切都係順暢舒服，但你係會寧願同女神死抽難抽計數機，去博取機會渺茫嘅一日關係，嗰種幸福係唔同層次。
但無可否認，曉彤喺我生命上係非常之重要，佢改變咗我，令我變得成熟，甚至乎我同詩敏間嘅關係都有佢喺度，如果無佢，我都唔知係咪真係會同女神有結果。
行咗十零分鐘返到酒店，一入去當然較水沖涼，呢度個浴缸都唔細，就算唔係雙人缸都勉強放得落我同曉彤，既然詩敏唔出現，我就同佢繼續今朝嘅好事。
沖完涼我就著住浴袍行咗出露台睇海，畢竟就算我屋企有啲錢都未至於可以有個一百八十度全海景，同嗰啲淺水灣，深灣，地利根德閣複式單位嘅真有錢人重有一大段距離。