窩心的糯米飯
 
「頭先佢哋話呢度走鬼檔【強記】啲糯米飯出名嘛,見咁近咪行兩步買囉,點知要排隊啫。」她口中的「佢哋」應該是那班舊同學了,說時並指向橋底,公廁旁邊果然有條小人龍。
 
原來去了排隊買嘢畀我食,一下子氣也全消了:「夜麻麻妳等埋我先去嘛,仲有以後要企定,等我搵妳呀,唔好妳行我又行。」我放軟聲音的說。
 
「哎吔,知道喇,唔好咁長氣啦。嘻嘻,我又唔怕喎,你實搵到我嘅。」她充滿信心的秒回。
 
我有點奇怪她對我近乎盲目的信心,難道真的「不要問只要信」?到後來過了一段時間,我才知道她為甚麼相信我「一定搵到佢」,不過這是後話了。
 


「過馬路坐小巴啦,有無打電話返去報到呀?」有點氣悶,被她一說,我自己都覺得自己長氣。
 
「頭先喺餐廳打咗嚕,我話佢哋知有人送囉。」她仍是笑意盈盈。鵝頸橋橋底有通宵紅色小巴返青山道的,返到深水埗後再轉車或徒步回家都可以。
 
我們經過橋底時,見到還有打小人的架步未收工。我對著阿心惡狠狠的說:「我應該請人打小人,『打你隻小人腳,等你有腳無得走』,噉就唔使成日走來走去。」
 
「哈哈…我聽人講呢個世界有一種雀仔係無腳嘅,佢只可以一直噉飛呀飛,飛到攰嗰陣就喺風裡面瞓覺,哈哈哈哈。」她今晚心情真的超級好,一言九「頂」,連早兩年上嗰齣《阿飛正傳》都出埋。

已有 0 人追稿