《我老婆唔係我女朋友》【那些年／日常／校園】 第一至三章: 【第三章】 神拳無敵雅典娜（２）
我下意識的答道：「個男嘅唔識跳舞囉。」
她又斜睥著我：「兩個男人跳緊舞又點會唔識跳呀，你估個個都好似你咁渣咩，再估吓？」
「嗯…一定啲女唔得，唔夠索！」無女吼就話自己毒啫，有女都唔吼仲唔係啲女有問題？
「噫～激死，邊有人噉講㗎，不過都差唔多啦，咪即係間接話無女生值得佢哋邀請囉。」她一副沒好氣的模樣。
「點解妳識咁多呢啲嘢嘅，我真係第一次聽咋喎。」我由衷的讚嘆。
「咩呀，學社交舞都會順便學埋舞會禮儀㗎啦，如果唔係咪失禮街坊。」她說的一切，彷彿都是理所當然的，就只差未說我是鄉下佬。
話說社交舞原來分為標準舞和拉丁舞兩大類，阿心話我呢啲臨陣磨槍的，梗係標準舞BB班了；社交舞傳統是由男生做「導舞」，例如跳舞時的步幅、速度和轉向等，都是由導舞者來決定；而女生則為「隨舞」，是根據男生的引導，作出相應的跟隨和配合，因此跳舞向來被視為男女之間，相互培養默契的最佳活動。
阿心拉我離開座位範圍遠一點，直到舞池外圍邊緣，好似𠱁細路仔一樣。「行出啲嘛，姐姐又唔會打你嘅，縮埋一邊點跳呢？嗱，我做導舞，你做隨舞，你要配合我嘅腳步㗎。」男女角色互換。
我極度不情願下無奈點頭，正想伸手去攬她的腰，她的目光一直緊盯著我的手徐徐的說：「小朋友，你隻手想放邊度呢？」
我一窒，尷尬的囁嚅著：「我…見人哋跳舞都係攬住條腰嘛。」