【愛情】 我同女仔傾偈就會肚痛: 第一章.2
第二日一早返到學校，已經見到鄧逸俊呢條友企喺門口，對住每個行入課室嘅同學恭恭敬敬噉打招呼。
「同學早晨！記住投我一票呀！」
呢啲形象工程，確實好乎合佢個性。
「同學早晨！」
鄧逸俊對住我微笑示好，冇因為競爭對手關係就無視我。
「早晨。」我禮貌上點頭回應。
之後連值日生負責寫嘅黑板，鄧逸俊都主動接手，打算喺唔同層面上博取好感拉票。
天真嬌。
如果係一場正常嘅選舉，佢呢啲行為的確可以提升自己形象，繼而進一步令未有心水嘅選民傾向自己。
不過宜家咩年代呀？呢個世界仲會有公平嘅選舉咩！
要吸納更加多嘅選票，就要目標明確、手段更加狠辣。以鄧逸俊代值日生寫黑板為例，原定由今日去到星期五嘅值日生，其實全部都係佢嗰個圈子嘅人，所以佢代唔代做，呢啲票本來就已經係佢嘅，宜家只會顯得佢呢個動作好多餘。
既然係噉，留返啲力落去嗰班潛在選票......我姑且嗌佢哋做搖擺州份，反而更加有效率。
喺第一個小息嘅時候，我首先要確認我嘅票倉穩唔穩陣。
一如以往，佢哋聚集晒喺班房嘅後方，再各自各同某幾個朋友傾偈。
「喂，星期五你哋記住投我呀。」
「哇，唔係打定輸數㗎咩？做咩突然又拉票呀。」
「輸得好睇啲呀嘛。」我冇同佢哋講我嘅計劃，費事班友得寸進尺，乘機問我攞著數。
「不過鄧逸俊又真係好進取喎，啱啱佢仲提我陣間要去實驗室上堂。」阿烽見我哋講起投票，走埋嚟分享。
「喂，你唔係諗住手指拗出唔拗入嘛？」
聽到佢噉講，我即刻有啲神經緊張。
「唔係...客觀分析吓啫，佢個勢好勁噉嘛。」
「嘖，做吓樣啫佢。」
確認完票倉，我就返埋位點算目前嘅選票分怖。
根據我琴晚計算，基本上會有十三票投我、十二票投畀鄧逸俊，淨低嘅七票就係搖擺州，只要我爭到當中四票，就會以十七比十五嘅票數勝出。
呢七個人入面有五個係男仔，雖然我同佢哋完全唔熟，但係由佢哋入手先點都易啲，而且當中有兩個同我一樣係選修地理，應該幾易話為。
喺第二個小息，我趁住嗰兩個選修地理嘅同學去完廁所，喺走廊截住佢哋。
「喂，斷估你哋都唔會投票畀鄧逸俊㗎啦？」
佢兩個你眼望我眼，好似完全聽唔明我講緊咩。
「咩投票呀，你噏緊乜嘢。」其中一個反問返我。
「星期五選班長呀，你琴日明明仲嗌到好High。」
「哦，鬼知咩！」佢如夢初醒，好奇問我：「噉你食咗屎嚟呀？做咩冇撚端端學人做班長。」
「試吓唔得嘅，總之你哋仲想要我啲地理功課就識做啦。」
「唉得啦，投咪投囉！」
我一拎出王牌，佢哋自然好配合。好彩佢哋以往都有Whatsapp問我攞啲地理功課，本來我都唔太想借畀佢哋抄，不過估唔到可以將錯就錯，利用返呢樣嘢嚟幫我拉票。
兩票落袋之後，只要我再搵多兩票就穩操勝券。
去到放飯時間，由於另外兩個目標留喺學校食飯，我唯有都留低喺學校，製造機會向佢哋落手。
「喂兩位，介唔介意班長嗰度投個票比我呢。」我趁佢哋喺位度傾偈，坐喺佢哋前面搭嗲。
呢兩個人黑黑實實、身型幾高，表面睇落有啲惡，其實相處落又算係幾平易近人。
