當問題少年遇上問題少女: 55. 第一次踏入九龍真光

「梓…梓晴呀」
 
「嗯?咩事呀?」
 
「妳走光啦」
 
佢望一望自己上身同褲
 
「怕咩丫，我而家同你一齊住，唔通你有時去騎樓見到我底褲胸圍又叫我收返咩」
 




佢又有佢嘅道理，佢黎左我屋企住兩星期，我相信佢所有底褲胸圍顏色我都見過哂
 
差唔多都係粉色少女系列，仲要喱士款
 
「啊，我估唔到妳會著呢D款式者」
 
「你唔鍾意?我洗唔洗換過哂?」
 
「妳著俾我睇呀?」
 




我嘅視線繼續留係片上
 
梓晴靜左一陣，陪我繼續睇片
 
如果要搵人代Polly打單打，我心中有兩個選擇
 
梓晴或者Maggie
 
梓晴實力係無可置疑，而Maggie就可以同梓晴打到咁好睇，佢實力有返咁上下
 




「梓晴，問妳d野丫」
 
「你問啦」
 
我係睇片時仲聞到有薯片味，係卡樂B
 
「Polly家姐實力妳覺得點樣?」
 
「Maggie?佢兩姊妹實力不相伯仲，果日我同佢打波都出哂汗」
 
「嗯…妳觀察力都好好」
 
我地兩個靜靜地食薯片
 
「喂呀，食哂啦，你諗到出場陣容未?」




 
「我唔想妳又單打又雙打喎」
 
「咁…冇辦法啦」
 
係下一次練習，梓晴代替Polly帶領球隊，不過始終佢都唔係領導，所以我就暫時代替Polly
 
我就好似令狐沖成為恒山派掌門人咁，由一個男仔帶領一眾女仔
 
Polly嘅缺陣，對球隊嘅士氣有一定嘅影響
 
但係大家都好樂意為Polly而加操，特別係梓晴
 
因為我要兼顧埋練波之事，所以我將所有球隊行政交哂俾Chloe一個人負責
 




大約一星期左右，因為腦內腫瘤穩定，所以Polly佢可以出院。但係一出院果一日，佢就直接去仁安準備做手術
 
係佢做手術前，我地打算一眾球員去探佢
 
但係有一件事，梓晴佢好想做左先
 
當日我地買左一張好大嘅祝福咭
 
「唔?妳想我地成隊球隊簽名?冇問題呀」
 
其實係練波果時，大家都已經簽哂名上去
 
不過好奇怪，張咭好大張下
 
「喂喂，聽日你有冇時間架」




 
「聽日唔洗練波，妳想行街?我可以陪妳呀」
 
「你係陪我先好呀」
 
第二日，梓晴著起套校服一齊出門口
 
「點呀?妳想去邊到?」
 
「去九龍塘」
 
九龍塘?唔?我認我咸濕
 
係火車站落車後，梓晴帶我行到去真光里
 




“九龍真光中學”
 
「入去啦」梓晴帶住我入去
 
「喂喂喂，妳就話可以直行直過者，我咁樣點入呀?」
 
佢上下打量我
 
「行啦!!!Maggie今日係到呀」
 
我同梓晴好平安咁走到入九龍真光入邊
 
「球場球場…..係果邊!」
 
即使我之前同Niki拍拖，我最多都係火車站等佢放學
 
今次係我第一次踏入前度嘅學校
 
一去到球場，就已經見到Maggie佢地係到練波
 
「唔?Jessie妳做咩黎我地到呀?」
 
「係咁嘅……Polly….佢下星期做手術…所以我地打算….」
 
梓晴拎出左張祝福咭遞俾Maggie
 
「俾我啦，我會叫哂所有隊員寫上去」
 
「麻煩哂妳啦」
 
「邊麻煩呢，我呢個做家姐嘅，應該為個妹做多d事」
 
Maggie叫哂所有隊員集合，然後大家為Polly寫上祝福語
 
仲有九真校長同羽毛球教練