【作者榜九位最後釋出】新►♂學校🚺🚽的激情♀◄30/9up！【大衛墮馬羞恥版】: 莫使金樽空對月，但借紅樓風花雪
QQ1.2M釋出
由於我哋都無諗過打完波會有節目，所以沖完涼嘅詩敏只係換咗一件白色嘅闊身T，可能佢嫌長身得滯太hea就喺條腰度綁咗個結，露出一小截腰出嚟，個領就有啲闊同低，郁下郁下就會滲透出陣陣奶味同見到條白色Bra帶；下身就係一條黑色真理褲，會走咗少少飽滿pat肉出嚟嗰啲，然後就沒有其他了；簡單嚟講就係一襲居家衣裝，平時晏晝攤喺我屋企hea嗰種，咁其實我可以同佢即刻去商場執返套出街衫嘅，不過佢可能又會嫌嘥錢，加上如今全世界都知佢係我女人，著乜都無所謂啦。
然後出返嚟只係見到無得再淫嘅淫Wing同阿文喺度，唔通…呢對狗男女有啲嫌疑？唔會啦，淫Wing就算有幾想玩都應該唔會睇得上呢個戇直嘅正經男。
敏：「嗰兩隻嘢去咗邊呀？」
詠：「佢哋行咗先喇，話要上去睇菜單喎。」
敏：「嗯，咁我哋都慢慢行過去啦。」
我哋一嚟到，阿文同Wing即刻天然分返開兩邊黐住我同詩敏，呢個實屬好正路嘅大自然現象…
文：「你睇下，呢球你連續重殺咗三球阿冰佢都守得住，呢個女仔真係好恐怖。」
我：「嗯嗯。」說實話我嚟緊一個月都唔想再掂羽毛球，好心呢條友咁上心就自己報名打啦，搵唔到人咪一條友打男單囉。
文：「我諗緊如果換我上場係咪都係唯有用呢個策略呢…但如果詩敏無傷嘅話鬥前場應該都會好精彩。」
我：「你又知道詩敏傷咗？」
文：「一齊打咗六年波喇，望下動作都知啦。」
係嘅，不過我諗而家我重傷，隻手已經唔係屬於自己咁，一陣都唔知點食飯。
然後行下行下去到一間酒家，我望住個招牌當堂呆咗，…，…，酒，家。
我：「喂！我哋都唔係富豪嚟，做乜要嚟呢度食呀？」呢啲地方我當然知道係食乜啦，絕對過份過詩敏喺沖繩食嗰餐銀河同阿文前日塊tomahawk，如果要話合理少少嘅話，我哋一班學生只可以喺度一人嗌一碟炒粉麪飯。
詠：「佢哋係話book咗呢度喎。」
我：「你哋唔係真係同嗰兩隻嘢癲呀？」
文：「無所謂啦，咁難得先有一次，你都係打咗六年波先攞到一個奬啫，同埋咪順便慶祝下你兩個會考放榜攞到好成績囉。」
我：「諗清楚先好喎…呢度唔係每圍2388，係可以每位2388㗎喎。」呢個數已經係保守估計，如果放肥豪入去放題好可能13888都落唔到樓。
敏：「吖，家陣你個大少爺食唔起咩？」
我：「我食得起…請埋妳都得，但其他人呢？Wing妳真係無問題？」
詠：「次次同親你食飯都喊苦喊寣話想食好西，而家有得畀你食你竟然唱反調？」
我：「妳估唔使埋單咩…其他人知唔知㗎？」
詠：「肥豪頭先打電話問過一鳴，佢一聽到就話無問題，叫佢放心點菜。」
我：「黐線，佢做乜咁大口氣，佢請呀？」
詠：「嗯，佢請我食都好應該吖。」
咁…我係咪又要請返曉彤食…唉，無眼睇，既然佢哋個個都話OK，唔通我呢個主角走佬咩…