「其實我本身冇乜所謂，但係我條女嗌我投埋畀鄧逸俊。」其中一個屬於籃球隊嘅人向我解釋。
佢同嗰個同班嘅女同學拍拖幾乎全班都知，甚至連教我哋嘅老師都隻眼開隻眼閉。雖然我知嗰女仔係鄧逸俊啲票源嚟，只係勢估唔到佢連男朋友張票都騎劫埋。
「吓，你有權揀自己投畀邊個㗎喎，點可以俾啲女人食住呀。」我嘗試盡吓人事，說服對方。
「算喇，激嬲條女好撚麻煩㗎，唔好搞咁多嘢。」籃球隊似乎有過啲唔好嘅經歷，一講起女朋友發嬲即刻神情閃縮。
「噉你呢？你冇女朋友喇啩。」為免要人難做，我唯有轉向第二個人落手，呢個人同樣擅於運動，係學校田徑隊嘅人。
「投畀你唔係唔得，但係有咩Jetso先！」田徑隊奸笑回應。
呢種情況我一早準備好應對策略。
首要條件係唔可以太張揚。
我望一望班房周圍，啱啱好大部份人出咗去食飯，班房得返我同佢哋兩個。
「嘿。」
我靜靜雞喺褲袋拎出一張十蚊紙，用手掌撳住放喺檯面：「茶字典我嘅。」
作為學校入面最貴嘅其中一款飲品，相信對普通學生嚟講有一定吸引力，連我平時都唔太捨得買嚟飲，宜家為咗勝出呢場選舉，我唯有豁出去。
「幫我買埋得唔得先。」田徑隊見到張十蚊，即刻笑到見牙唔見眼。
「唉，麻鬼煩。」既然冇咗一票，淨低呢張辛苦少少都要拎返嚟。
於是，我就去咗小食部幫佢做跑腿，午飯時間嘅小食部唔太多人，條隊只有幾個學生喺度。
由於阿烽佢哋出晒去食飯，基本上我今日係得自己一個。喺呢個時候，我又唔覺意噉諗起Miss So。
唔知係咪因為鍾意咗佢嘅關係，就算同緊啲朋友一齊，我總係會突然諗起Miss So，甚至忍唔住四圍望，想喺附近尋找Miss So嘅身影。無論係走廊、操場、小食部都好，只要我一發現到佢存在，視線就會忍唔住停留喺佢身上，直到佢喺我視野範圍內再次消失。
宜家冇朋友喺隔離，我自然更加肆無忌憚，想去望吓搵唔搵到Miss So。
「唔該要枝茶字典。」
可惜輪到我買嘢嗰陣，依然唔見Miss So喺附近。
「七個半。」
我望住小食部阿姨喺雪櫃拎出藍色嘅茶字典，又再思考自己所得票數。
計埋田徑隊同地理嗰兩個人，七票入面我已經袋咗三票，籃球隊就因為佢女朋友關係而去咗鄧逸俊嗰邊。正常嚟講，淨低嗰兩個女仔應該會投埋畀佢，所以我一定要拎到最後嗰一票，先可以贏到鄧逸俊。
如果佢拎到第四票，最後比數會變為十六比十六，照道理班主任就會負責投決定票嚟分勝負。到時候個結果唔單止唔受我控制......甚至應該話，兩位班主任非常大機會投畀品學兼優嘅鄧逸俊。
我加快腳步，諗住快啲返課室同田徑隊完成交易，費事夜長夢多。
「秦子柱！」
突然有人大嗌我個名，搞到我當堂嚇一嚇。我擰轉頭一望，發現係啱啱搵極都唔見嘅Miss So。
「你哋唔係出晒去食飯咩？」
「啊！我......我費事行咁遠呀嘛。」
我冇理由話自己想賄賂同學，唯有求其搵個藉口。
「咦。」
Miss So視線向下一掃，發現到我拎住枝嘢飲：「係咪諗住請我飲呢！」
嗚呀！！！
望住Miss So個笑容天真可愛、兩邊面珠墩微微鼓起，我差啲就忍唔住答係、想將枝茶字典遞畀佢。
相信女人嘅笑容同眼淚一樣，係令男人完全冇辦法抵抗。
