屍殺某街50號: 屍殺某街50號 (十五) # 落樓
雖然心入便好急，但我依然唔可以行得太快。
前面講過，現場真係漆黑一片嘅，我揹住女神，我怕碌落樓梯，就係咁簡單。
其實黎到呢個地步，我哋可以話已經心力交瘁，最慘係，喺呢度完全無時間觀念，我唔知過左幾耐，亦唔知仲要捱多幾耐。
唔單止成晚無訓，我亦feel到體力用得7788，女神之前比我嘅鼓勵，始終都敵唔過身體嘅本能。
一定要出去!!一定要出去!!我心入便不停重複住呢一句。
到終於認為自己正式身處後梯嘅時候，我停低左先，又用返腳尖探路嗰招，一步一步咁試探前面，我好想快啲探到梯級。
當一個人，身處喺火燒後欄咁嘅危機之中，但你偏偏要慢慢磨，嗰種感覺真係好辛苦，好難受，就好似比啲蟻不停咬住個心咁。
你話如果而家又整啲怪嘢出黎，我驚我會變埋第二個Jason。
好彩，跟住嗰步，終於Feel到腳尖失一失重心，我即刻企定，然後用隻左手扶實個鐵攔桿。
Yeah~!
有咗鐵攔桿之後，成件事即刻唔同晒。
嗱，我首先將隻左手向前拉直，然後全程摸實條鐵攔桿，跟住每個一個轉角，我都可以利用隻左手事先得知。
好易計，4層樓一共有8個轉角，我一路數住，然後急步落樓。
續(十五)