入到去，同侍應講聲肥豪訂咗位就帶我哋去到一個包廂房，呢度嘅裝修好鬼死靚…平時我嚟到呢啲地方食嘢當然喺屋企人埋單，雖然就算而家埋單都唔係用自己啲錢…算啦，唔好諗咁多，其實呢個暑假又真係過得好開心嘅，分分鐘會係人生入面其中一段最值得懷念嘅日子，整多一餐瘋狂聚餐嚟作結都係唔錯嘅。
我同詩敏好自然咁坐咗埋去最入嘅座位度，我喺右邊，詩敏喺左邊，阿文同Wing就相應坐咗喺我哋嘅隔籬；見無乜嘢做我就周圍望下，一張大圓枱圍咗十三張凳，再數一數，即係四隻小魔女都嚟齊；其實喺我最失落嘅時候佢哋四個都陪咗我好多，都有唔少開心嘅事情，例如每次溫書我都要走去買一兜家庭裝嘅Haagen Dazs嚟畀佢哋施暴，再迫我食佢哋四個嘅口水尾…不過如果再寫嘅話，呢個故就厚過天龍八部㗎喇。
文：「我去參觀下個廁所先，順便睇下嗰兩隻嘢搞緊乜東東。」講完就起身走咗去。
其實我都應該去搵肥豪傻強嘅，畢竟喺呢啲級數嘅酒家嗌菜我都叫做有啲經驗，平時有機會睇住阿爸阿媽攤晒啲菜單喺枱面度…但我實在係攰到坐低咗就唔想再起身，希望佢兩個識睇餸食飯唔好嗌到出事就得，千祈唔好信一鳴嗰句隨便點菜，一個頭數數字都可以攞你命。
我隨手攞起本非常精美嘅menu嚟睇，第一頁就係鮑魚…最細係三十頭起，即係大約佛跳牆碗嘢入面嗰粒嘅size，盛惠380；然後廿八，廿五，廿三，二十；我心諗攞完3A屋企都無同我嚟食啦，搞乜鬼無端端要整餐咁嘅嘢。
敏：「做乜你個樣咁唔開心呀？」
我：「睇到個餐牌都頭痛啦。」
敏：「唔使啦，你又唔係無錢畀。」
我：「但係咁貴…妳唔介意咩？」
敏：「今日唔介意囉，同埋我想食。」
我：「吓，妳鍾意食？」
敏：「係呀，上次喺銀河食完，覺得好好味，所以都想試下香港食呢啲嘢係點。」
我：「呀…原來係咁…我諗香港會好味啲添。」
詠：「嗯，我都好期待㗎，頭先肥豪問食豪啲得唔得，我都想睇佢有乜搞作。」
敏：「哈哈，不過剩係食呢啲嘢好寡，如果有車仔麪畀我餸住嚟食就好。」
我：「我細個食佛跳牆都鍾意放龍蝦下面啲伊麪入去一齊食，然後俾人鬧到上天花板。」
詠：「你兩個真係好夾嘅啫，眼冤死人喇。」
我：「Wing姐唔好笑我哋啦…」
詠：「邊係啫，我等咗呢一日好耐喇，終於等到你兩個正正式式喺埋一齊，我睇到都好開心。」
我：「多謝Wing…」
可惜吖，Wing姐而家自己一個，雖然呢個都係佢嘅選擇，而睇落一鳴暫時都過得好好；我有時會諗，係咪佢同Wing失敗過，而家先會更珍惜曉彤，明明佢以前死都唔肯同Wing一齊補習，家下就對住曉彤跟出跟入；係咪佢無咁鍾意Wing呢？我又唔覺，睇怕呢個可能係時機嘅問題。
而呢個時候有幾個好嘈嘅吱吱喳喳入嚟，就係四隻小魔女嘞；佢哋個個都攞住一袋shopping嘅戰利品，Tiffany一見到我就坐咗喺我右手邊，跟住就係另外三隻小魔女；點算好呢…我無理由同佢講呢個位係阿文坐叫佢哋彈開一個位㗎，咁樣好肉酸，況且阿文又無話明要坐我隔籬；算，唔理，反正事到如今加埋咁Q多人喺度我深信旖旎係唔會做啲乜奇怪事出嚟嘅。
我：「係呢，妳哋唔係同曉彤一齊行㗎咩？」