不過我好快又諗起班長選舉，只要我做得成班長，之後大把機會同Miss So相處。宜家絕對唔可以因為眼前少少誘惑，就放棄之後嘅長遠利益！
「呃...枝嘢飲......」
我揸實枝茶字典，實在諗唔到點樣先可以拒絕Miss So。
加上我完全冇預計過Miss So出現，突然俾佢噉樣聊我傾偈，唔使問個肚當然又開始痛，令我更加難以啟齒。
佢見我吞吞吐吐，完全冇意欲想畀枝嘢飲佢，個樣開始有啲失落：「唉，唔逼你喇，你enjoy啦。」
見到佢扁扁哋嘴行開嗰樣，我唔知點解有啲唔開心，感覺錯過咗一個討好Miss So嘅機會。
諗深一層，其實我只要買多枝，就可以同時滿足晒Miss So同田徑隊。只能夠怪我實在太蠢，竟然咁簡單都諗唔到。
唉！
既然米已成炊，唯有繼續做返正經事，發揮呢枝茶字典最大效用。
「deal？」
返到課室，我將嘢飲同淨低嗰兩個半都放喺田徑隊檯面。
「唔......唔錯唔錯！」佢扭開樽蓋飲咗啖，笑到好似啲奸角噉狡猾：「見你咁有誠意就幫吓你啦......呢兩個半豪埋畀你。」
「合作愉快。」
我袋好嗰兩個半，返埋位等最後一位目標出現。
最尾嗰位男同學，某程度上其實係邊緣人，平時冇乜朋友、又冇乜人會同佢傾偈，甚至有時仲會俾其他同學恰，正常情況佢應該係匿埋喺班房睇吓書做自己嘢。
只係宜家好明顯唔太正常，我喺班房等咗三個字都唔見佢。距離午飯時間差唔多完結，班房變到越嚟越多人，我要行動嘅話會越嚟越唔方便。
反正喺班房做唔到啲咩，不如周圍行搵吓佢喺邊仲實際。
我把握淨低十分鐘嘅機會，開始喺學校行嚟行去。要喺成間學校入面搵到固定一個人，感覺好似大海撈針噉，所以我首先去學生最常出現嘅操場同埋小食部，留意目標會唔會經過呢兩個地方。
等咗五分鐘，始終唔見邊緣人出現，唯有再去其他地方博吓。
以佢冇乜朋友嚟講，如果唔喺課室，好大機會係喺圖書館。
我急步行上去三樓，啱啱好見到邊緣人喺圖書館走出嚟，往另一邊方向離開。
本來上樓梯都上到冇乜力，但係咁難得俾我搵到佢，唯有加緊腳步追上去。
「哎呀！」
點知我掛住望實邊緣人，冇留意隔離有個女同學想落樓梯，結果就撞跌晒佢啲圖書。
「Sor...Sorry。」
我望一望邊緣人，又望一望跌晒落樓梯嘅圖書，最後決定幫呢位女同學執返啲書先。
始終係我撞到人，而對方又係個女仔，噉樣不顧而去未免太冇禮貌。
講係噉講，睇真啲呢個女仔都幾黐線，竟然借足晒六本圖書嘅限額，搞到我要執餐懵。其中有兩本仲要跌到落樓梯中間嘅平地，即係要我行多次呢半層樓梯。
「嗱，唔、唔好意思。」我將啲圖書交還畀佢，再重新道一次歉。
仆街。
呢一刻我先望到佢個樣，發現佢原來係其中一個搖擺州嘅女仔。某程度嚟講佢都算係個邊緣人，不過間唔時會有一兩個女仔同佢傾偈，所以佢呢票基本上係鄧逸俊嘅囊中之物。
唉，估唔到執咁耐就係為咗做啲無謂嘢。
我望返去另一邊走廊，已經唔見咗男邊緣人嘅背影。
「唔該......」
為咗追上對方，我冇再理到女邊緣人，急急腳跑去走廊。
