［純愛短篇番外］以朋友之名嘅愛情，我地各自嘅單相思: 18. 各自的決定

李穎容番到去只有自己一人嘅屋企，一打開門，茉莉花嘅香味撲鼻而來，李穎容閂上門，除低高踭鞋，頹廢地坐低喺梳化上

「結婚⋯」李穎容喃喃自語道，「如果對張子萊嚟講，我係一個啱嘅結婚對象就好啦⋯」

對李穎容嚟講，「結婚」呢樣嘢的確好遠，什至佢諗都冇諗過

一直以嚟都喺張子萊身邊嘅佢，唔知由幾時開始覺得，只要一直喺張子萊身邊就足夠，唔想離開張子萊

「如果冇咗佢⋯」李穎容灘喺梳化上喃喃自語，「呀⋯」





當李穎容諗一下冇咗張子萊喺佢生活中會變成點嘅時候，李穎容先發現，佢嘅生活根本離唔開張子萊，張子萊係佢生活嘅一部分一樣

冇咗張子萊嘅話，就好似拼圖入面缺失咗一塊一樣，唔完整

「只要你仲係單身，我都仲喺有機會㗎嘛～」

李穎容諗起Eva講嘅嘢，頓時輕皺起眉頭

「好討厭⋯」李穎容坐起身，「我點可能真係咩都唔做⋯」





本來仲係唔太敢表白嘅李穎容，因為今日比Eva嘅言語同行為挑釁到，佢決定聽日就要同張子萊講清楚，一切睇起嚟都好突然，但其實唔突然啦已經，中意咗一個人十年係一個點樣嘅概念⋯？

張子萊番到屋企，灘坐喺梳化上望住天花板發呆

了解李穎容嘅張子萊，已經唔係第一日中意李穎容嘅張子萊，今日終於敢肯定，李穎容會因為其他女仔埋自己身而妒忌

⋯

翌日，星期六





兩人今日都要番工，番半日，所以放工嘅時候差唔多就到Tea Time

李穎容落樓嘅時候，見到張子萊已經企咗喺佢樓下等佢，今日嘅李穎容喺見到張子萊嘅身影時，心裏特別緊張，全身上下每一條神經線都因為緊張而突突跳動着

「想食咩呀？」張子萊問道

「去Cafe食好唔好呀？」李穎容微微一笑，用微笑掩蓋自己嘅唔自在

「好呀～」張子萊點點頭

因為過咗lunch hour，所以相對地cafe都冇咁多人，兩人坐嘅位置附近都冇人，同另一枱客間都隔咗三張枱

兩人都係叫咗個意粉，張子萊中意飲mocha，李穎容中意飲latte

「我最近真係日日都見住你⋯」張子萊拎起叉無奈地講道





「好委屈你咩？」李穎容先係飲咗一啖latte，然後卷起少少意粉放入口，「好唔想見到我咩宜家？」

「我冇～邊度敢？」張子萊笑了笑講道，「你好似見我仲多過見梁玥嘉同楊楠恩⋯佢地唔會抱怨你咩？」

「佢地都有拖拍啦～點會抱怨我喎～」李穎容無奈地講道，「佢地有時間都見男朋友啦～邊似我啫～」

「搵囉，你都搵番個男朋友囉～」張子萊講道

聽到張子萊咁講，李穎容心裏一顫，李穎容冇回答，只係默默耷低頭食嘢，兩個人就咁樣忽然間dead咗air

「張子萊你⋯你覺得我點呀？」李穎容緩緩地開口問道，悄悄地抬眼望一望張子萊，「我認真問㗎⋯」

「冇咩唔好呀。」張子萊回答道，「各方面都唔差。」





「我認真問㗎，你講真話就得。」李穎容一臉認真咁講道，「我唔會嬲。」

「唔⋯」張子萊遲疑地回答，「有義氣⋯唔虛偽⋯率直爽朗⋯嗯。做咩咁問？」

「冇呀⋯覺得自己好似冇拖拍咁⋯好似都冇人追我，好似冇咩男仔會中意我呢類型嘅女仔⋯」李穎容扭擰地講道，「想拍拖啦開始⋯自從中學嗰陣同Joshua分咗手之後，我都冇再拍過拖啦⋯」

張子萊聽到李穎容咁樣認真地講感情事時，心裏開始緊張起嚟

「佢想講咩⋯？」張子萊喺心中緊張地講道，「唔係想講你已經有中意嘅人或者有人追緊你呀⋯」

「我最後會唔會變賣淨蔗，冇人要㗎⋯！」李穎容嘅雙手捧住臉頰，哭喪着臉講道

「唔會嘅～點會咁易冇人要呀～」張子萊笑一笑講道，輕鬆嘅表面下藏着緊張不安嘅心

「都係，但係都有可能㗎嘛！」李穎容擔心地講道，李穎容上身前傾望住張子萊，帶着開玩笑嘅語氣講道，「張子萊，如果到30歲你同我都單身嘅話⋯不如你要咗我呀！」








IG Link: https://www.instagram.com/nd_cotttoncandy/?hl=zh-tw