我聽馬飛吹水說,大多數女同學都不喜歡陪(男)朋友巡視毒隱業務,輕則黑面雙番西,重則口出惡言、拂袖而去,但阿心呢個衰妹有一個好抵讚嘅優點,佢同我一齊去巡視毒隱業務從來都無抗拒,反而會東看西看,自己找樂趣。

我再三叮嚀:「妳唔好去第二層呀,我一陣返嚟搵妳。呀~妳可以留意吓會唔會見到另一個【龍珠】七大奇景——鄭E健,佢成日嚟呢度抄game㗎,我之前都撞過佢兩次。」

她只笑了笑,做手勢催我快去,話說這個怪女生又是對靚仔明星完全無興趣的。(忍不住要呻吓,今天居然成了「鏡粉」、「姜糖」,哎~~)

【龍珠】三樓是商場中最毒的一層,「毒之龍三」(龍三其實是港漫《黑豹列傳》的其中一個角色)也就順理成章的成為了另一個七大奇景了,龍三幾乎清一色是電腦舗和遊戲機舗,專攻抄game、改機、賣攻略、金手指碼和周邊產品,例如特殊手制(軚盤、手槍型甚至是火箭炮型手制)或分線器之類,除了有一兩間舗有老闆娘或是老細嘅老母(還是外母?)睇舗外,這層幾乎是女性絕跡的(當時未流行招攬索女做看板娘,所以該層所有店員都是陀地MK仔、油頭毒隱或是厚鏡大叔)。

抄電玩game一般2到5蚊一隻碟,價錢視乎遊戲新舊,遊戲容量則決定要幾多隻碟,以那時候最流行的超任吧,SF16001一隻16M(bit)街霸2的遊戲,就要用兩片3.5吋碟1.44M(byte)了。電腦遊戲呢就10蚊一隻碟,那時候還有相當多的PC-9801和apple II的game,電腦遊戲是需要精挑細選的,因為電腦game往往要夾硬件,一旦唔compatible就抄咗都嘥錢,所以始終都是玩「超任博士」最實惠。

已有 0 人追稿