既然佢行咗去嗰邊，好大機會係直接返班房，只要我跑快幾步，仲有機會追到佢。
我跑到去到班房嘅上一層，總算及時趕到。
望住佢吹住口哨行路個樣，我諗佢冇乜朋友應該係同佢個性有關。
「喂，邊......」
我差啲忍唔住嗌咗佢做邊緣人，好彩及時收口：「邊、邊有人行得咁快㗎，想嗌你都嗌唔切。」
「吓你有嗌我咩聽唔到喎。」邊緣人一臉不解噉望住我。
「係呀，啱啱喺圖書館已經想搵你，點知你一枝箭走咗去。」
「係咩聽唔到，我已經行得好慢。」
「唉唔緊要啦，反正我已經追到你。」我把握淨低嗰幾分鐘時間，直接入正題：「係呢你有冇諗住班長投畀邊個？」
「冇喎，兩個我都冇咩所謂。」
非常好！只要佢唔係諗住投畀鄧逸俊，我就有機會說服佢、甚至係賄賂佢投畀我。
「噉還掂都係嘞，不如你投畀我啦，話晒幾年同班同學。」
其實呢句講出嚟我都有啲唔好意思，因為呢幾年我其實同佢冇乜傾過偈，你話我哋似隔離班同學反而仲貼切。有時唔係我特登排擠佢，而係佢個性格實在有啲孤僻古怪，屬於嗰類唔太衰但係又難相處嘅人，所以我哋嗰班人通常唔會特登走去聊佢傾偈。
佢選修同我唔一樣，加上成績又同我差唔多，睇怕借功課畀佢抄呢招應該用唔著，我預咗最後要動用簡單直接嘅金錢誘惑。
「好呀，投畀你囉。」
吓？
「你肯投畀我？」我驚自己聽錯，重覆向對方確認一次。
「係呀，都話我冇咩所謂。」
佢咁爽快搞到我有啲招架不唔住，甚至覺得太過順利，驚佢係咪想敷衍吓我。但係佢重申咗幾次投畀我都冇所謂，喺午飯時間正式完結嘅情況下，我唯有信住佢先。
就係噉，我喺第二日就拎齊所需票數，往後幾日只要間中討好吓嗰幾個搖擺州，留意鄧逸俊有冇密切接觸佢哋，基本上已經勝負已分。
當然，為免兩位班主任有所質疑，一啲形象工程間唔時都要做吓，費事佢哋見到我咩都冇做就贏咗選舉。例如Miss So想搵人幫手搬簿嗰陣，我同鄧逸俊會一齊鬥快舉手，而Miss So為咗公平起見，都會嗌晒我哋兩個一齊去搬。
「Miss，暑假唔見你淋冰嘅？」
行去教員室途中，鄧逸俊突然聊Miss So傾偈。
「捐咗錢咪唔使淋。」
佢哋講緊嘅係暑假盛極一時，幾乎全世界名人都有玩嘅Ice Bucket Challenge，透過「淋冰水」呢項活動，吸引大眾關注ALS患者同埋為相關協會籌款。無論當係潮流定慈善，過去一個月都唔少人仿效參與。
「噉樣唔好玩㗎喎，梗係要兩樣都做。」鄧逸俊窮追不捨，笑住講：「不如等我淋多次，tag埋你再玩多次啦！」
「咪搞我呀你！信唔信我塞多啲功課畀你做！」
「哇Miss噉樣唔專業呀，做人要公私分明。」
「總之你夠膽tag我你就死梗。」
睇住佢哋傾到咁開心，其實我都唔意外。畢竟鄧逸俊嗰班人喺以前就同Miss So好close，午飯、放學時間總會見到佢哋圍埋一齊傾偈。
雖然睇落司空見慣，但係每次親眼見到嘅時候個心始終會揦住揦住，可能係妒忌呷醋，又可能係羨慕佢哋，羨慕佢哋可以正正常常噉同Miss So傾吓閒偈講吓笑。
我喺佢哋後面默默跟住行，有時候feel到個心唔舒服、都唔想再望住佢哋。只係過咗幾秒之後，我又會忍唔住想望返佢哋，一方面想望吓Miss So，另一方面又想留意佢哋傾成點。
