《我老婆唔係我女朋友》【那些年／日常／校園】 第一至三章: 【第三章】 陰晴不定的舞會前夕（２）
我繼續叮囑她：「妳自己入場先，記住唔好亂飲嘢喎，妳知妳自己幾醒啦，一陣又飲咗酒就唔知點算。仲有唔好隨便畀人拖手呀。」
聽到安排定當，她的心情開始轉好：「如果有人請我跳舞，禮貌上我要畀佢拖住手㗎喎，唔拖得㗎咩？」
「駁少陣嘴唔得嘅，就係怕咗妳懵盛盛啫，一陣人哋以為有手拖妳去馬呀。」唔知點解我突然躁躁哋。
最怕有人好像我一樣，二話不說就拖她手唔放，佢又唔識反抗。
「乜嘢係去馬呀？」無知少女又再次上身。
俾佢糾纏不清，真的唔躁都搞到躁了：「唔解喇，總之叫妳唔好就唔好啦！」
「唓～又唔講人知，你快啲嚟到咪得囉，我都唔想㗎。」無知少女變身無辜少女。
「小姐呀，我坐平民校巴嚟咋，妳去到唔好跟住啲『撩仔部』，扮一陣鵪鶉先咪得囉。」我愈說愈大聲。
她聽見我愈長氣就愈得戚：「係喇，你愈來愈似我阿媽，哈哈。呀，31號我哋會去其中一個同學屋企化妝先，如果有急事揾我，打嚟屋企搵咗心瑜先吖，佢會搵到我嘅。」心瑜係佢阿妹。
忘記了甚麼時間睇過，可能《姊妹》寫過吧，愈在乎就愈緊張，愈緊張就愈容易心浮氣躁。
我自己也覺得有點氣悶：「知道喇。」
可能察覺我語氣不善吧，她臨收線也放軟聲音的安慰我：「喂呀，唔好太遲到呀，記得我等緊你㗎。」