《我老婆唔係我女朋友》【那些年／日常／校園】 第一至三章: 【第三章】 雅典娜保衛陣線（２）
如是者無驚無險又食晏，Leon啜了一口凍啡，又開始軍情匯報：「入場劵就畀咗馬飛嘞，我出口術提醒佢咪周圍唱，特別唔可以畀我莊員蘇菲知，要保密門票來源，又扮傻話銷情女多過男，叫佢搵自己圍內啲『仔』去戥勻啲。嗱，我個劇本係用『計畫行為理論TPB』嚟推算…」
我一怔打斷他：「咩嘢TVB理論話，咁隱pro嘅咩？」
Leon哈哈大笑「哈哈，話曬都大專生嘛，狗噏吓拋書包啫，係咪好有氣勢呢。嗱，知我咩嘢料啦，哈哈。首先叫佢唔可以畀蘇菲知，即是令佢唔敢打阿心主意。其次叫佢搵圍內啲仔，一來避免佢搵佢個『紅顏』A1班阿May，二來令你被人『拉夫』嘅機會提高，就算佢最後唔搵你，我都仲有控制權叫佢重選。」
我點頭受教：「但你侷佢喺A2班夾人，你自己唔去咩？」Leon跟我基本上是A1班的，只因我retake才會涉入了A2班，也幸好這樣才得以認識阿心。
「我無諗住去呀，之前都提過單嘢蘇菲揸旗嘛，費事我出席好似監場噉啦。」Leon攤手解釋原因。
畢竟Leon是我的最強後盾，所以我有點不安：「就怕有乜嘢意外啫…」
他卻從容不迫的安慰我：「定啲嚟，唔使淆喎，經我沙盤推演，唔可能會出錯嘅。除夕我要返part time呀，我家姐公司有event要去幫手。」頓了一頓，他繼續說：「其實你都知我享受幕後操盤多啲，睇住事情一步一步按我嘅劇本實現，噉先至係最大嘅滿足感，重有我呢啲冷氣軍師，唔適合做前線勇武嘅，你幾時見過諸葛亮披住件聖衣燃燒小宇宙，喺前線被人打到爆曬缸㗎？」
我自然明白他的為難處，也就無謂勉強了：「明嘅，我會自己執生了。」