呢種折磨嘅感覺實在唔太好受，同時亦令到我更加有決心，只要我做得成班長，或者就會有機會變到佢哋噉。
忍多一兩日......忍多一兩日我就可以宣佈勝利。
眨吓眼，終於嚟到正式投票日。
星期五作為一個禮拜嘅最後一日返學日，大家臨近放學自然變到無心向學，而呢個投票選班長環節正好成為餘興節目，等大家選完就可以開開心心放返兩日假。
「唔好再傾偈喇！宜家要開始選班長，你哋再傾就盞你哋遲放呀。」由於啱啱上完英文堂，所以Miss So順理成章主持埋呢個環節：「兩位候選人使唔使出嚟最後講幾句？」
「唉！唔使㗎啦！快啲投完快啲放啦！」
「我投秦子柱呀Miss！係咪走得啦？」
嗰兩個地理同學率先鼓譟，為咗快啲放學顯得冇咩耐性。
「Miss，我唔使講都得㗎喇。」我舉手向Miss So請示。
作為一個準班長，當然要順應民意。尤其票數已定，無謂做啲多餘嘢得失選民，搞到臨尾香就唔好啦。
「Miss，我都唔使講。」鄧逸俊學我噉舉手示意，睇嚟都驚得罪啲同學。
事到如今抄我都冇用㗎喇，望住佢一臉天真、仲未知自己氣數已盡嗰樣，我真係就嚟忍唔住笑。
宜家萬事俱備，就係差Miss So宣佈投票開始。
「噉好啦，既然兩位都冇嘢講，你哋就順住學號逐個出嚟投票。」Miss So將黑板劃開兩邊，各寫上我同鄧逸俊嗰名，等大家出去投票。
實際投票採用傳統方式，以每個人劃出「正」字其中一劃嚟計算票數，Miss So吩咐每位學逐個投票，就好似特登為呢場選舉製造緊張氣氛。
「Wow！大炒七塊一皮呀。」
隨住越嚟越多人投票，其他同學開始投入呢場選舉，期待最終結果。
由於鄧逸俊啲票源嘅學號相對較前，所以一開始就出現咗「一比七」嘅票數差距，搞到我差啲都有所動搖。直至班上大部份同學陸續完成投票，我哋票數變得不相伯仲，我個心先開始定返落嚟。
「哇十五比十四，簡直係峰迴路轉、叮噹馬頭喎！」
「究竟鹿死誰手就睇最後呢三票啦！」
其他同學見選舉進入最後直路，心情越嚟越激動，好似講馬噉描述選舉戰況。
「喂，靜啲呀！」
Miss So作為班主任不時會控制場面，費事我哋興奮得濟嘈到隔離班。
淨低三票，分別係田徑隊、女邊緣人，同埋我個票倉入面其中一位同學，如無意外最尾票數就會係「十七比十五」，可以話拍定手先都冇問題。
鄧逸俊，要怪就怪自己太天真啦，以為講幾句早晨就可以拉到票，係時候等阿叔話你知現實社會係點喇！
望住最後一位票倉率先投票，我對佢報以禮貌嘅笑容，感謝佢投下神聖一票。
Nani？！
睇真啲，我發現票倉竟然投咗落鄧逸俊度，令總票數改為「十五比十五」！
我趁住票倉行返去座位嗰陣會經過我，及時拉住佢：「喂，你投錯咗畀鄧逸俊呀，快啲出去同Miss講返啦！」
點知佢尷尷尬尬噉同我講，佢竟然冇投錯！
「哈哈...Sorry呀......因為鄧逸俊今日Lunch嗰陣同我講，話佢做得成班長嘅話可以借生物啲功課畀我參考吓......」佢以笑遮醜，進一步向我解釋。
豈有此理，參乜鬼嘢考，擺明就係借功課畀人抄啦！