旎：「佢兩隻嘢喺後面行到慢鬼吞吞，我哋呢啲去死去死團成員無興趣睇佢哋煙韌囉。」
我：「咁…我都明白妳哋嘅苦處嘅。」
四隻小魔女，唔計旖旎，其實個樣都唔差，不過就好似真係無人追佢哋，唔知點解呢；如果我無人無物嘅話日日對住佢哋幾隻嘢都實會心動，問題係呢條四揀一MC題實在太難作答，幾個女仔各有特色；但假如唔係我之前發生咗一連串亂七八糟嘅事情，又點會有可能無端端黐埋咗去個咁嘅女仔堆度。
而呢個時候阿文都返返嚟，佢望咗一眼就坐咗埋Wing隔籬，咁都OK，佢兩個而家同form都算熟嘅。
我：「嗰兩隻嘢搞成點呀？」
文：「如火如荼咁啦，同個經理斟緊啲細節，main dish佢哋謦好晒㗎喇。」
我：「唔會話…好過份吖嘛？」
文：「好難形容喎，不過都OK嘅。」
我：「即係大概，你估要每位幾錢到？」
文：「我諗就兩塊扒到，佢哋都知分吋嘅。」
我；「係呀…原來係咁呀。」
佢口中嘅扒，肯定就係佢前日嗰塊啦；其實嚟呢啲地方食嘢，正經少少食都起碼一塊扒有多㗎喇，正常水平就塊半到兩塊啦；如果預兩塊，即係位位千六左右，我哋有十三人，乘埋都成兩皮嘢，以學生飯局嚟講都算係好誇張；不過既然佢哋個個都話OK咁咪OK囉，係值得試下嘅，雖然類似嘅嘢我就食過好多次。
跟住一鳴一手拖住曉彤一手拎住兩個大紙袋都過到嚟，佢望咗一圈之後就坐咗喺阿文隔籬；都幾巧妙，啱啱隔開咗淫Wing同一鳴，而曉彤當然就坐咗喺一鳴隔籬。
鳴：「嘻嘻，好耐都無食過靚中菜喇。」佢望住我講，唔知點解我想過佢一棟。
我：「乜嘢喎，你前排咪請個靚女去銀河食中菜食咗過千蚊囉，你唔係失憶呀？」
鳴：「咦…呀…係喎…有啲咁嘅事。」
彤：「喂！乜嘢係銀河呀？喺邊㗎？邊個係靚女呀？點解我唔知㗎？」
詩敏聽到我咁惡攪佢即刻暗笑咗出嚟，然後搣落我大髀啲肉度，好鬼痛！而我右手邊嘅旖旎就喺度睄一睄我哋嘅小動作。
鳴：「哎呀…你聽我解釋先啦。」
曉彤正想握拳一嘢揼落佢大髀度，一鳴就咬佢耳仔講講講，懶得理，反正唔關我事；我只係記得當佢食緊銀河嘅時候，我同曉彤食緊咖喱飯同牛扒。
由上年十月到初初同詩敏打返波呢段日子，可以話係我最黑暗嘅時期，個個都唔敢搵，全世界都食我花生，加埋有好多唔知來龍去脈嘅人會對我白眼；好彩小魔女們都相信我嘅為人，Wing會喺圖書館聊下我，傻強重會迫我陪佢打乒乓波，同埋要不停溫書日子先無咁難捱…呀，重有Miss Lam對我嘅鼓勵同支持；我實在無諗過自己會有呢一日，重可以同咁多位同學一齊飯聚，望住大家都帶住笑容，氣氛無比熱鬧，令到我非常之感觸良多。
嗯，兩個傻嘅都返埋嚟喇，肥豪坐咗喺曉彤隔籬，再到傻強，剩返一個吉位係留畀Tamama。
我：「喂，你哋點菜點成點呀？」
豪：「咁擔心做乜，我完全唔驚你埋唔到單喎。」
我：「關我乜事，又唔係我請，我係擔心你哋咋嘛，拎份菜單嚟睇下先啦。」
雖則話係慶祝我同詩敏今日打贏波，但我都唔會寄望佢哋請我食㗎喇，不過斷估唔會好似上次船P咁屈我同一鳴硬食掛，係就真係反面都似。