當問題少年遇上問題少女: 51. 妳搶左我塊球拍?

“第一場，混雙，麻煩雙方出黎熱身”
 
我同梓晴兩個係到對猜，應該話係hea猜
 
因為我地兩個企定定係到，完全唔郁
 
“bb!!!”球證係專登搵羽總派相熟又免費嘅朋友黎擔當，我有理由相信佢將會係今日最辛苦嘅人
 
擲左公字之後，決定由Niki先開波
 




我地互相握手之時，我同Niki現任男友，喇沙嘅Peter仔眼中有d火花
 
因為我前年就係輸俾佢
 
「復活啦?耶穌都係3日，估唔到你要咁耐喎」
 
「咁要睇下，你又要幾耐先復活到啦」
 
場外，Chloe係兩間學校之間收緊賭注
 




「我贏你就3賠1，你贏就1賠2，個賠率幾好咁」
 
「打打下就落飛架啦」
 
我地兩個言語間各不相讓，係Niki同梓晴果邊，女人互串都幾好睇
 
「Jessie Tung，妳轉形象?著羽毛球鞋?妳對白飯魚呢?」
 
梓晴不甘俾Niki暗串，佢都會反擊
 




佢上下望一望Niki
 
「咁對羽毛球鞋係Clarance送俾我，有咩所謂?」
 
Niki望一望對鞋，梓晴同我對鞋係同色同款
 
「呵，情侶裝呀?」Niki個樣心有不甘
 
「妳話係咪係囉，不過我手上呢塊拍又幾好喎，好彩佢遇上真正嘅主人。如果佢跟錯輸波會扔拍嘅主人就唔好啦」
 
Niki認出，果塊係佢一直好想要嘅拍。當時佢拉住我睇球拍，同我講好想要，我就話會送俾佢，點知我儲到錢買兩塊拍時，已經俾佢派左帽
 
帽唔怕戴，最緊要除得快
 
「妳…..妳搶左我塊球拍…」




 
「唔係搶，係傑仔送俾我。我會用呢塊拍再打低妳」
 
“bb!!!!”
 
首先Niki開波
 
佢開波其實一般，所以基本上佢開波時係送機會俾梓晴扣殺
 
“咚!”佢為左打雙打，已經改左開短波，務求唔好一開波就俾人扣殺
 
不過梓晴又點會放過佢
 
梓晴踏橫一步，右手一揮，佢用橫身殺左一球出黎
 




Niki佢地冇諗過有此一著，所以呢球佢地救唔到，我地先得一分
 
拎呢一分果時，全場都好靜
 
因為梓晴出名係問題少女，估唔到佢有時會唔依常理打波
 
我地1-0，之後到梓晴開波
 
既然係雙打比賽，梓晴都會開短波俾對方
 
一個短波，Niki輕鬆打返過黎我呢邊
 
我都依照教練所講，留力。本來呢球我可以殺過去，不過要留力，所以我都係猜返過去算數
 
“咚”出現左新手擊球聲




 
Peter見狀，就想挑戰梓晴
 
佢一下殺波殺過去。梓晴估中球路，伸拍輕輕一擋，食埋佢叉燒。
 
因為Peter仲係後場，而Niki就老毛病，打雙打時會種左係到咁
 
2-0
 
梓晴再開波，個波俾Peter，佢為左搶分就挑高個波，想盡快搶返節奏
 
不過梓晴好快退後回返呢一球過去
 
Niki見狀，就一個殺波殺落去，直飛網頂
 




梓晴跳前，好兇狠咁殺左一下
 
個波通左Niki坑渠
 
3-0
 
好啦，呢場波勝負已分，因為Niki係頭5分內俾人咁攻擊的話，佢信心會全心。之後成場波會俾人撳住黎打
 
呢個同Niki性格有關，佢一向只打有優勢嘅波
 
梓晴之前同佢比賽過，所以一定清楚對方實力
 
第一局就以21-8，我地先贏一局