投胎後竟然成為翻譯魔法師（魔法 冒險）: 2
「已經⋯已經沒落？」我驚訝地問
維達大叔點點頭，並向我解釋：
「森之女神愛麗絲，曾經喺阿斯蘭係一個傳統嘅神明。佢唔單只係人類嘅神明，更加係精靈嘅神明。佢保護住森林嘅生態，為森林內嘅唔同種族指引去路，保佑每一個對森林有禮嘅人。愛麗絲嘅信仰已經維持左數世紀，一切都還好，直至到北方嘅文化入侵，大量嘅宗教訊息、以及信仰都被強制灌輸到南方。加上北方嘅宗教有財有勢，更加吸引更多嘅人去信。從此，南方神明就慢慢末落，而愛麗絲亦都係其中之一。」
大叔托一托頭，彷彿思考咗一陣。
「依家仲信舊神嘅應該只有精靈或者矮人⋯⋯佢哋或者仲會有神廟。」大叔望向我：「但可惜嘅係，精靈甚少會同人類交流，矮人因為北方政權一直打壓佢哋，令到佢哋對人類出現咗仇視感⋯不過係阿斯蘭應該會相對好少少⋯⋯但好少聽到話矮人會信奉愛麗絲⋯」
「你言下之意，意思係如果我要到訪愛麗絲神廟嘅話，現存唯一嘅方法應該就係搵精靈幫手？」我繼續問問題，只見大叔點點頭。
「咁⋯既然愛麗絲呢個神明主要係同精靈有關，點解又會同大叔你哋一家有淵源？」其實我心裏面有一個答案，但仲未確定。
維達大叔嘆了一口氣，苦笑地望向我：「聽咗你講故事差唔多成個月，唔知你有冇興趣聽吓我講一個故事呢？」
然後大叔就講出一個故事，印證左我心裏面嘅假設。
故事發生喺差不多30年前，當時有一位劍士喺森林裏面行走，向着城鎮嘅方向前進。正當這位劍士行走嘅時候，森林內傳來一把聲音，一把虛弱女子聲音。雖然日光日白，但係喺森林裏邊突然間聽到一把女聲，點都會有啲驚。。。
該名劍士雖然都好驚，但係出於好奇心及同情心，佢鼓起勇氣走入森林嘅深處，隨着聲音嘅方向走近。當佢越走近森林嘅深處，聲音就越來越大，到最後佢終於發現聲音嘅來源⋯⋯一名精靈。
正確啲來講，係一名受傷嘅精靈。這名精靈嘅腳被捕獸器夾住，佢嘗試掙扎，卻令到腳上嘅傷口更加深。每當當佢隻腳傷勢加劇，佢就會用治療魔法短暫治療一下傷口，但隨着佢嘅掙扎又會再次受傷⋯⋯如是者，因為耗損大量嘅體力同魔力，這名精力已經變得十分虛弱。
當這名精靈見到劍士，立即露出驚恐嘅神情，一邊用着精靈語大叫，嘗試嚇走劍士，無奈劍士根本聽唔明佢講咩。劍士見到佢嘅傷口，立即想上前幫手，卻被突如其來嘅兩支光箭嚇退。劍士望向精靈，眼見佢面青口唇白，又流晒冷汗，明顯係缺乏魔力嘅情況。為咗拯救呢個精靈，一定要令到佢放下戒心。呢個時候，劍士開始嘗試同這名精靈交涉。
「通用語？你明唔明？受傷？我⋯幫助⋯你⋯治療？」劍士運用不太熟悉嘅通用語，嘗試同精靈溝通。
只見精靈鎖緊着眉頭，口震震咁發聲：
「你⋯人類⋯好人？幫助⋯我？」這位精靈也支支吾吾咁嘗試用通用語溝通。
劍士立即鬆了一口氣，最起碼大家可以溝通到。劍士花了一些時間跟精靈自我介紹，嘗試表達自己嘅來意，並且得到精靈嘅批准，幫助佢擺脫險境。當處理傷口嘅時候，劍士先發現到，原來呢一名精靈都幾靚女。清純嘅外表散發出高雅嘅氣質，而佢其雙眼就好似藍寶石一般，彷彿充滿着神秘感。
經過一輪嘅包紮同埋回復，這次意外事件終於解決，劍士亦都要講時間返會城鎮。就係臨走嘅時候，精靈突然開口問到：
「請問⋯你⋯名字⋯ 什麼？」雖然唔係十分伶俐，但大概可以明白佢嘅意思。
「我⋯名字⋯是⋯維達！」劍士露出燦爛嘅笑容，轉身向精靈揮手道別。
「我⋯莉莉安⋯」精靈也細細聲好想自己嘅名來。
就係咁樣，好似粵語殘片咁老土嘅劇情，一段可歌可泣嘅愛情故事就要發生。維達大叔除咗繼續如常訓練，更加額外學習更多嘅通用語，為嘅只係希望可以同莉莉李安更加容易溝通。而莉莉安回到精靈森林，有時候都會望向明月，用手撫摸腳上嘅疤痕，回想返維達大叔嘅外貌。
