屍殺某街50號: 屍殺某街50號 (六) # 閉氣
細個睇啲港產片時，遇著啲咁嘅環境，就點都要閉氣既。
而家先知有根有據，完全係自然反應。
嗰一刻，我閉住氣，望住木門嘅位置，咩都望唔到，因為太黑。但我知我嘅感官敏銳咗，我Feel到佢，而且我更加驚。
腦入面又再閃出一個念頭，點解我只係Feel到，點解除咗Feel之外，就真係咩都無，會唔會係因為隻嘢跟本無呼吸。隻嘢係鬼 ? 定係高科技機械人 ? 未來戰士 ?
唔同嘅假設不停喺我腦入面閃黎閃去，閃到個人有啲企唔穩。
唔係，係因為我一直都閉氣，缺氧令我腳軟，加埋女神嘅重量，我唔知頂到幾耐。
我下定決心，心入面倒數30秒，一數完就發難，話之隻嘢係咩喇，就點都好過企喺度焗死。
一諗到呢度，腦入面已經制定幾個方案。
包括有理無理衝埋去窗口位，一黎首先拉開同隻嘢嘅距離，二黎爭取時間，如果好彩嘅話，就整開啲殘舊嘅窗口木板，靠月色望清楚門口嗰隻係咩嘢，就後再諗點走。
可惜諗就好型，做就碌7。
血腥味突然倍數咁加埋黎，我吊，門口而家唔止一隻，仲要咕咕聲咁伴隨住低沉嘅惡狗怪聲，諗諗下都係揹住女神焗死算喇。
我唔理喇，我頂唔順，我吸咗啖氣，我好後悔。
真係傻，頭先閉住氣都攻上黎嘅血腥味已經嚴重污染左啲空氣，而家下吸嘅呢一嘢，就好似將魚檔放咗一星期嘅黑色血水，放入膠袋之中，再套住你個頭一樣，我好想咳。
但呢個時候我聽到Jason把聲...
搞錯呀！唔係出現埋幻覺呀? 變態嫁 ? 唔想聽住佢把聲死呀。
但佢把聲再一次響起，真係佢。
佢而家就喺4樓前梯叫緊我地，有無笨啲呀，佢Feel唔到周圍有嘢嘅咩。
血腥味即刻淡咗，同時聽到一把從未出現過嘅惡狗低沉聲，把聲好短，但就好似好有威嚴。
Hi Hi 呢次，呢隻一定係大佬。
我知佢哋衝緊去前梯，Jason條Hi Hi，今次真係Hi Hi了。
續六