《我老婆唔係我女朋友》【那些年／日常／校園】 第一至三章: 【第二章】 還是欠一步（２）
行到【荔枝園】外面，那裡有一個三角形的迷你休憩處，只有幾張石凳供街坊乘涼，休憩處內進有個村互助委員會，但我經過這麼多年從未見它有運作過，馬路邊是巴士站，入沙田的巴士必經這裡；由於對面是墳場，而四周也沒有甚麼特別設施，所以這裡相對比較幽靜，只有零星的學生在等巴士。
我對阿心說：「欵，妳坐吓，我去入面士多買嘢飲，飲乜嘢？」我們就在那個休憩處休息，【荔枝園】村口有一間小士多，於是我又用老招數，試圖打聽她的喜好。
「唔好～話咗我請嘛，等我去買啦，你飲乜嘢呀？」她真的沒有甚麼港女惡習，「義氣心」真係名副其實的。
「嗯…凍凍哋，我飲熱維他奶啦，我記得『阿吳』有熱嘢賣嘅，呀，佢係士多老闆，阿婆嚟㗎。」阿吳要讀1聲（ng1），我唔知佢邊度鄉下，總之啲friend教我噉叫佢啦。
「吓，你連阿婆叫咩名都知，唔簡單喎，要唔要畀你入去敍舊呀。」她笑嘻嘻的說著。
「唔使呀，我同佢唔係好熟咋，妳唔好詐詐諦諦唔請飲嘢喎～」我笑罵秒回。
「嘻嘻～」她邊笑邊行入村。
我提高聲線隔遠叫過去：「欵，士多隔離係一間電鍍廠，佢哋養咗隻肥狗叫『多妮』，我同佢就熟啲，妳順便睇吓見唔見佢啦，幾得意㗎。」我不知道「多妮」是哥基種，還是陀地混血，反正牠腳短又有點遲鈍，行路磨碌噉非常可愛。