估唔到呢個鄧逸俊係啲笑騎騎放毒蛇嘅人，表面扮晒循規蹈矩，實則係想殺你一個措手不及。
今鋪的確係我大意，以為票倉就十拿九穩，結果都係會俾人收買。以宜家十五比十五嘅形勢，睇怕今次係會打和，要靠Miss So最後一票決定勝局。換言之我可以做嘅嘢已經做晒，只能夠聽天由命。
唉，起碼最尾只係輸喺Miss嗰一票，稱得上雖敗猶榮。
下一個輪到田徑隊投票，其實我已經冇咩心機再睇，畢竟捉到鹿脫唔到角、睇住機會白白流走，我諗呢個世界冇咩嘢係比呢樣嘢更加令人受打擊。
What The Fuck。
直到田徑隊都投埋畀鄧逸俊，我先知道咩係低處未算低。呢一刻我就好似睇住自己追捧嘅足球隊，由領先去到俾人追平，再去到九十分鐘俾人絕殺，心情一下子跌到落地核。
我有啲意外，同時覺得係意料之內，今次我冇再質疑佢係投錯票，因為我直覺認為又係鄧逸俊做咗手腳。
果然，當田徑隊行過鄧逸俊隔離嗰陣，佢扮晒嘢噉跪低綁鞋帶，而鄧逸俊就趁機扔張廿蚊紙落地下，等田徑隊順手牽羊。
好卑鄙。
如果十蚊只可以買到枝茶字典，噉廿蚊就可以買到一袋撈麵再加枝茶字典，幾乎等於一個中學生嘅午餐，仲要有找添。
睇嚟我唔只大意，仲要低估咗鄧逸俊，呢招以本傷人真係唔到我唔服......
唔怪得啲人話學校係社會嘅縮影，當你以為自己夠奸嘅時候，原來仲會有人奸過你，嗰世界真係人心險惡。
唉......冇諗過我第一次為心儀目標努力，最後要落得失敗收場。或者條路本來就唔容易，只係我諗得太簡單。
大局已定，呢刻我直頭諗住行過去鄧逸俊嗰邊同佢握手示好，當係多謝佢同我上咗寶貴一課。
「Wow！！！！！」
「認真咩？！！！」
其他同學突然激動大叫，掀起現場一陣騷動，搞到我停喺原位、有啲好奇發生咩事。
我沿住佢哋嘅視線望向黑板，發現女邊緣人竟然投票畀我。
宜家票數係「十六比十六」！
除咗驚訝之外，我已經唔識得畀反應，明明我冇接觸過佢、明明佢應該會投畀鄧逸俊、明明......
咪住！
如果要講呢幾日我同佢唯一嘅接觸，就係我喺圖書館外面，幫佢行返落樓梯執圖書......唔通因為噉簡單佢就投票畀我？
「秦子柱，我哋未放學㗎喎。」Miss So見我仲企緊喺身，示意我坐返低。
「唔係呀...呃、呃、我諗住企喺身睇清楚啲啫。」我即刻坐返低，尷尬解釋。
「嗱宜家總票數係十六比十六啦，暫時就打和。」Miss So重新點算一次票數，向全班宣怖：「Miss Chan因為今日唔得閒，所以佢一早就同我講咗話由我投最尾一票，噉我決定投畀......」
Miss So沉默噉望住黑板，考慮緊投畀我定係鄧逸俊。
其他同學出奇哋冇催促Miss，而係靜心等待呢場選舉嘅最終結果。
雖然我直覺認為Miss So係會投畀鄧逸俊，但因為由被絕殺去到反追平，令我不自覺對呢場加時賽有所期望，希望真係會有奇蹟出現。
唔知Miss So係掙扎緊定係故意拖延時間，見佢毫無反應，我開始覺得心癢難耐，緊張到揸實拳頭，腦入面不停重覆自己個名。
秦子柱......
秦子柱......
秦子柱......
