男校病: 【3】

如果你而家問我究竟有幾鍾意阿敏，我會答你：所剩無幾。

如果話我唔掛住佢呢，就假既，雖然得唔到佢，但以一個毒撚既心理出發，經常妄想終有一日會得到佢呢個諗法一路都係冇消散。

唉！問世間情是何物？斷情根，點會係一時三刻就做得到？

如果你問以前既我，有幾鍾意佢，我會答你，非常鍾意，鍾意到連自己都不能自拔。

其實我唔明佢有乜咁好，夠純？有性格？小鳥依人？





我都唔知道，但其實鍾意一個人，需要原因嗎？愛情呢家野，本來就係冇得解釋，呢個就係愛情既魔力所在！

但無奈自己往往唔夠勇氣，只係配做一個匿埋係側邊遙望佢既浪子。

因為我真係唔敢想像，如果我豁出去開口既話，會有乜野後果。

係，我認我貪生怕死，連講句野都唔敢。

好啦，如是者，我就應承左阿輝去出席gathering，呢個苦等三年既大好機會，我先唔會咁笨實就咁有佢白白浪費左。





卒之望穿秋水，終於到十二月既某個禮拜六，果個時候大家咁岩考完mid-term exam，聖誕將近，係節日既氣氛下，令呢個gathering黎得更別具意義。

果日，gathering搞手阿瑩晨咁早打晒電話，叫我地成班人係旺角地鐵站等，仲要約定一點半，不見不散，結果呢，等到點九都未齊人。算啦我都明白，香港人會遲到都唔係第一日既事。

有得見女神，今次仲唔打扮到衡一衡？

我以一身不羈既打扮，瀟灑過瀟灑哥咁嘟一嘟八達通出閘，上身就一件寒酸既黑色外套，內裡加件白色Baleno小T-shirt打底，下面仲著住一條鬆身淺色老牛，加對百搭鞋Converse，一睇就知我冇得輸啦！

...... 至奇。





我一去到見到大家果陣，都係得小貓三四隻到左，都話左佢地唔準時。

雖然大家第一眼，都比我其貌不揚既外貌而打左個突，從佢地既眼神，都唔能夠相信泉仔去左三年男校，幾經滄桑之後變到咁既樣，講句野都怕怕醜醜，抬唔起頭，唔望人。
從內到外，都散發住一股憤世嫉俗同毒撚既氣色。

但大家都仲對我好熱情，係咁意同我吹左幾句水。哈哈，話晒我以前係小學既時候都算係風頭躉，因為我好鍾意畫公仔，仲氹到班女仔鬼死咁開心。

我仲好記得，小四果陣，果時我睇漫畫睇到上晒腦，期期Co-Co同快樂龍都買，好多漫畫既單行本都有買齊。

老師問我地我的志願係乜，問我地對將來有乜抱負，而家我諗番起，都真係得啖笑。

自己一直以為所堅持既，會係最適合自己，但到頭來發現自己根本就冇呢方面既天份，係我自己放棄左自己。

人會大，月會圓，當我知道仲有轉型的本錢，我就將我成副心機放落電腦度，希望將來可以係IT界發展，冇再畫野。





小四，班房。

老師上第一堂，就用一個好行既開場白，問我地大個想做乜。

「輪到你啦，江子泉，你既志願係乜野呀？」老師問。

「我成為一個漫畫家！」

「咁有趣既！點解會係一個漫畫家？其他同學都話想做醫生、科學家、律師、太空人，點解你偏偏會鍾意做漫畫家？」

「因為我鍾意畫野！」

背後既同學聽完議論紛紛，呢個時候就有個同學插咀：
「我聽爹地媽咪話，畫漫畫賺唔到錢架！一個月得幾千蚊架咋……」





「下！係架？」其他同學紛紛用驚訝既語氣去回應。

我當堂打左個突，轉身望住發表呢番偉論既同學，問佢：「乜係既咩？」

「係呀，畫漫畫發唔到達架！」佢答。

「喂喂，你做咩唔舉手就講野……」老師轉個頭就鬧佢。

就係因為呢位同學無心插柳既一句話，令我再次審視住現實。

係喎，屋企都有教落：有錢雖然唔係萬能，但冇錢就萬萬不能，唔通我要一邊畫漫畫邊揸兜乞食？

唔得，我要賺錢呀！我仲要養爹哋媽咪架！我第時仲要養老婆仔女！

就係咁，我就慢慢放棄呢樣係人地眼中覺得「冇大志、搵唔到食」既技藝，畫功亦大不如前，而家連畫火柴人都畫得樣衰過人。





經歷過呢件事，我再搵唔到自己有咩一技之長，自信心好低，覺得自己只係一個會食同訓既廢柴，終日對住電腦打機睇動畫，冇嚐好，對社會冇貢獻。

但點都好，即使我認為自己幾咁頹都好，我都需要一啲外在既力量去推動我企番起身，可以令我好自豪咁話比人聽：我唔係廢人！我可以好有用！

呢股力量，就係黎自阿敏。因為我都唔知點解，每次諗起佢，我成個人就會渾身是勁，做咩都寧舍醒神。

不知不覺間，旺角地鐵站E出口呢度，都差唔多黎齊晒人。

呢個時候阿輝都岩岩趕到，佢問：「唔好意思！我遲左少少！而家仲差邊個？」

企係我隔黎既，係唔知幾時出現左既阿瑋，佢就話：「差敏敏咋。」

說時遲那時快，一講阿敏，阿敏就到。





「嗚嘩！」

我地一班男仔，儘管已經好努力去抑制內心既激動，但都無不係臉上露出一個驚嘆既反應。

阿敏，士別三日，刮目相看，佢又靚左！

今日，阿敏將「女神」既定義，昇華到一個新既層次。

我要暈啦！