《我老婆唔係我女朋友》【那些年／日常／校園】 第一至三章: 【第一章】 大專的老仙文化（２）
「Level 15咋。」我隨口答道。
「我51嚕，希望今晚煲過60。」Leon有點興奮。
「你可以返去打機？唔使開會咩？」我有點奇怪佢可以咁有閒情逸緻，因為Leon去年剛剛上莊，莊期仍未完結。
「莊」，泛指校內的學生組織，大至學生會，小至興趣研究學會也可以稱之為「莊」，主要是為會員提供服務、捍衛權益、謀求福利、舒難解困、組織活動等等；而所謂「上莊」，是指擔任學會內閣的幹事，即是以上為學生服務的班底了。
Leon職司外務兼活動幹事，主力與外界聯繫和組織聯校活動，他說政綱內的理念和貢獻甚麼的，全是搵笨實的，他只是純粹享受策劃的工作（我說他骨子裡就是個控制狂，享受操縱、擺佈他人…）、識多啲街外人和寫靚份CV（履歷）而已；至於Leon做緊乜嘢莊就無謂自爆了，總之是大莊吧。
「呿～Sem頭咋，唔使咁緊張啦，你又唔係唔知啲同學大多係rockman。」Sem（semester）頭就是學期頭啦，「Rockman洛克人」系列是指當時非常流行的紅白機遊戲，但他意指大專生是石頭人，普遍是零參與校內活動的冷感生物；以我為例吧，有時間我都返歸打機或者去補習賺零用了，點解要去埋啲濕狗動物園睇禽獸嘴臉？（去過真係有童年陰影的），你問馬飛呢，佢實話情願去唱K。
不過話說佢哋舊年上莊時，Leon支莊（其實唔是Leon揸莊）在做諮詢時的表現，簡直好睇過《大時代》。
諮詢大會即是consultation（有啲院校叫Conday、Compaign、Con會，各處鄉村各處例吧），是個類似會員大會的場境，用以諮詢各會員（選民）對新內閣的意見和訴求，一般經歷過諮詢大會的洗禮，競選路上的沙沙石石都會給理順（擺平？），到正式投票時就一帆風順了。