「我投畀秦子柱嘅。」
Miss So喺我嗰邊劃上一劃，令票數改為十七比十六。
Yes！！！！！！！！！
我興奮到高舉雙手，差啲忍唔住大叫。
「哇！！！」
「噉都比秦子柱贏到！！」
「黐線，絕地反擊呀！！」
我嗰圈子嘅朋友激動大叫，又以掌聲示意心情。
連成日整蠱我嘅阿烽，呢一刻都默默拍手，向我報以佩服嘅眼神。
短短十幾分鐘好似坐過山車咁大起大落，令我霎時間唔太相信自己贏咗，同鄧逸俊一樣呆滯噉望住Miss So。
「我解釋吓點解我會投畀秦子柱啦。」Miss So可能察覺到我哋兩個疑惑嘅目光，所以順便向全班說明：「因為我覺得鄧逸俊過往都做過幾次班長啦，可以畀機會其他人試吓嘅......而且秦子柱難得肯去挑戰自己做班長，我都想畀啲鼓勵佢。」
「雖然鄧逸俊做唔成班長，但係我哋仲有個班會主席懸空咗，你會唔會有興趣擔任呢個崗位？」Miss So淺笑望向鄧逸俊。
鄧逸俊默默點頭示意，睇得出佢有啲失落，大概係冇諗過自己竟然會輸。
「噉好啦，秦子柱你要好好努力，唔好辜負大家對你嘅期望呀。」Miss So作出最後結語，批准大家放學。
Miss So指示一出，大半班同學已經不見人影，爭住放學返屋企又好、周圍行街睇嘢都好，總之先離開班房再算。
由於廁所就喺正我班房斜對面，阿烽佢哋順路會去埋個廁所再放學，我冇乜呢個需要，所以就企喺門口附近等佢哋。
就算選舉完咗，呢一刻我心情依然未平伏，一方面心底裏有股興奮喺度蠢蠢欲動，另一方面又唔敢相信自己真係贏到，唔識點樣畀反應。
或者好似嗰啲比賽冠軍噉樣，激動人心嘅往往係個過程，當佢哋捧起冠軍獎盃後，心情自然會興奮同平靜夾雜。
「秦子柱！」
我喺沉思之中反應過嚟，抬頭一望，發現係啱啱行出班房嘅Miss So。
「等咩呀你？」佢見我自己一個，好奇問。
「冇呀，林兆烽佢哋去緊廁所。」
「哦。」Miss So好快轉移話題，笑笑口講：「恭喜你喎，贏到場班長選舉。」
佢講完呢句嗰陣，仲特登拍我膊頭捏咗幾吓，令我即刻有啲緊張。
「呃...多謝大家畀面啫，哈哈......」
我象徵式噉講，當然唔會同佢講我賄賂選民啲嘢。
「噉你要做好自己，唔好令我失望呀。」
「好...好呀。」
「尤其是唔好再亂咁講嘢。」
Miss So突然目光銳利，應該係想提起佢暑假打畀我嗰單嘢。
「下次唔會㗎啦，嗰、嗰陣一時誤會......」一諗起自己有幾柒，我忍唔住尷尬面紅。
「係至好講！」
Miss So揮手同我道別，行咗幾步又突然回頭一笑：「下個禮拜一見啦，男．班．長。」
不得不承認，Miss So個笑容真係有融化內心嘅能力，我呆咗噉望住佢嗰背影，隔咗幾秒先Load到：「掰、掰掰......」
喺我仲回味緊Miss So講嗰啲嘢，突然醒起佢提到嘅其中一句「唔好令我失望呀」。佢呢句提醒咗我，要不是佢投咗我一票，我都唔會贏到鄧逸俊。
女邊緣人投票畀我，自然係意料不及，但係Miss So投畀我嗰一票，先至係真正決定勝負。
唉，啱啱一時太緊張，竟然唔記得要多謝佢！
話唔定佢特登嗌我唔好令佢失望，就係想暗示我要有啲表示。
「Wow！男．班．長！」
「威啦，宜家做咗班長，連待遇都唔同啲。」
阿烽佢哋喺廁所行出嚟扮Miss So講嘢，睇嚟聽到我哋之間嘅對話。
「食屎啦你哋。」
我求其鬧幾句，費事再理佢哋。
因為佢哋噉樣扮一扮，令我回味起Miss So啱啱嗰最後一句，幾乎甜到我入心入肺。
唔知Miss So呢吓，算唔算係我捧盃嘅一刻，定只係邁向捧盃之路嘅第一步。不過相信之後仲有好多機會可以多謝佢，宜家我只係想享受呢場第一次勝利。