經過多年嘅相處，當初佢哋相識嘅森林已經成為佢哋約會嘅地方。最後當情到濃時，就自然會發生一些理所當然嘅事⋯⋯（你懂的⋯⋯）經過春宵一夜，兩人嘅感情更加升華到去另一個境界。係呢個時候，莉莉安下定決心要做一個艱難嘅抉擇：離家出走。
精靈一直到係森林算係一個神秘嘅存在，佢哋對於人類冇特別嘅好感，更加唔使講跨族婚姻嘅情況。莉莉安嘅父母並不支持呢一場婚事，為咗愛人，莉莉安必須要離家出走，先有機會同維達發展情緣。就係咁，佢哋開設左呢個農場，一直務農維生，就好似一對老夫老妻咁生活落去。
其實美好嘅生活背後一直都充斥着各種嘅問題，其中一個正正就係歲數嘅問題。雖然精靈身體的成長速度跟人類差不多，精靈通常在可以活750 年，而人類最多只可以活到120歲⋯⋯維達經常開玩笑，話當佢死咗之後，一定要莉莉安另尋新歡，以免佢孤獨寂寞⋯⋯
但睇嚟佢嘅擔心係多餘，因為上天同佢哋開咗玩笑。就係安娜出世嘅嗰一日，呢一日將會係維達大叔一世最難忘嘅日子，因為呢日除咗係佢囡囡嘅生日，同時間亦都係佢老婆嘅死忌⋯⋯莉莉安因為分娩期間消耗咗大量嘅體力同魔力，令到佢身體過分虛弱，最終支撐唔住離開人世⋯⋯
「而家你⋯唔使擔心⋯你早過我離開啦⋯」莉莉安虛弱地笑着說：「如果我⋯走咗之後，如果你遇到⋯一個更好嘅⋯女人，你一定要好好對佢，亦都希望佢會好好對我哋個女」
「你唔好亂講野啦！你唔會有事！一定一定唔會俾你有事！」維達大叔一邊喊，一邊又強裝堅強，緊握着莉莉安嘅手。
「阿達，我知我自己事，我真係差唔多要走啦⋯我想睇一睇我哋個女，可唔可以呀？」
「好！好！」維達大叔抱起剛出生嘅安娜，安娜在大叔嘅懷抱內哇哇大哭。莉莉安虛弱地捉住安娜嘅小手。
「乖囡，你第時大個女一定要聽老豆話，代替媽媽好好陪住佢，要乖呀知唔知呀？」莉莉安終於流下眼淚，將內心嘅恐懼表露無遺。為人母親，對於死亡嘅恐懼並不可怕，佢最怕嘅係自己冇辦法照顧自己嘅女兒，害怕有人會傷害自己最愛嘅女，怨恨冇辦法睇住佢嘅成長，渴望能夠盡一點母親嘅責任。
「老公，我真係要走啦⋯好多謝你一直咁照顧我，你係我一世最愛嘅男人，永遠都唔會忘記。你一定要好好照顧我哋嘅乖女，好嗎？」
「好！我應承你！我哋嘅乖囡一定會健健康康咁成長，一定會好似佢媽咪咁靚女。嘿！」面對着將死之人，偉達大叔只希望在自己嘅愛妻面前可以留下最好嘅印象，希望唔需要佢往生後擔心。佢嘗試堅強地露出佢哋初次見面嗰個燦爛嘅笑容，卻一邊流下眼淚。
莉莉安默不作聲，雙手撫摸着安娜的額頭，一絲微弱嘅光芒從莉莉安嘅手中亮起，安娜嘅哭泣聲亦都停止，一切都變得平靜，直到光芒結束，這一晚依然十分寧靜。
對於普通人來講，呢日只不過係一個普通嘅寧靜夜晚。可是對於維達大叔來說，將會係一生最難忘嘅一晚⋯
「個故事就係咁啦～」大叔看似輕描淡寫咁講述呢件事，但想必當初佢一定承受過平常人都冇辦法理解嘅痛。
「辛苦你啦⋯⋯」我根本無辦法講任何野，只好對大叔嘅堅持表示尊敬。
大叔望向我，微笑地點點頭，然後企起身。
「還好啦⋯都已經咁多年，咩都習慣晒⋯⋯」維達大叔露出招牌笑容，然後問我：
「故事就聽完啦，作為報酬，可唔可以幫我一個忙先？」
我露出黑人問號嘅表情。
「知唔知聽日咩日子？」
我搖搖頭
「正正就係我死鬼老婆嘅死忌，亦都係代表着我個女嘅生日。」
「所以你想我⋯⋯？」
「我想你一齊幫我個囡搞一場生日會」
-------------------
天都未光，我就已經開始收集材料，為既居然是搞一個生日派對。
