［純愛短篇番外］以朋友之名嘅愛情，我地各自嘅單相思: 07. 奇怪的人

張子萊嘅媽媽每次見到李穎容都問佢有冇拍拖，然後就會話：「子萊都未拍拖喎～咁啱呀～」

李穎容開心得嚟又有啲無奈，張媽媽好似好希望佢兩個一齊一樣，因為每次一聽到李穎容話：「仲未拍拖呀～」嘅時候，張媽媽嘅雙眼好似要發光一樣

「阿姨應該都唔係討厭我嘅⋯」李穎容喃喃自語地講道，「要適量嘅撒嬌～」

李穎容瞬間輕皺起眉頭，因為李穎容個人認為，自己係一個唔識撒嬌嘅人嚟，自己亦好少會對張子萊撒嬌之類，總覺得同自己嘅性格唔夾

「唔⋯點算呀⋯」李穎容開始有啲迷惘，「張子萊會唔會中意啲識煮飯又可以打理好屋企嘅女仔⋯？」





李穎容喺心中默默決定，要好好咁表現一下自己，好讓張子萊知道其實自己都可以好賢良淑德

⋯

距離上一次見面已經係成個月前嘅事，李穎容最近好忙，根本連見張子萊嘅時間都好難抽到出嚟

本來張子萊都有問過李穎容一唔一齊食飯，但李穎容卻話好忙

張子萊先啱啱踏出公司大堂，放喺褲袋嘅手機就震咗一震





李穎容：嘩～終於忙完啦～

本來忙咗全日已經好攰嘅張子萊一見到李穎容send過嚟嘅message，嘴角都忍唔住上揚，倦意都好似消褪咗啲

張子萊：咁可以約食飯未？

「可以啦～睇下你幾時得閒」李穎容邊行邊回覆道

李穎容搭車番到屋企附近，行番去嘅時候一直都拎住手機同張子萊WhatsApp





李穎容一番到屋企就去沖涼洗頭，食咗個簡單嘅晚餐然後就坐低喺梳化睇電視，忙碌嘅日子終於都完結，又可以輕鬆啲

⋯

夜晚 22:10

「食完飯未？」李穎容無聊問道

張子萊：10點啦小姐，你覺得我食咗飯未？

「隨便問下咋嘛～」李穎容邊笑邊回覆道

「叮噹～」

屋企嘅門鐘忽然間響起，李穎容望一望放喺電視機旁嘅電子鐘，然後不禁疑惑起嚟





李穎容行到去門前通過魚眼鏡望出去，見到一個著住普通T-shirt短褲，好似飲醉酒嘅中年大叔企喺家門前

「邊個嚟⋯？」李穎容一臉疑惑

「叮噹～叮噹～叮噹～」

中年大叔提起手又㩒咗三下門鐘，李穎容比門鐘嘅聲音嚇咗一跳，下意識就將防盜鏈扣上

「可能係搵錯單位啫～」李穎容雖然心裏有啲不安，但都係安慰自己講道

張子萊：我呢幾日可能會忙，所以係約食飯就快啦

「知啦知啦！都要睇下幾時得閒㗎～」





李穎容一知道好快又可以見到張子萊，心裏就覺得開心，畢竟已經成個月都冇見面

「但佢嚟緊好快又會忙⋯」李穎容喃喃自語地講道，「又要成個月後先可以再見⋯」

⋯

翌日夜晚，22:00

「叮噹～」

屋企嘅門鈴忽然間響起，啱啱沖完涼出嚟嘅李穎容一邊用毛巾抹乾頭髮，一邊緩緩走向門前，通過魚眼鏡望出去

一望出去，就見到又係嗰個著住普通T-shirt短褲，好似飲醉酒嘅中年大叔企喺家門前，然後佢提手又㩒咗門鐘一下

「叮噹～」門鐘又響咗一下





李穎容一個女仔出嚟住，見到呢啲情況有啲驚，佢唔敢開門問咩事，因為唔知開咗門之後會發生啲咩，所以只好扣上防盜鏈，然後假裝屋企冇人唔開門

「唔識番屋企就唔好飲醉酒啦⋯」李穎容細聲地抱怨道

放喺梳化嘅手機一震，見到係張子萊send過嚟嘅message，李穎容嘅心都安心咗啲

張子萊：終於放工啦⋯攰死⋯

「開OT開到咁晏？」李穎容拎起手機回覆，同時希望自己嘅心平靜啲

張子萊：呢幾日忙嘛～

「哦～話說啱啱有個醉酒大叔喺度㩒我門鐘」





張子萊：你唔好開門，危險，自己一個小心啲

張子萊：有咩事搵我

李穎容本來想答一句「好呀～」但係打咗之後又默默咁刪去，但見到張子萊叫自己有咩事就搵佢，心裏都有啲安心




IG Link: https://www.instagram.com/nd_cotttoncandy/?hl=zh-tw