「安娜聽日就十八歲啦。雖然係半精靈，但按照人類習俗，都算係成人啦。過往生日，我地唔算好有錢，只可以平平淡淡度過。但係佢今年我想俾佢有個特別啲嘅生日，原本都冇咩諗法，但聽你嘅故事，你鄉下香港應該係個幾有趣嘅地方，所以先想你幫手，俾啲意見…」
最後維達大叔雙手捉住我嘅手，誠懇地加一句:
「麻煩你啦！」
「唉~點樣慶祝生日呀…呢度又冇外賣，姐係要自己煮啦…」雖然我煮嘢都唔差，但一諗到要收集食材無得好似以前，去過百佳就可以買到咁方便，我就頭痛…
農莊附近有一個小村莊，但係我喺度生活咗一段時間，都無去過, 主要係因為我嘅工作根本就無需要去果度｡
基本上購物的事全部都係由大叔負責，一個禮拜去兩次。以今次大叔交低二十個銅幣俾我，並且教我點行過去，所以我大概都知點行。我地已經分左工，我亦教咗佢點煮，俾佢地嘗試下「異國風味」。
我去到村莊，望到入口一個簡陋嘅牌，寫住「白樺村」，唔知道呢度係咪有好多白樺樹？
話說我都發現咗一個幾特別嘅現象，呢個世界同我哋原來嘅世界其實有好多嘢都相似，食物或者動物甚至植物都有好多嘢一樣，當然都有一啲物種係呢個世界特定有嘅，但係都可以喺呢度搵到好多以前地球嘅植物。白樺樹就係一個好好嘅例子，而且食物方面都有相同嘅食物，例如香蕉、蘋果⋯動物都有雞、牛、羊、豬等等…
基本上以前地球有嘅嘢呢度都好似有，咁當然冇智能手機呢啲高科技嘅產品。而且大部份講嘅語言我都聽得明，其實唔可以話佢哋講緊地球嘅語言，佢哋講緊一啲我聽唔明嘅語言，但係我唔知點解好自然地理解到佢哋講咩意思。除此之外，我講嘅說話佢哋都會明白，但明明我講緊嘅係廣東話，佢哋理應係冇可能明白，彷彿好似一切都有翻譯咁。但係有一個好特別嘅現象，如果我講一啲特別嘅句子，又或者係潮語，咁佢哋就會可能聽唔明。例如我今日先話要煮條魚同安娜慶祝生日，象徵着年年有餘。
維達大叔就好似聽唔明「年年有餘」同「魚」的諧音，都唔明食魚嘅寓意。最後我只係隨意同佢解釋我鄉下嘅傳統，食魚代表着來年會有錢。
所以其實我係咪自帶翻譯功能？
我進入村莊後，去唔同地方收購食材，亦都向唔同嘅村民自我介紹。佢哋明顯對於外來人比較熱情，好好奇我係來自邊個，我亦都隨口話我來自南方共和嘅小鎮就算。藉此一行，我就明白到呃話就算係一個低發展嘅村莊。雖然唔係好發達，但係對於樸素嘅生活，已經好足夠。
我沿路一路行嘅時候，有一樣野引起我注意-「 書店 」
點解係一個咁簡樸嘅村莊，卻會出現一個書店⋯⋯我唔係歧視，只不過按照邏輯，如果呢個村莊有更多嘅資源，應該會起一啲更加實際用途嘅設施，但係點解會有人選擇喺呢度開一間書店？我又唔見得呢度嘅人會睇書喎⋯
我半信半疑走入呢間書店，一種莫名嘅好奇心令到我好想入去睇吓，究竟入邊係點樣⋯
我打開門嘅時候，門鈴發出「拎拎…」的聲音，彷彿提示店內嘅人有客人到。我驟眼一望，四周都係一座又一座嘅書山，以及擺在櫃上的不同雜物，加上店內好大塵，彷彿就好似好耐冇打掃咁。我走去書堆快睇唔同嘅書，不過我睇唔明嗰啲文字，但就唔知點解好自然理解到入邊嘅內容。呢啲書有唔同嘅內容，但我就發覺關於虛擬故事或者小說比較少。相反，呢度大量嘅書都係一啲有實際用途嘅書，食譜、天文學、防衛術、劍術入門、魔法⋯⋯唔同類型嘅書籍都有。
當中咁多本書，冇一本我係睇得明佢哋寫咩字，但係從字體中嘅格式同埋模式，發現當中嘅書籍並非全部都係同一種語言，但係每一本我都好似睇得明佢哋寫咩。嗰種感覺好抽象，我的確係望緊一對我唔識嘅字，但係當我望向每一行字嘅時候我腦海就好似出現咗一句又一句嘅廣東話同我翻譯晒⋯⋯唔通呢個真係我嘅超能力？
我喺我眼前果一堆書海之中，有一本書令我特別感興趣：
《魔法入門秘錄》